Exodus 13

Chinese TTVR (現代台語譯本羅馬字版)

← Chapter 12 Jump to: Chapter 14 →

1Siōng Chú tùi Mô͘-se kóng,

2“ Í-sek-lia̍t -lâng tio̍h chiong thâu-chiūⁿ-siⁿ ê lâng kap cheng-siⁿ, lóng hun-pia̍t-choh-sèng kui hō͘ góa; in-ūi in sī góa ê.”

3Mô͘-se tùi Í-sek-lia̍t -lâng kóng, “Lín tio̍h ōe-kì-tit chit-ji̍t, in-ūi Siōng Chú tī chit-ji̍t ēng tōa koân-lêng ê chhiú kā lín tùi Ai-ki̍p chòe lô͘-châi ê ke chhōa--chhut-lâi; ū-kàⁿ ê piáⁿ lóng m̄-thang chia̍h.

4Lín tī A-pit-ge̍h ê chit-ji̍t lī-khui Ai-ki̍p.

5Chiong-lâi Siōng Chú ōe chhōa lín chìn-ji̍p Ka-lâm -lâng, Hek -lâng, A-mô͘-lī -lâng, Hi-bī -lâng, Iâ-pò͘-su -lâng khiā-khí ê tōe, chit-ê tōe sī I tùi lín ê chó͘-sian li̍p-sè beh siúⁿ-sù hō͘ lín lâu lin kap bi̍t ê tōe, hit-sî lín tio̍h tī ta̍k-nî ê chit kò-ge̍h chun-siú ē-bīn chit-ê kui-lē:

6Tio̍h chia̍h bô-kàⁿ-piáⁿ chhit ji̍t; tē-chhit ji̍t sī kèng-pài Siōng Chú ê choeh-ji̍t.

7Chit chhit ji̍t lín tio̍h chia̍h bô-kàⁿ-piáⁿ; tī lín kéng-lāi bōe-ēng-tit ū kàⁿ-bú kap ū-kàⁿ ê piáⁿ.

8Tī chit-ji̍t, lín tio̍h kà-sī lín ê kiáⁿ, kóng, ‘Che sī beh kì-liām Siōng Chú tī góa chhut Ai-ki̍p ê sî, ūi-tio̍h góa só͘ chòe ê sū.’

9Lín tio̍h tī lín ê chhiú kap thâu-hia̍h chòe kì-hō, hō͘ lín siông-siông àm-liām Siōng Chú ê lu̍t-hoat; in-ūi Siōng Chú ū ēng tōa koân-lêng ê chhiú chhōa lín chhut Ai-ki̍p.

10Só͘-í, ta̍k-nî chit-ji̍t nā kàu, lín tio̍h siú chit-ê kui-lē.”

11“Siōng Chú chhōa lín chìn-ji̍p I tùi lín kap lín ê chó͘-sian li̍p-sè, beh siúⁿ-sù hō͘ lín ê Ka-lâm -tōe,

12hit-sî, lín tio̍h chiong tōa-kiáⁿ kap só͘-ū thâu-chiūⁿ-siⁿ kang ê cheng-siⁿ hiàn hō͘ Siōng Chú; in-ūi chiah-ê lóng sio̍k Siōng Chú.

13Thâu-chiūⁿ-siⁿ ê lû-á, tio̍h hiàn iûⁿ-á sio̍k-hôe; nā bô beh sio̍k-hôe, chiū tio̍h kòng-tn̄g lû-á ê ām-kún; m̄-kú lín ê tōa-kiáⁿ lóng tio̍h sio̍k-hôe.

14Í-āu lín ê kiáⁿ nā mn̄g lín kóng, ‘Sī-án-chóaⁿ beh án-ni chòe?’ Lín tio̍h kā in kóng, ‘Siōng Chú ēng tōa koân-lêng ê chhiú chhōa goán tùi Ai-ki̍p chòe lô͘-châi ê ke chhut--lâi.

15Hit-sî Ai-ki̍p -ông kò͘-chip m̄ pàng goán lī-khui, Siōng Chú chiū chiong Ai-ki̍p só͘-ū lâng ê tōa-kiáⁿ kap cheng-siⁿ ê thâu-chiūⁿ-siⁿ--ê, lóng thâi-sí; só͘-í, góa chiong thâu-chiūⁿ-siⁿ kang ê cheng-siⁿ hiàn hō͘ Siōng Chú; chiong tōa-kiáⁿ sio̍k-hôe.

16Lí tio̍h tī lí ê chhiú kap thâu-hia̍h chòe kì-hō, kì-liām Siōng Chú ēng tōa koân-lêng ê chhiú chhōa goán chhut Ai-ki̍p.’”

17Ai-ki̍p -ông pàng Í-sek-lia̍t -lâng lī-khui ê sî, Siōng-tè bô chhōa in kiâⁿ hit-tiâu keng-kè Hui-lī-sū -tōe khah-kūn ê lō͘; in-ūi Siōng-tè kóng, “Kiaⁿ-liáu chiah-ê jîn-bîn tú-tio̍h chiàn-cheng, chiū hō͘-hóe koh tò-tńg-khì Ai-ki̍p.”

18Só͘-í Siōng-tè chhōa Í-sek-lia̍t -lâng oat tùi Âng-hái khòng-iá hit-tiâu lō͘; Í-sek-lia̍t -lâng lóng bú-chong, tùi Ai-ki̍p -tōe chhut--khì.

19Mô͘-se tòa Iok-sek ê kut-hâi lī-khui, in-ūi Iok-sek ū kiò Í-sek-lia̍t -lâng chiù tāng-chōa, tùi in kóng, “Siōng-tè it-tēng ōe chiàu-kò͘ lín, lín tio̍h tòa góa ê kut-hâi chòe-hé tò--khì.”

20In tùi So͘-kat chhut-hoat, tī khòng-iá ê pian-kài Í-thóng chat-iâⁿ.

21Siōng Chú kiâⁿ tī in ê thâu-chêng, ji̍t--sî ēng hûn-thiāu kā in chhōa-lō͘, mî--sî ēng hé-thiāu kā in chiò-kng, hō͘ in ji̍t--sî mî--sî lóng ōe-tàng kiâⁿ-lō͘.

22Ji̍t--sî ê hûn-thiāu, mî--sî ê hé-thiāu, lóng bô lī-khui Í-sek-lia̍t -lâng.

← Chapter 12 Jump to: Chapter 14 →