Exodus 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1Siōng-tè hoan-hù chiah-ê it-chhè ê ōe, kóng,

2“Góa sī Siōng Chú — lí ê Siōng-tè, ū chiong lí tùi Ai-ki̍p -tōe, chòe lô͘-châi ê ke chhōa--chhut-lâi.

3“Góa í-gōa lí m̄-thang ū pa̍t-ê Siōng-tè.

4“M̄-thang ūi ka-kī tiau-khek ngó͘-siōng, bô-lūn thiⁿ-téng, tōe-chiūⁿ, kap tōe-ē chúi-lāi só͘-ū ê mi̍h, lóng m̄-thang chō in ê siōng;

5m̄-thang kā in kūi-pài, mā m̄-thang ho̍k-sāi in, in-ūi góa Siōng Chú — lí ê Siōng-tè sī iau-kiû choân-chêng ho̍k-sāi ê Siōng-tè; oàn-hūn góa ê lâng, góa tui-kiù in ê chōe, tùi pē kàu kiáⁿ, kàu saⁿ sì tāi;

6thiàⁿ góa, chun-siú góa kài-bēng ê lâng, góa si-un hō͘ in, ti̍t-kàu chheng tāi.

7“M̄-thang lām-iōng Siōng Chú — lí ê Siōng-tè ê miâ; in-ūi lām-iōng Siōng Chú ê miâ ê lâng, góa Siōng Chú it-tēng bô kā i tòng-chòe bô-chōe.

8“Tio̍h ōe-kì-tit An-hioh-ji̍t, siú chòe sèng-ji̍t.

9La̍k ji̍t lāi tio̍h phah-piàⁿ chòe lí só͘-ū ê khang-khè,

10m̄-kú tē-chhit ji̍t sī Siōng Chú — lí ê Siōng-tè siat-li̍p ê An-hioh-ji̍t; chit-ji̍t, lí kap lí ê kiáⁿ, cha-bó͘-kiáⁿ, lô͘-po̍k, lú-pī, cheng-siⁿ, í-ki̍p kià-ku tī lín tiong-kan ê lâng, lóng m̄-thang chòe kang,

11in-ūi la̍k ji̍t kú, Siōng Chú chhòng-chō thiⁿ, tōe, hái, kap hit tiong-kan ê bān-mi̍h, tē-chhit ji̍t chiū hioh-khùn; só͘-í Siōng Chú sù-hok An-hioh-ji̍t, siat-li̍p chit-ji̍t chòe sèng-ji̍t.

12“Tio̍h hàu-kèng lí ê lāu-pē, lí ê lāu-bú, thang hō͘ lí tī Siōng Chú — lí ê Siōng-tè siúⁿ-sù lí ê tōe kú-tn̂g khiā-khí.

13“M̄-thang hāi-sí lâng.

14“M̄-thang kan-îm.

15“M̄-thang thau-the̍h.

16“M̄-thang choh gūi-chèng hām-hāi lí ê chhù-piⁿ.

17“M̄-thang tham lí ê chhù-piⁿ ê chhù, mā m̄-thang tham lí ê chhù-piⁿ ê bó͘, lô͘-po̍k, lú-pī, gû, lû, á-sī lí ê chhù-piⁿ jīm-hô ê mi̍h-kiāⁿ.”

18Só͘-ū ê jîn-bîn khòaⁿ-tio̍h sih-nà, thiaⁿ-tio̍h lûi-tân kap sàu-kak ê siaⁿ, koh khòaⁿ-tio̍h soaⁿ-téng chhèng-ian, chiū ngia̍uh-ngia̍uh-chhoah, hn̄g-hn̄g khiā--teh,

19tùi Mô͘-se kóng, “Chhiáⁿ lí kā goán kóng chiū hó, goán it-tēng beh thiaⁿ; m̄-thang hō͘ Siōng-tè tùi goán kóng-ōe, goán chiah bián sí.”

20Mô͘-se tùi jîn-bîn kóng, “M̄-bián kiaⁿ; Siōng-tè kàng-lîm sī beh khó-giām lín, hō͘ lín siông-siông kèng-ùi I, chiah bián lín hoān-chōe.”

21Jîn-bîn hn̄g-hn̄g khiā--teh; Mô͘-se kiâⁿ-óa ba̍t-hûn, khì Siōng-tè hia.

22Siōng Chú tùi Mô͘-se kóng, “Lí tio̍h kā Í-sek-lia̍t -lâng án-ni kóng, ‘Lín í-keng khòaⁿ-kìⁿ góa tùi thiⁿ-téng kap lín kóng-ōe.

23M̄-thang ūi ka-kī chō jīm-hô kim á-sī gûn ê sîn-siōng lâi kap góa pí-phēng.

24Tio̍h ēng thô͘ kā góa khí chè-tôaⁿ, tī hit téng-bīn hiàn sio-hòa-chè kap pêng-an-chè, í-ki̍p lí ê gû, lí ê iûⁿ; só͘-ū kèng-pài góa ê só͘-chāi, góa beh lâi hia sù-hok lí.

25Lí nā ēng chio̍h-thâu kā góa khí chè-tôaⁿ, m̄-thang ēng phah--kè ê chio̍h-thâu khí; chio̍h-thâu nā ēng ke-si phah--kè, chiū siū phah lâ-sâm.

26M̄-thang chō kiā-á-chàn kiâⁿ-chiūⁿ góa ê chè-tôaⁿ, chiah bián lō͘-hiān lí ê hā-thé.’”

← Chapter 19 Jump to: Chapter 21 →