Exodus 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Mô͘-se thòe i ê tiūⁿ-lâng, Bí-tiân ê chè-si Ia̍p-te̍k-lô kò͘-iûⁿ. I chhōa iûⁿ-kûn ji̍p-khì khòng-iá ê sai-pêng, kàu Siōng-tè ê soaⁿ, chiū-sī Hô-lia̍t-soaⁿ.

2Siōng Chú ê sù-chiá tī chhì-phè ê hé-iām tiong tùi i hián-hiān. I chù-ì khòaⁿ, khòaⁿ-tio̍h chhì-phè hō͘ hé sio, m̄-kú chhì-phè bô sio--khì.

3Mô͘-se sim-lāi siūⁿ-kóng, “Góa tio̍h oat kè-khì hia khòaⁿ chit-ê kî-koài ê kéng-siōng, sī-án-chóaⁿ chhì-phè bô sio--khì?”

4Siōng Chú khòaⁿ-tio̍h Mô͘-se oat kè-lâi beh khòaⁿ, Siōng-tè chiū tùi chhì-phè lāi-bīn kiò i, kóng, “ Mô͘-se, Mô͘-se.” Mô͘-se ìn kóng, “Góa tī chia.”

5Siōng-tè kóng, “Lí m̄-thang koh kiâⁿ óa--lâi; tio̍h kā lí ê ôe thǹg--khí-lâi, in-ūi lí khiā ê só͘-chāi sī sîn-sèng ê tōe.”

6I koh kóng, “Góa sī lí ê chó͘-sian ê Siōng-tè, A-pek-la-hán ê Siōng-tè, Í-sat ê Siōng-tè, Ngá-kok ê Siōng-tè.” Mô͘-se chiū jia i ê bīn, m̄-káⁿ khòaⁿ Siōng-tè.

7Siōng Chú kóng, “Góa khak-si̍t ū khòaⁿ-tio̍h góa ê chú-bîn tī Ai-ki̍p só͘ siū ê khó͘-chhó͘, ū thiaⁿ-tio̍h in siū tok-kang ap-pek só͘ hoat-chhut ê ai-kiò. In ê thòng-khó͘ góa lóng chai.

8Taⁿ góa beh lo̍h-lâi kái-kiù in thoat-lī Ai-ki̍p -lâng ê chhiú, chhōa in lī-khui hit-ê tōe, khì pûi-súi koh khoan-khoah, lâu lin kap bi̍t ê tōe, chiū-sī Ka-lâm -lâng, Hek -lâng, A-mô͘-lī -lâng, Pí-lī-sé -lâng, Hi-bī -lâng, Iâ-pò͘-su -lâng hiah-ê cho̍k ê só͘-chāi.

9Hiān-chāi Í-sek-lia̍t -lâng ê ai-kiò í-keng thàu kàu góa ê hī-khang, góa mā ū khòaⁿ-tio̍h Ai-ki̍p -lâng án-chóaⁿ ap-pek in.

10Taⁿ, lí tio̍h khì, góa beh phài lí khì Ai-ki̍p -ông hia, chhōa góa ê chú-bîn Í-sek-lia̍t -lâng tùi Ai-ki̍p chhut--lâi.”

11Mô͘-se tùi Siōng-tè kóng, “Góa sī siáⁿ-lâng, ná káⁿ khì kìⁿ Ai-ki̍p -ông, chhōa Í-sek-lia̍t -lâng tùi Ai-ki̍p chhut--lâi?”

12Siōng-tè kóng, “Góa ōe kap lí tông-chāi, che sī góa phài lí khì ê chèng-kù. Lí chhōa góa ê chú-bîn tùi Ai-ki̍p chhut--lâi liáu-āu, lín tio̍h lâi chit-ê soaⁿ kèng-pài Siōng-tè.”

13Mô͘-se tùi Siōng-tè kóng, “Góa khì Í-sek-lia̍t -lâng hia, tùi in kóng ‘Lín lia̍t-chó͘ ê Siōng-tè ū phài góa lâi lín chia’, in nā mn̄g góa kóng ‘I kiò-chòe sím-mi̍h miâ’, góa beh án-chóaⁿ kā in ìn?”

14Siōng-tè tùi Mô͘-se kóng, “Góa sī Chū-iú-éng-iú--ê. Lí tio̍h kā Í-sek-lia̍t -lâng kóng, ‘Chū-iú-éng-iú--ê phài góa lâi lín chia.’”

15Siōng-tè koh kā Mô͘-se kóng, “Lí tio̍h tùi Í-sek-lia̍t -lâng án-ni kóng, ‘Siōng Chú — lín lia̍t-chó͘ ê Siōng-tè, A-pek-la-hán ê Siōng-tè, Í-sat ê Siōng-tè, Ngá-kok ê Siōng-tè phài góa lâi lín chia.’ Chit-ê éng-oán sī góa ê miâ, sè-sè-tāi-tāi chòe góa ê chheng-ho͘.

16Lí khì tiàu-chi̍p Í-sek-lia̍t -lâng ê tiúⁿ-ló, kā in kóng, ‘Siōng Chú — lín lia̍t-chó͘ ê Siōng-tè, A-pek-la-hán, Í-sat, Ngá-kok ê Siōng-tè, tùi góa hián-hiān, kóng: Góa si̍t-chāi koàn-kò͘ lín; lín tī Ai-ki̍p tú--tio̍h ê sū, góa lóng ū teh koan-sim.

17Góa it-tēng beh kiù lín thoat-chhut tī Ai-ki̍p siū ê kan-khó͘, chhōa lín khì kàu Ka-lâm, Hek, A-mô͘-lī, Pí-lī-sé, Hi-bī, Iâ-pò͘-su hiah-ê cho̍k khiā-khí ê só͘-chāi, chiū-sī lâu lin kap bi̍t ê tōe.’

18“ Í-sek-lia̍t -lâng ōe thiaⁿ lí ê ōe; lí kap in ê tiúⁿ-ló tio̍h khì kìⁿ Ai-ki̍p -ông, kā i kóng, ‘Siōng Chú — Hi-pek-lâi -lâng ê Siōng-tè ū tùi goán hián-hiān. Taⁿ, chhiáⁿ ún-chún goán kiâⁿ saⁿ ji̍t ê lō͘-thêng, khì khòng-iá tùi Siōng Chú — goán ê Siōng-tè hiàn-chè.’

19Góa chai, nā bô ēng kiông-lia̍t ê chhiú-tōaⁿ, Ai-ki̍p -ông bōe hō͘ lín lī-khui.

20Góa beh chhut-chhiú, kiâⁿ kî-sū kong-kek Ai-ki̍p, án-ni, i chiah ōe pàng lín lī-khui.

21“Góa beh hō͘ Ai-ki̍p -lâng hó khoán-thāi chit-ê jîn-bîn, bōe hō͘ in khang-chhiú lī-khui;

22lín ta̍k-ê hū-jîn-lâng beh tùi chhù-piⁿ, í-ki̍p kià-ku tī hia ê hū-jîn-lâng thó kim-khì, gûn-khì, kap i-ho̍k, thang hō͘ lín ê hāu-siⁿ cha-bó͘-kiáⁿ ēng; án-ni lín chiū kā Ai-ki̍p -lâng ê châi-bu̍t chhiúⁿ--lâi.”

← Chapter 2 Jump to: Chapter 4 →