Exodus 19

Chinese TTVR (現代台語譯本羅馬字版)

← Chapter 18 Jump to: Chapter 20 →

1Í-sek-lia̍t -lâng chhut Ai-ki̍p -tōe liáu-āu, tī tē-saⁿ kò-ge̍h ê chhoe-it lâi kàu Se-nāi ê khòng-iá.

2In lī-khui Lī-hui-tèng lâi kàu Se-nāi ê khòng-iá, chiū tī hit-ê soaⁿ ê tùi-bīn chat-iâⁿ.

3Mô͘-se chiūⁿ-soaⁿ tiâu-kìⁿ Siōng-tè. Siōng Chú tùi soaⁿ--ni̍h kiò Mô͘-se, kóng, “Lí tio̍h tùi Ngá-kok ê hō͘-tāi Í-sek-lia̍t -lâng soan-pò͘,

4‘Góa tùi Ai-ki̍p -lâng só͘ chòe ê sū, lín lóng ū khòaⁿ--tio̍h; mā chai góa án-chóaⁿ chhin-chhiūⁿ eng-chiáu ēng si̍t chài lín, chhōa lín lâi kui tī góa.

5Taⁿ, lín nā chhiat-si̍t thiaⁿ-thàn góa ê ōe, chun-siú góa ê iok, chiū ōe tī lia̍t-kok tiong chiâⁿ-chòe góa ê chú-bîn. Choân-tōe lóng sī góa ê,

6m̄-kú lín sī kui-sio̍k góa--ê, sī chè-si ê kok-tō͘, sèng-kiat ê kok-bîn. Lí tio̍h chiong chiah-ê ōe tùi Í-sek-lia̍t -lâng kóng.’”

7Mô͘-se chiū khì tiàu-chi̍p jîn-bîn ê tiúⁿ-ló, chiong Siōng Chú bēng-lēng ê ōe lóng kā in kóng.

8Jîn-bîn chôe-siaⁿ ìn kóng, “Siōng Chú só͘ kóng--ê goán lóng beh chun-thàn.” Mô͘-se chiū chiong jîn-bîn ê ōe hôe-ho̍k Siōng Chú.

9Siōng Chú kā Mô͘-se kóng, “Góa beh tī ba̍t-hûn ê tiong-kan lâi lí chia, hō͘ jîn-bîn thiaⁿ-kìⁿ góa kap lí kóng-ōe, thang éng-oán sìn-jīm lí.” Mô͘-se chiong jîn-bîn ê ōe tùi Siōng Chú kóng,

10Siōng Chú koh kā Mô͘-se kóng, “Lí khì jîn-bîn hia, hoan-hù in tī kin-á-ji̍t kap bîn-á-chài tio̍h kiat-chēng ka-kī, koh kiò in sóe-saⁿ,

11chún-pī gêng-chiap tē-saⁿ ji̍t. Tē-saⁿ ji̍t, Siōng Chú beh tī só͘-ū jîn-bîn ê bīn-chêng, kàng-lîm tī Se-nāi-soaⁿ.

12Lí tio̍h tī soaⁿ ê chiu-ûi kā jîn-bîn tēng kài-hān, kóng, ‘Lín tio̍h kín-sīn, m̄-thang chiūⁿ-soaⁿ, mā m̄-thang chhim-hoān soaⁿ ê pian-kài; nā ū lâng chhim-hoān chit-ê soaⁿ ê pian-kài, it-tēng tio̍h hō͘ i sí;

13m̄-thang kā i bong--tio̍h, tio̍h ēng chio̍h-thâu kā i tìm-sí, á-sī ēng chìⁿ kā siā--sí. Só͘-ū chhim-hoān pian-kài--ê, bô-lūn sī lâng á-sī cheng-siⁿ, lóng bōe-ēng-tit hō͘ i oa̍h.’ Kàu sàu-kak ê siaⁿ thoa-tn̂g ê sî, in chiah thang chiūⁿ-soaⁿ.”

14Mô͘-se lo̍h-soaⁿ khì jîn-bîn hia, hoan-hù in tio̍h kiat-chēng ka-kī, koh kiò in sóe-saⁿ.

15I tùi jîn-bîn kóng, “Tio̍h chún-pī gêng-chiap tē-saⁿ ji̍t; m̄-thang chhin-kūn hū-jîn-lâng.”

16Kàu tē-saⁿ ji̍t chheng-chá, soaⁿ-téng lûi-kong sih-nà, o͘-hûn-bi̍t-pò͘, hō-kak ê siaⁿ tōa tân; iâⁿ-lāi ê jîn-bîn lóng ngia̍uh-ngia̍uh-chhoah.

17Mô͘-se chhōa jîn-bîn lī-khui iâⁿ-tōe, gêng-chiap Siōng-tè; in lóng khiā tī soaⁿ-kha.

18Kui-ê Se-nāi-soaⁿ lóng sī hé-ian, in-ūi Siōng Chú tī hé-tiong kàng-lîm tī soaⁿ-téng; soaⁿ ê hé-ian chhin-chhiūⁿ hé-lô͘ ê ian chhèng-koân, kui-ê soaⁿ tōa tín-tāng.

19Sàu-kak ê siaⁿ ná tân ná tōa, Mô͘-se kóng-ōe, Siōng-tè tân-lûi kā i ìn-tap.

20Siōng Chú kàng-lîm tī Se-nāi-soaⁿ soaⁿ-téng; Siōng Chú tiàu Mô͘-se chiūⁿ soaⁿ-téng, Mô͘-se chiū peh-chiūⁿ soaⁿ.

21Siōng Chú tùi Mô͘-se kóng, “Lí lo̍h-khì kéng-kài jîn-bîn, kiò in m̄-thang chhiau-kè kài-sòaⁿ beh lâi chia khòaⁿ Siōng Chú, tì-kàu ōe ū chin chōe lâng sí.

22Chhin-kūn Siōng Chú ê chè-si mā tio̍h kiat-chēng ka-kī, chiah bián góa kā in hêng-hoa̍t.”

23Mô͘-se tùi Siōng Chú kóng, “Jîn-bîn bōe-tàng chiūⁿ Se-nāi-soaⁿ, in-ūi lí í-keng kéng-kài goán, kóng, ‘Tio̍h tī soaⁿ ê chiu-ûi siat kài-hān, kā soaⁿ hun-pia̍t-choh-sèng.’”

24Siōng Chú kā i kóng, “Lí lo̍h--khì, chiah koh kap A-lûn chòe-hé chiūⁿ--lâi; m̄-kú chè-si kap jîn-bîn m̄-thang chhiau-kè kài-hān beh lâi Siōng Chú chia, chiah bián góa kā in hêng-hoa̍t.”

25Mô͘-se chiū lo̍h-soaⁿ khì jîn-bîn hia, kā in soan-pò͘.

← Chapter 18 Jump to: Chapter 20 →