Exodus 1

Chinese TTVR (現代台語譯本羅馬字版)

Jump to: Chapter 2 →

1Ngá-kok ê kiáⁿ-jî ta̍k-ê chhōa in ê ka-koàn, kap Ngá-kok chòe-hé lâi kàu Ai-ki̍p, in ê miâ sī:

2Lū-piān, Se-biān, Lī-bī, Iû-tāi,

3Í-sat-ka, Se-pò͘-lûn, Piān-ngá-bín,

4Tān, Ná-hut-tha-lī, Ka-tek, kap A-siat.

5Ngá-kok ê hō͘-tāi lóng-chóng chhit-cha̍p lâng; Iok-sek í-keng tī Ai-ki̍p.

6Iok-sek kap i ê hiaⁿ-tī, í-ki̍p in hit-tāi ê lâng lóng sí.

7M̄-kú Í-sek-lia̍t -lâng siⁿ-thòaⁿ chin chōe, hui-siông kiông-sēng, piàn-móa hit-ê tōe.

8Āu-lâi, Ai-ki̍p ū m̄ bat Iok-sek ê sin ê ông khí-lâi thóng-tī.

9I kā i ê jîn-bîn kóng, “Khòaⁿ leh, Í-sek-lia̍t bîn-cho̍k pí lán khah chōe, koh-khah kiông;

10lán tio̍h siūⁿ chi̍t ê hó pān-hoat lâi tùi-hù in, chiah bián in jîn-kháu ke-thiⁿ, chiàn-cheng hoat-seng ê sî, liân-ha̍p lán ê tùi-te̍k kā lán kong-kek, lī-khui chit-ê tōe.”

11Ai-ki̍p -lâng chiū phài tok-kang koán-hat in, kiông-pek in chòe khó͘-kang ap-pek in, hō͘ in tī Pí-tong kap Lân-sài ūi Ai-ki̍p -ông khí tún-chek bu̍t-chu ê siâⁿ.

12M̄-kú Ai-ki̍p -lâng jú kā in ap-pek, in jîn-kháu jú chōe, khok-tián jú khoah. Tùi án-ni, Ai-ki̍p -lâng jú kiaⁿ Í-sek-lia̍t -lâng.

13Ai-ki̍p -lâng kiông-pek Í-sek-lia̍t -lâng chòe khó͘-kang,

14hō͘ in seng-oa̍h khùn-khó͘; bô-lūn chhiau liâm-thô͘, chòe chng, á-sī tī iá-tōe chòe kang, Ai-ki̍p -lâng lóng giâm-hat tùi-thāi in.

15Ai-ki̍p -ông bēng-lēng Hi-pek-lâi ê sán-pô, chi̍t ê kiò-chòe Si-hut-la, chi̍t ê kiò-chòe Phó͘-a,

16kóng, “Lín kā Hi-pek-lâi ê hū-jîn-lâng chiap-seng, in beh siⁿ ê sî, lín nā khòaⁿ-tio̍h ta-po͘--ê, tio̍h hō͘ i sí; nā-sī cha-bó͘--ê, chiū hō͘ i oa̍h.”

17M̄-kú sán-pô kèng-ùi Siōng-tè, bô chiàu Ai-ki̍p -ông ê bēng-lēng khì chòe; in lâu ta-po͘ eⁿ-á ê sìⁿ-miā.

18Ai-ki̍p -ông kiò sán-pô lâi, kā in kóng, “Lín sī-án-chóaⁿ lâu ta-po͘ eⁿ-á ê sìⁿ-miā?”

19Sán-pô tùi Ai-ki̍p -ông kóng, “ Hi-pek-lâi hū-jîn-lâng kap Ai-ki̍p hū-jîn-lâng bô kâng-khoán; in khah ióng, sán-pô iáu-bē kàu, in chiū siⁿ lah.”

20Siōng-tè hó khoán-thāi chit nn̄g ê sán-pô; Í-sek-lia̍t bîn-cho̍k jîn-kháu jú chōe, jú kiông-sēng.

21Chit nn̄g ê sán-pô kèng-ùi Siōng-tè, Siōng-tè chiū hō͘ in kiàn-li̍p ka-têng.

22Ai-ki̍p -ông bēng-lēng só͘-ū ê jîn-bîn kóng, “Tio̍h kā Hi-pek-lâi -lâng siⁿ ê ta-po͘ eⁿ-á tàn lo̍h-khì Nî-lô-hô, kan-ta hō͘ in ê cha-bó͘ eⁿ-á oa̍h--teh.”

Jump to: Chapter 2 →