Exodus 23

Chinese TTVR (現代台語譯本羅馬字版)

← Chapter 22 Jump to: Chapter 24 →

1“M̄-thang sàn-pò͘ iâu-giân; m̄-thang kap pháiⁿ-lâng tàu-khang choh gūi-chèng.

2M̄-thang tè to-sò͘ lâng chòe pháiⁿ; tī sò͘-siōng, m̄-thang phian-óa tōa-pêng, choh-chèng oai-khiok chèng-ti̍t.

3Tī sò͘-siōng, m̄-thang phian-thán sàn-chhiah-lâng.

4“Nā tú-tio̍h lí ê tùi-te̍k ê gû á-sī lû bê-lō͘, it-tēng tio̍h khan tò-lâi kau i.

5Nā khòaⁿ-tio̍h oàn-hūn lí ê lâng ê lû chài siuⁿ tāng tó--lo̍h-khì, m̄-thang kiâⁿ-khui, tio̍h kap i chòe-hé chiong lû chài ê mi̍h-kiāⁿ pàng--lo̍h-lâi.

6“Sàn-chhiah-lâng ê àn-kiāⁿ, lí m̄-thang oai-khiok chèng-gī.

7M̄-thang bû-kò lâng; m̄-thang hāi-sí bô-chōe kap chèng-ti̍t ê lâng; in-ūi góa it-tēng bōe kā pháiⁿ-lâng khòaⁿ-chòe chèng-ti̍t.

8M̄-thang siu hóe-lō͘, in-ūi hóe-lō͘ ōe hō͘ ba̍k-kim ê lâng pìⁿ-chòe chhiⁿ-mî, koh ōe oai-khiok chèng-ti̍t ê lâng ê chèng-sû.

9“M̄-thang ap-chè kià-ku ê lâng; in-ūi lín bat kià-ku tī Ai-ki̍p, liáu-kái chhut-gōa-lâng ê kám-siū.”

10“La̍k nî lāi lí tio̍h keng-choh, tio̍h siu-sêng lông-chok-bu̍t.

11Tē-chhit nî, tio̍h hō͘ thó͘-tōe hioh-khùn bô keng-choh, lí ê jîn-bîn tiong-kan ê sàn-chhiah-lâng thang chia̍h thó͘-tōe chū-jiân chhut-sán ê mi̍h; in chia̍h chhun--ê thang hō͘ iá-siù chia̍h. Lí ê phû-tô-hn̂g kap kaⁿ-ná-hn̂g mā tio̍h án-ni chòe.

12“La̍k ji̍t lāi lí tio̍h chòe kang, tē-chhit ji̍t tio̍h an-hioh, hō͘ gû lû hioh-khùn, hō͘ lô͘-lē kap kià-ku--ê lóng thang hôe-ho̍k goân-khì.

13“Góa bēng-lēng lín--ê, lín tio̍h chun-siú; pa̍t-ê sîn-bêng ê miâ, m̄-thang thê-khí, mā m̄-thang kóng hō͘ lâng thiaⁿ.”

14“Chi̍t nî saⁿ piàn, lí tio̍h siú-choeh ho̍k-sāi góa.

15Tio̍h siú Tû-kàⁿ-choeh, chiàu góa ê bēng-lēng, tī A-pit-ge̍h só͘ chí-tēng ê ji̍t-kî, chia̍h bô-kàⁿ-piáⁿ chhit ji̍t kú, in-ūi lí tī chit kò-ge̍h chhut Ai-ki̍p. Lí m̄-thang khang-chhiú lâi kèng-pài góa.

16“Lí tī hn̂g--ni̍h lô-lo̍k chai-chèng, siu-sêng thâu-chúi thó͘-sán ê sî, tio̍h siú Siu-koah-choeh. “Lí tī chhiu-kùi siu-khǹg tùi hn̂g--ni̍h lô-khó͘ tit--tio̍h ê lông-chok-bu̍t ê sî, tio̍h siú Siu-khǹg-choeh.

17Chi̍t nî saⁿ piàn, só͘-ū ê ta-po͘-lâng tio̍h lâi kèng-pài Chì-koân ê Siōng Chú.

18“Ū-kàⁿ ê piáⁿ bōe-ēng-tit kap seng-lé chòe-hé hiàn; choeh-kî só͘ hiàn seng-lé ê iû bōe-ēng-tit lâu kàu keh-chá-khí.

19“Thó͘-tōe thâu-chúi siōng-hó ê siu-sêng, tio̍h sàng kàu Siōng Chú — lí ê Siōng-tè ê chhù. “M̄-thang ēng soaⁿ-iûⁿ-bú ê lin chú i ê kiáⁿ.”

20“Góa beh chhe-phài sù-chiá tī lō͘--ni̍h pó-hō͘ lín, chhōa lín khì góa ūi-tio̍h lín chún-pī ê tōe.

21Lín tī i ê bīn-chêng tio̍h chhiat-si̍t chun-hêng i ê bēng-lēng; lín nā ûi-pōe i, i bô beh sià-bián lín ê kè-sit; in-ūi i tāi-piáu góa.

22Lín nā chin-chiàⁿ thiaⁿ-thàn i ê ōe, chiàu góa só͘ bēng-lēng lín--ê khì chòe, lín ê tùi-te̍k chiū-sī góa ê tùi-te̍k, góa beh tí-te̍k lín ê te̍k-jîn.

23Góa ê sù-chiá beh kiâⁿ tī lín ê thâu-chêng, chhōa lín khì A-mô͘-lī, Hek, Pí-lī-sé, Ka-lâm, Hi-bī, Iâ-pò͘-su hiah-ê cho̍k ê tōe; góa beh kā in siau-bia̍t.

24Lín m̄-thang kūi-pài ho̍k-sāi in ê sîn-bêng, mā m̄-thang o̍h in ê só͘-chòe; tio̍h kā hiah-ê sîn-siōng choân-pō͘ húi-hoāi, phah-chhùi tiau-khek ê thiāu-siōng.

25Lín tio̍h ho̍k-sāi Siōng Chú — lín ê Siōng-tè; góa it-tēng beh chiong bí-niû kap chúi siúⁿ-sù lín, koh hō͘ só͘-ū ê pīⁿ lóng lī-khui lín.

26Góa mā beh hō͘ lín kéng-lāi ê hū-jîn-lâng lóng ōe seng-io̍k, bōe liû-sán, hō͘ lín chia̍h tn̂g-hè-siū.

27“Góa beh tī lín ê thâu-chêng hián-chhut ui-giâm; lín bô-lūn khì tó-ūi, góa beh hō͘ hiah-ê jîn-bîn lóng kiaⁿ-hiâⁿ, hō͘ lín ê tùi-te̍k oa̍t-tńg-sin tô-cháu.

28Góa beh kàng un-e̍k tī in tiong-kan, kā Hi-bī -lâng, Ka-lâm -lâng, Hek -lâng lóng kóaⁿ-cháu.

29M̄-kú góa bōe tī chi̍t nî lāi chiong in choân-pō͘ kóaⁿ--chhut-khì, chiah bián thó͘-tōe hong-hòe, iá-siù cheng-ka soah siong-hāi lín.

30Góa beh ūi-tio̍h lín chiām-chiām chiong in kóaⁿ-cháu, thèng-hāu lín jîn-kháu cheng-ka, kàu ōe-tàng sêng-chiap hit-ê tōe chòe sán-gia̍p.

31Góa beh kā lín tēng kok-kài, tùi Âng-hái kàu Iù-hoat-la-tí-hô, tùi khòng-iá kàu Tōe-tiong-hái; góa beh chiong hit-ê tōe khiā-khí ê jîn-bîn kau tī lín ê chhiú, hō͘ lín chiong in lóng kóaⁿ--chhut-khì.

32M̄-thang kap hia ê lâng í-ki̍p in ê sîn-bêng li̍p-iok.

33M̄-thang hō͘ in tòa tī lín ê tōe, chiah bián in ín-iú lín tek-chōe góa; lín nā ho̍k-sāi in ê sîn-bêng, che beh chiâⁿ-chòe hāi lín ê lô-bāng.”

← Chapter 22 Jump to: Chapter 24 →