Exodus 27

Chinese TTVR (現代台語譯本羅馬字版)

← Chapter 26 Jump to: Chapter 28 →

1“Lí tio̍h ēng kim-ha̍p-hoan-bo̍k chòe chè-tôaⁿ, tn̂g kap khoah lóng nn̄g kong-chhioh jī-cha̍p kong-hun, sī sù-hong--ê; koân chi̍t kong-chhioh saⁿ-cha̍p kong-hun.

2Tio̍h tī tôaⁿ ê sì kak-thâu chòe sì ki khiàu--khí-lâi ê kak, kap tôaⁿ liân chòe-hé; kui-chō chè-tôaⁿ tio̍h ēng tâng pau--teh.

3Tio̍h chòe siu chè-mi̍h ê hu ê tháng, koh chòe thuh-á, óaⁿ, bah-chhe, hé-tiáⁿ; tôaⁿ ê khì-khū lóng tio̍h ēng tâng chòe.

4Tio̍h ūi chè-tôaⁿ chòe chi̍t ê tâng ê bāng, bāng ê sì kak-thâu chòe sì ê tâng-khoân.

5Bāng an tī chè-tôaⁿ sì-bīn ûi-io-pán ê ē-pòaⁿ-pêng, hō͘ bāng tùi tôaⁿ ê pòaⁿ-io chhun kàu ē-tóe.

6Tio̍h ēng kim-ha̍p-hoan-bo̍k kā chè-tôaⁿ chòe kǹg, ēng tâng pau--teh.

7Kǹg tio̍h chhng tī chè-tôaⁿ siang-pêng ê khoân lāi-bīn, thang kng chè-tôaⁿ.

8Tio̍h ēng pang chòe chè-tôaⁿ, tiong-ng khang-khak, lóng tio̍h chiàu góa tī soaⁿ-téng chí-sī lí ê khoán-sit.”

9“Lí tio̍h ēng so--kè ê iù-môa kā hōe-bō͘ ûi chi̍t ê tiâⁿ; lâm-pêng ê ûi tn̂g sì-cha̍p-sì kong-chhioh.

10Tiâⁿ ê lâm-pêng tio̍h ū jī-cha̍p ki thiāu, jī-cha̍p ê ū sún-khang ê tâng-chō; thiāu ê kau-á kap hoâiⁿ-koaiⁿ lóng tio̍h ēng gûn chòe.

11Tiâⁿ ê pak-pêng mā tio̍h ū ûi, tn̂g sì-cha̍p-sì kong-chhioh, thiāu jī-cha̍p ki, tâng-chō jī-cha̍p ê; thiāu ê kau-á kap hoâiⁿ-koaiⁿ lóng tio̍h ēng gûn chòe.

12Tiâⁿ ê sai-pêng tio̍h ū ûi, khoah jī-cha̍p-jī kong-chhioh, thiāu cha̍p ki, tâng-chō cha̍p ê.

13Tiâⁿ tang-pêng ê ûi khoah jī-cha̍p-jī kong-chhioh;

14ji̍p-kháu ê siang-pêng, ûi ê tn̂g lóng tio̍h la̍k kong-chhioh la̍k-cha̍p kong-hun, tiàu ûi ê thiāu kok saⁿ ki, ū sún-khang ê tâng-chō kok saⁿ ê.

16Tiâⁿ ê ji̍p-kháu tio̍h ū mn̂g-lî, khoah káu kong-chhioh, ēng nâ-sek, chí-sek, chu-âng-sek ê se, kap so--kè ê iù-môa, ēng chhiah-siù ê chhiú-lō͘ siù--ê; thiāu sì ki, chō sì ê.

17Tiâⁿ sì-ûi só͘-ū ê thiāu, lóng tio̍h ēng gûn ê hoâiⁿ-koaiⁿ liân-chiap--khí-lâi; ēng gûn chòe kau-á, ēng tâng chòe chō.

18Tiâⁿ ê tn̂g sì-cha̍p-sì kong-chhioh, khoah jī-cha̍p-jī kong-chhioh, koân nn̄g kong-chhioh jī-cha̍p kong-hun; ûi tio̍h ēng so--kè ê iù-môa chòe, chō lóng tio̍h ēng tâng chòe.

19Hōe-bō͘ kèng-pài ēng ê khì-khū kap só͘-ū ê khi̍t-á, í-ki̍p tiâⁿ só͘-ū ê khi̍t-á, lóng tio̍h ēng tâng chòe.”

20“Lí tio̍h hoan-hù Í-sek-lia̍t -lâng, chiong chiⁿ--chhut-lâi siōng-hó ê kaⁿ-ná-iû the̍h-lâi hō͘ lí, chòe tiám-teng ê lō͘-ēng, hō͘ hōe-bō͘ ê teng put-sî tiám--teh.

21A-lûn kap i ê kiáⁿ tio̍h tī hōe-bō͘ lāi-bīn iok-kūi chêng ê tiùⁿ-lî gōa, tùi ē-hng kàu chá-khí, tī Siōng Chú bīn-chêng chiàu-kò͘ koán-lí teng-hé. Che beh chòe Í-sek-lia̍t -lâng tāi-tāi tio̍h siú ê kui-lē.”

← Chapter 26 Jump to: Chapter 28 →