Exodus 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Āu-lâi, Mô͘-se kap A-lûn khì kìⁿ Ai-ki̍p -ông, tùi i kóng, “Siōng Chú — Í-sek-lia̍t ê Siōng-tè án-ni kóng, ‘Tio̍h hō͘ góa ê chú-bîn khì khòng-iá siú-choeh kèng-pài góa.’”

2Ai-ki̍p -ông kóng, “Siōng Chú sī siáⁿ-lâng? Góa ná tio̍h thiaⁿ I ê ōe, hō͘ Í-sek-lia̍t -lâng lī-khui? Góa m̄ bat I, mā put-chún Í-sek-lia̍t -lâng lī-khui.”

3Mô͘-se kap A-lûn kóng, “ Hi-pek-lâi -lâng ê Siōng-tè tùi goán hián-hiān; chhiáⁿ hō͘ goán kiâⁿ saⁿ ji̍t ê lō͘-thêng khì khòng-iá, ǹg Siōng Chú — goán ê Siōng-tè hiàn-chè, chiah bián I ēng un-e̍k kap to-kiàm siong-hāi goán.”

4Ai-ki̍p -ông kā in kóng, “ Mô͘-se, A-lûn, lín sī-án-chóaⁿ kiò chit-ê peh-sìⁿ mài choh-kang? Tńg-khì choh-kang!”

5Ai-ki̍p -ông koh kóng, “Hiān-chāi, chit-ê bîn-cho̍k lâng chiah chōe, lín kèng-jiân kiò in thêng-kang.”

6Hit-ji̍t, Ai-ki̍p -ông bēng-lēng Ai-ki̍p ê tok-kang kap Í-sek-lia̍t ê kang-thâu, kóng,

7“Lín mài koh chhin-chhiūⁿ í-chêng khoán be̍h-kó hō͘ chit-ê peh-sìⁿ chòe chng-á; be̍h-kó, hō͘ in ka-kī khì khioh.

8Tio̍h iau-kiû in chòe kap í-chêng kâng-khoán sò͘-bo̍k ê chng-á, liân chi̍t tè to bōe-kiám--tit. In pîn-tōaⁿ, só͘-í tōa-siaⁿ iau-kiû beh chhut-khì ǹg in ê Siōng-tè hiàn-chè.

9Tio̍h hō͘ chiah-ê lâng chòe khah tāng ê kang-chok, hō͘ in thiám kah bōe khì thiaⁿ lâng sái-lōng.”

10Ai-ki̍p ê tok-kang kap Í-sek-lia̍t ê kang-thâu tùi jîn-bîn soan-pò͘, “ Ai-ki̍p -ông án-ni kóng, ‘Góa bô beh koh be̍h-kó hō͘ lín.

11Lín ka-kī khì chhē, ka-kī khì khioh, m̄-kú lín kau--chhut-lâi ê chng-á bōe-ēng-tit kiám-chió.’”

12Í-sek-lia̍t -lâng chiū sì-sòaⁿ khì Ai-ki̍p choân-tōe, khioh be̍h-châng ê thâu tāi-thòe be̍h-kó.

13Tok-kang ap-pek in, kóng, “Lín ta̍k-ji̍t kau--chhut-lâi ê chng-á ê sò͘-bo̍k, tio̍h kap ū hō͘ lín be̍h-kó ê sî siâng-khoán.”

14Ai-ki̍p -ông ê tok-kang phah in phài-khì koán-lí Í-sek-lia̍t -lâng ê kang-thâu, kóng, “Chit kúi ji̍t lín ná bô chiàu í-chêng kui-tēng ê sò͘-bo̍k kau chng-á?”

15Í-sek-lia̍t ê kang-thâu chiū lâi kā Ai-ki̍p -ông ai-kiû, kóng, “Lí sī-án-chóaⁿ án-ni tùi-thāi goán?

16Tok-kang bô be̍h-kó hō͘ goán, koh iau-kiû goán tio̍h kau siâng-khoán sò͘-bo̍k ê chng-á. Goán hō͘ lâng phah, lóng sī lín Ai-ki̍p -lâng ê m̄-tio̍h.”

17Ông kóng, “Lín si̍t-chāi pîn-tōaⁿ, ū-kàu pîn-tōaⁿ, chiah iau-kiû beh khì kā Siōng Chú hiàn-chè.

18Hiān-chāi, lín tio̍h tńg-khì choh-kang; be̍h-kó m̄ hō͘ lín, chng-á ê sò͘-liōng bōe-ēng-tit kiám.”

19Í-sek-lia̍t -lâng ê kang-thâu thiaⁿ-tio̍h ta̍k-ji̍t kau chng-á ê sò͘-liōng bōe-kiám--tit, chiū chai-iáⁿ chhám ah.

20In tùi Ai-ki̍p -ông hia chhut--lâi ê sî, tú-tio̍h Mô͘-se kap A-lûn teh tán in. In chiū kā Mô͘-se kap A-lûn kóng,

21“Goān Siōng Chú kàm-chhat, kā lín hêng-hoa̍t, in-ūi lín hāi goán hō͘ Ai-ki̍p -ông kap i ê jîn-sîn oàn-chhoeh, hō͘ in ū lí-iû thâi goán.”

22Mô͘-se tò-tńg-khì Siōng Chú hia, kóng, “Chú ah, lí sī-án-chóaⁿ pháiⁿ khoán-thāi chit-ê bîn-cho̍k? Sī-án-chóaⁿ phài góa?

23Tùi góa tē-it piàn khì kìⁿ Ai-ki̍p -ông, hōng lí ê miâ tùi i kóng-ōe khai-sí, i chiū ap-pek chit-ê bîn-cho̍k; lí chi̍t-sut-á to bô kiù lí ê chú-bîn.”

← Chapter 4 Jump to: Chapter 6 →