Exodus 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Ū chi̍t ê Lī-bī chi-cho̍k ê ta-po͘-lâng chhōa kâng chi-cho̍k ê lú-chú chòe bó͘.

2Chit-ê hū-jîn-lâng hoâi-īn, siⁿ chi̍t ê hāu-siⁿ, khòaⁿ i chin kó͘-chui, chiū kā i chhàng saⁿ ge̍h-ji̍t.

3Āu-lâi, hū-jîn-lâng bô hoat-tō͘ koh chhàng, chiū the̍h chi̍t ê pô͘-chháu chòe ê nâ-á, ēng táⁿ-má-ka kap pek-iû kô͘ hō͘ i bōe sia̍p-chúi, chiong eⁿ-á khǹg tī lāi-bīn, jiân-āu chiong nâ-á khǹg tī Nî-lô hô-piⁿ ê lô͘-úi tiong-kan.

4Eⁿ-á ê tōa-chí khiā tī hn̄g-hn̄g ê só͘-chāi, ài-beh chai i ōe tú-tio̍h sím-mi̍h tāi-chì.

5Ai-ki̍p -ông ê cha-bó͘-kiáⁿ lâi kàu Nî-lô hô-piⁿ beh sóe seng-khu; i hiah-ê kiong-lú tī hô-piⁿ kiâⁿ-lâi-kiâⁿ-khì. Kong-chú khòaⁿ-tio̍h lô͘-úi tiong-kan ū chi̍t ê nâ-á, chiū chhe kiong-lú khì the̍h hit-ê nâ-á.

6I chi̍t-ē phah-khui, khòaⁿ-tio̍h chi̍t ê eⁿ-á; ah, ta-po͘ eⁿ-á teh háu. I chin m̄-kam, kóng, “Chit-ê it-tēng sī Hi-pek-lâi -lâng ê eⁿ-á.”

7Eⁿ-á ê a-chí lâi tùi Ai-ki̍p -ông ê cha-bó͘-kiáⁿ kóng, “Góa lâi ūi lí tī Hi-pek-lâi hū-jîn-lâng ê tiong-kan chhē chi̍t ê lin-bú, kā lí io chit-ê gín-á hó--bô?”

8Ai-ki̍p -ông ê cha-bó͘-kiáⁿ ìn kóng, “Hó, lí khì.” Cha-bó͘ gín-á chiū khì kiò eⁿ-á ê lāu-bú lâi.

9Ai-ki̍p -ông ê cha-bó͘-kiáⁿ kā eⁿ-á ê lāu-bú kóng, “Lí kā chit-ê eⁿ-á phō-khì io, góa ōe hō͘ lí kang-chîⁿ.” Hū-jîn-lâng chiū kā chit-ê eⁿ-á phō--khì, kā i io.

10Chit-ê eⁿ-á tōa-hàn, hū-jîn-lâng kā i chhōa-khì hō͘ Ai-ki̍p -ông ê cha-bó͘-kiáⁿ. Ai-ki̍p -ông ê cha-bó͘-kiáⁿ chiū siu chit-ê gín-á chòe kiáⁿ, kā i hō-miâ kiò-chòe Mô͘-se, kóng, “Góa kā i tùi chúi--ni̍h khiú--chhut-lâi”.

11Āu-lâi, Mô͘-se tōa-hàn; i chhut-khì i ê tông-pau Hi-pek-lâi -lâng hia, khòaⁿ-tio̍h in teh chòe khó͘-kang; koh khòaⁿ-tio̍h chi̍t ê Ai-ki̍p -lâng teh phah Hi-pek-lâi -lâng.

12Mô͘-se khòaⁿ piⁿ--á lóng bô lâng, chiū phah-sí hit-ê Ai-ki̍p -lâng, ēng soa kā i khàm--teh.

13Keh-ji̍t, Mô͘-se koh chhut--khì, khòaⁿ-tio̍h nn̄g ê Hi-pek-lâi -lâng teh sio-phah. I tùi hit-ê bô-lí--ê kóng, “Lí sī-án-chóaⁿ phah ka-kī ê tông-pau?”

14Hit-ê lâng kóng, “Siáⁿ-lâng phài lí chòe siú-léng lâi sím-phòaⁿ goán? Lí àn-sǹg beh kā góa phah--sí, chhin-chhiūⁿ phah-sí hit-ê Ai-ki̍p -lâng sī--bô?” Mô͘-se kiaⁿ-chi̍t-tiô, siūⁿ-kóng “Chit-ê tāi-chì lâng it-tēng chai lah”.

15Ai-ki̍p -ông thiaⁿ-tio̍h chit-ê tāi-chì, beh thâi Mô͘-se. Mô͘-se siám-pī Ai-ki̍p -ông, cháu-khì Bí-tiân, tòa tī hia. Ū chi̍t ji̍t, Mô͘-se chē tī chíⁿ-piⁿ;

16Bí-tiân ê chè-si ū chhit ê cha-bó͘-kiáⁿ; in lâi chhiūⁿ-chúi, kā chúi-chô tò-tīⁿ, beh hō͘ in lāu-pē ê iûⁿ-kûn lim.

17Ū kò͘-iûⁿ--ê lâi, kā in kóaⁿ-cháu; Mô͘-se chiū khí-lâi kā in kái-kiù, hō͘ in ê iûⁿ-kûn lim-chúi.

18In tńg-lâi in lāu-pē Ia̍p-te̍k-lô hia, in lāu-pē kóng, “Kin-á-ji̍t lín ná hiah chá chiū tò--lâi?”

19In ìn kóng, “Ū chi̍t ê Ai-ki̍p -lâng kái-kiù goán, kā hiah-ê khi-hū goán ê kò͘-iûⁿ--ê kóaⁿ-cháu, sīm-chì koh chhiūⁿ-chúi hō͘ iûⁿ-kûn lim.”

20Lāu-pē tùi i ê cha-bó͘-kiáⁿ kóng, “Hit-ê lâng tī tó-ūi? Lín sī-án-chóaⁿ kā i pàng tī hia? Khì chhiáⁿ i lâi chòe-hé chia̍h-pn̄g.”

21Mô͘-se chiap-siū iau-chhiáⁿ, hoaⁿ-hí kap Ia̍p-te̍k-lô tòa chòe-hé. Ia̍p-te̍k-lô chiong i ê cha-bó͘-kiáⁿ Se-pho-la kè hō͘ Mô͘-se.

22Se-pho-la siⁿ chi̍t ê hāu-siⁿ; Mô͘-se kā i hō-miâ kiò-chòe Kek-sūn, kóng, “Góa kià-ku tī gōa-pang.”

23Kúi-nā nî āu, Ai-ki̍p -ông sí. Í-sek-lia̍t -lâng in-ūi chòe khó͘-kang, thó͘-khùi ai-kiò. In chòe khó͘-kang ai-kiò ê siaⁿ thàu kàu Siōng-tè hia.

24Siōng-tè thiaⁿ-tio̍h in haiⁿ-haiⁿ-chhan ê siaⁿ, chiū siūⁿ-khí I kap A-pek-la-hán, Í-sat, Ngá-kok só͘ li̍p ê iok.

25Siōng-tè khòaⁿ-kò͘ Í-sek-lia̍t -lâng, mā koan-sim in.

← Chapter 1 Jump to: Chapter 3 →