Exodus 38

Chinese TTVR (現代台語譯本羅馬字版)

← Chapter 37 Jump to: Chapter 39 →

1Pí-sat-lia̍t ēng kim-ha̍p-hoan-bo̍k chòe sio-hòa-chè ê chè-tôaⁿ; tn̂g kap khoah lóng nn̄g kong-chhioh jī-cha̍p kong-hun, sī sù-hong--ê; koân chi̍t kong-chhioh saⁿ-cha̍p kong-hun.

2Tī tôaⁿ ê sì kak-thâu chòe sì ki khiàu--khí-lâi ê kak, kap tôaⁿ liân chòe-hé; kui-chō chè-tôaⁿ ēng tâng pau--teh.

3I koh ēng tâng chòe tôaⁿ só͘-ū ê khì-khū, chiū-sī tháng-á, thuh-á, óaⁿ, bah-chhe, kap hé-tiáⁿ.

4I ūi chè-tôaⁿ chòe chi̍t ê tâng ê bāng, an tī chè-tôaⁿ sì-bīn ûi-io-pán ê ē-pòaⁿ-pêng, hō͘ bāng tùi tôaⁿ ê pòaⁿ-io chhun kàu ē-tóe.

5I tī tâng ê bāng ê sì kak-thâu chù sì ê tâng-khoân, chòe chhng kǹg ê lō͘-ēng.

6I ēng kim-ha̍p-hoan-bo̍k chòe kǹg, ēng tâng pau--teh,

7chiong kǹg chhng tī chè-tôaⁿ siang-pêng ê khoân lāi-bīn, thang kng chè-tôaⁿ; ēng pang chòe chè-tôaⁿ, tiong-ng sī khang--ê.

8I ēng tâng chòe sóe-tn̄g ê phûn kap phûn-chō; sī ēng tī hōe-bō͘ mn̂g-kháu ho̍k-sāi ê hū-jîn-lâng ê tâng-kiàⁿ chòe--ê.

9I ēng so--kè ê iù-môa kā hōe-bō͘ ûi chi̍t ê tiâⁿ; lâm-pêng ê ûi tn̂g sì-cha̍p-sì kong-chhioh.

10Ûi ū jī-cha̍p ki thiāu, jī-cha̍p ê ū sún-khang ê tâng-chō; thiāu ê kau-á kap hoâiⁿ-koaiⁿ lóng ēng gûn chòe.

11Pak-pêng ê ûi tn̂g sì-cha̍p-sì kong-chhioh, thiāu jī-cha̍p ki, tâng-chō jī-cha̍p ê; thiāu ê kau-á kap hoâiⁿ-koaiⁿ lóng ēng gûn chòe.

12Tiâⁿ sai-pêng ê ûi jī-cha̍p-jī kong-chhioh, thiāu cha̍p ki, tâng-chō cha̍p ê; thiāu ê kau-á kap hoâiⁿ-koaiⁿ lóng ēng gûn chòe.

13Tiâⁿ tang-pêng ê ûi khoah jī-cha̍p-jī kong-chhioh.

14Ji̍p-kháu ê siang-pêng, ûi ê tn̂g lóng la̍k kong-chhioh la̍k-cha̍p kong-hun, tiàu ûi ê thiāu kok saⁿ ki, ū sún-khang ê tâng-chō kok saⁿ ê.

16Tiâⁿ sì-bīn ê ûi lóng sī ēng so--kè ê iù-môa chòe--ê.

17Thiāu ê chō sī tâng--ê, thiāu ê kau-á kap hoâiⁿ-koaiⁿ sī gûn--ê; thiāu-táu sī ēng gûn pau--ê; tiâⁿ só͘-ū ê thiāu lóng ēng gûn ê hoâiⁿ-koaiⁿ liân-chiap--teh.

18Tiâⁿ ji̍p-kháu ê mn̂g-lî sī ēng chhiah-siù ê chhiú-lō͘, ēng nâ-sek, chí-sek, chu-âng-sek ê se, kap so--kè ê iù-môa siù--ê; khoah káu kong-chhioh, koân-tō͘ kap tiâⁿ ê ûi kâng-khoán nn̄g kong-chhioh.

19Tiàu mn̂g-lî ê thiāu ū sì ki, ū sún-khang ê tâng-chō ū sì ê; thiāu ê kau-á sī gûn--ê, thiāu-táu kap hoâiⁿ-koaiⁿ ēng gûn pau--teh.

20Hōe-bō͘ kap tiâⁿ chiu-ûi ê khi̍t-á lóng sī tâng--ê.

21Ē-bīn chiah-ê sī Lī-bī -lâng chiàu Mô͘-se ê bēng-lēng, keng-kè chè-si A-lûn ê kiáⁿ Í-tha-má ê chí-tō, chheng-tiám khǹg iok-kūi ê hōe-bō͘ lāi-bīn khì-khū ê kì-lio̍k.

22Iû-tāi chi-cho̍k, Hō͘-ní ê sun, O͘-lī ê kiáⁿ Pí-sat-lia̍t, ū oân-sêng Siōng Chú bēng-lēng Mô͘-se só͘ tio̍h chòe--ê.

23I ê tâng-kang Tān chi-cho̍k, A-hi-sat-boat ê kiáⁿ A-hô-lī-a-pek sī tiau-khek-su, mā-sī siat-kè-su, chin gâu ēng nâ-sek, chí-sek, chu-âng-sek ê se, kap iù-môa chhiah-siù.

24Ūi-tio̍h sèng-só͘ só͘-ū ê kang-thêng hōng-hiàn ê kim-á, chiàu sèng-só͘ ê kong-chhìn, lóng-chóng ū chi̍t-chheng kong-kun.

25Hōe-chiòng tiong-kan tiám-sǹg--kè ê lâng só͘ hiàn ê gûn, chiàu sèng-só͘ ê kong-chhìn, ū saⁿ-chheng sì-pah saⁿ-cha̍p kong-kun.

26Jī-cha̍p hè í-siōng ū teng-kì--ê, chóng-kiōng la̍k-cha̍p-bān saⁿ-chheng gō͘-pah gō͘-cha̍p lâng; chiàu sèng-só͘ ê kong-chhìn, ta̍k-ê lâng hōng-hiàn la̍k kong-khek ê gûn.

27In ēng saⁿ-chheng sì-pah kong-kun ê gûn, chù sèng-só͘ kap tiùⁿ-lî ū sún-khang ê chō, chóng-kiōng chi̍t-pah ê; ta̍k-ê chō saⁿ-cha̍p-sì kong-kun.

28Hiah-ê chhun--lo̍h-lâi ê saⁿ-cha̍p kong-kun ê gûn, Pí-sat-lia̍t ēng lâi chòe thiāu ê kau-á, pau téng-bīn ê thiāu-táu, chòe hoâiⁿ-koaiⁿ.

29Hōe-chiòng hōng-hiàn ê tâng ū nn̄g-chheng sì-pah jī-cha̍p-gō͘ kong-kun.

30In ēng chiah-ê tâng chòe hōe-bō͘ mn̂g-kháu ū sún-khang ê chō, chè-tôaⁿ, chè-tôaⁿ ê tâng-bāng, kap chè-tôaⁿ só͘-ū ê khì-khū,

31í-ki̍p tiâⁿ sì-ûi ê chō kap tiâⁿ ê mn̂g ê chō, hōe-bō͘ kap tiâⁿ sì-ûi lóng-chóng ê khi̍t-á.

← Chapter 37 Jump to: Chapter 39 →