Exodus 28

Chinese TTVR (現代台語譯本羅馬字版)

← Chapter 27 Jump to: Chapter 29 →

1“Lí tio̍h tùi Í-sek-lia̍t -lâng ê tiong-kan, kiò lí ê hiaⁿ-ko A-lûn kap i ê kiáⁿ Ná-tap, A-pí-hō͘, Í-lī-a-sat, Í-tha-má lâi lí chia, chòe chè-si ho̍k-sāi góa.

2Lí tio̍h kā lí ê hiaⁿ-ko A-lûn chòe sèng ê lé-ho̍k, hō͘ i ū êng-kng kap ui-giâm.

3Hiah-ê tit-tio̍h góa tì-hūi ê sîn chhiong-móa ê gâu ê sai-hū, lí tio̍h hoan-hù in kā A-lûn chòe lé-ho̍k, hō͘ i hun-pia̍t-choh-sèng chòe chè-si ho̍k-sāi góa.

4Chiah-ê lé-ho̍k pau-koat heng-tē, í-hut-tek, gōa-phàu, kè-siù ê lāi-phàu, lé-bō, kap io-tòa. In tio̍h kā lí ê hiaⁿ-ko A-lûn kap i ê kiáⁿ chòe sèng ê lé-ho̍k, hō͘ in chòe chè-si ho̍k-sāi góa.

5Lé-ho̍k tio̍h ēng kim-sòaⁿ, kap nâ-sek, chí-sek, chu-âng-sek ê se, í-ki̍p iù-môa chòe.

6“In tio̍h ēng kim-sòaⁿ, kap nâ-sek, chí-sek, chu-âng-sek ê se, í-ki̍p so--kè ê iù-môa, ēng kî-khá ê chhiú-lō͘ chòe í-hut-tek.

7Tio̍h chòe nn̄g tiâu keng-tòa liân tī í-hut-tek.

8Í-hut-tek ê io-tòa tio̍h kap í-hut-tek kâng-khoán ēng kî-khá ê chhiú-lō͘, ēng kim-sòaⁿ kap nâ-sek, chí-sek, chu-âng-sek ê se, í-ki̍p so--kè ê iù-môa chit--khí-lâi, hō͘ i kap í-hut-tek liân-chòe chi̍t ê.

9Tio̍h the̍h nn̄g tè âng-bé-ló, khek Ngá-kok cha̍p-jī ê kiáⁿ ê miâ;

10chiàu in chhut-sì ê sūn-sū, la̍k ê khek tī chi̍t tè, la̍k ê khek tī lēng-gōa chi̍t tè.

11Tio̍h ēng khek ìn-á ê chhiú-lō͘, chiong Ngá-kok ê kiáⁿ ê miâ khek tī pó-chio̍h, siuⁿ tī kim-kheng--ni̍h.

12Tio̍h chiong chit nn̄g tè pó-chio̍h an tī í-hut-tek ê keng-tòa, chòe Í-sek-lia̍t cha̍p-jī chi-cho̍k ê kì-liām-chio̍h. A-lûn tio̍h tī nn̄g ê keng-thâu phāiⁿ in ê miâ, chiong in tòa-lâi Siōng Chú bīn-chêng, hō͘ Siōng Chú ōe-kì--tit.

13Tio̍h ēng kim chòe nn̄g ê kheng,

14koh ēng sûn-kim phah nn̄g tiâu liān-á, chhin-chhiūⁿ ká soh-á, jiân-āu an tī kim-kheng.”

15“Lí tio̍h chòe chi̍t ê phòaⁿ-toàn ê heng-tē, ēng kap chòe í-hut-tek kâng-khoán kî-khá ê chhiú-lō͘, ēng kim-sòaⁿ kap nâ-sek, chí-sek, chu-âng-sek ê se, í-ki̍p so--kè ê iù-môa chòe.

16Heng-tē tio̍h sù-hong--ê, áu siang-têng; tn̂g khoah lóng jī-cha̍p-jī kong-hun.

17Lí tio̍h tī heng-tē téng-bīn siuⁿ sì chōa pó-chio̍h; tē-it chōa sī âng-pó-chio̍h, n̂g-ge̍k, chhiah-ge̍k;

18tē-jī chōa sī le̍k-pó-chio̍h, nâ-pó-chio̍h, kim-kong-chio̍h;

19tē-saⁿ chōa sī chí-bé-ló, pe̍h-bé-ló, chí-sek ê chúi-chiⁿ;

20tē-sì chōa sī chhiⁿ-ge̍k, âng-bé-ló, phek-ge̍k; chiah-ê lóng tio̍h siuⁿ tī kim-kheng.

21Chiah-ê pó-chio̍h chiàu Ngá-kok ê kiáⁿ ê miâ, kiōng cha̍p-jī tè, ēng khek ìn-á ê chhiú-lō͘, ta̍k-tè khek chi̍t ê miâ, tāi-piáu cha̍p-jī chi-cho̍k.

22Koh ēng sûn-kim chhin-chhiūⁿ ká soh-á án-ni phah nn̄g tiâu liān-á, an tī heng-tē.

23Heng-tē ê siang-thâu tio̍h chòe nn̄g ê kim-khoân,

24chiong hit nn̄g tiâu kim-liān-á liân tī heng-tē siang-thâu nn̄g ê khoân,

25koh ēng nn̄g tiâu liān-á ê siang-thâu liân tī nn̄g ê kheng, an tī í-hut-tek keng-tòa ê thâu-chêng.

26Lí tio̍h chòe nn̄g ê kim-khoân, an tī heng-tē siang-thâu ê kîⁿ, kūn í-hut-tek ǹg lāi-bīn hit-pêng.

27Koh tio̍h chòe nn̄g ê kim-khoân, an tī í-hut-tek thâu-chêng ê keng-tòa ē-bīn, óa-kūn saⁿ-liân ê só͘-chāi, ēng kî-khá ê chhiú-lō͘ chit ê í-hut-tek ê tòa téng-bīn.

28In tio̍h ēng nâ-sek ê iù-tòa, chiong heng-tē ê khoân kap í-hut-tek ê khoân pa̍k chòe-hé, tah tī ēng kî-khá ê chhiú-lō͘ chit ê í-hut-tek ê tòa, chiong heng-tē kap í-hut-tek kò͘-tēng--teh.

29“ A-lûn ji̍p sèng-só͘ ê sî, tio̍h chiong ū khek Ngá-kok ê kiáⁿ ê miâ hit-ê phòaⁿ-toàn ê heng-tē kòa tī heng-chêng, tòa-lâi Siōng Chú ê bīn-chêng, hō͘ Siōng Chú ōe-kì--tit.

30Lí tio̍h chiong O͘-lêng kap Thó͘-bêng, hē tī phòaⁿ-toàn ê heng-tē lāi-bīn. A-lûn kàu Siōng Chú bīn-chêng ê sî, tio̍h chiong chiah-ê hē tī i ê heng-chêng. Án-ni, A-lûn siông-siông tī Siōng Chú ê bīn-chêng ūi Í-sek-lia̍t -lâng chòe phòaⁿ-toàn.”

31“Lí tio̍h chòe chhēng tī í-hut-tek lāi-bīn ê gōa-phàu, kui-niá sī nâ-sek--ê.

32Phàu téng-bīn ê tùi-tiong, tio̍h ūi-tio̍h thâu-khak lâu chi̍t ê khang, niá-iân tio̍h chit hō͘ ióng, chhin-chhiūⁿ chiàn-kah ê niá-khang, chiah bián phòa-li̍h.

33Phàu ê ē-kha-pô͘ tio̍h ēng nâ-sek, chí-sek, chu-âng-sek ê se chòe sia̍h-liû. Tio̍h chòe kim ê giang-lêng-á hē tī sia̍h-liû kap sia̍h-liû ê tiong-kan;

34phàu kui-ê ē-kha-pô͘, chi̍t ê giang-lêng-á chi̍t lia̍p sia̍h-liû, chi̍t ê giang-lêng-á chi̍t lia̍p sia̍h-liû.

35A-lûn ho̍k-sāi ê sî, tio̍h chhēng gōa-phàu. I ji̍p sèng-só͘ kàu Siōng Chú bīn-chêng, í-ki̍p chhut--lâi ê sî, tio̍h ōe-tàng hō͘ lâng thiaⁿ-tio̍h giang-lêng-á ê siaⁿ, chiah bián siū thâi-sí.

36“Tio̍h ēng sûn-kim chòe chi̍t tè pâi, ēng khek ìn-á ê chhiú-lō͘ khek ‘Sèng-hòa kui Siōng Chú’.

37Tio̍h ēng chi̍t tiâu nâ-sek ê tòa, chiong hit-tè pâi pa̍k tī lé-bō ê thâu-chêng.

38Chit-tè pâi tio̍h siông-siông tī A-lûn ê thâu-hia̍h, hō͘ A-lûn tam-tng Í-sek-lia̍t -lâng hōng-hiàn sèng ê lé-mi̍h ê sî só͘ hoān ê chōe, hō͘ hiah-ê chè-mi̍h tit-tio̍h Siōng Chú ê chiap-la̍p.

39“Tio̍h ēng iù-môa chit lāi-phàu, ēng iù-môa-pò͘ chòe lé-bō, ēng chhiah-siù ê chhiú-lō͘ chòe io-tòa.

40“Lí tio̍h ūi A-lûn ê kiáⁿ chòe lāi-phàu, io-tòa, kap thâu-kun, hō͘ in ū êng-kng kap ui-giâm.

41Chiah-ê tio̍h hō͘ lí ê hiaⁿ-ko A-lûn kap i ê kiáⁿ chhēng, kā in boah-iû, siū-chit, kā in hun-pia̍t-choh-sèng, hō͘ in chòe chè-si ho̍k-sāi góa.

42Tio̍h ēng iù-môa-pò͘ kā in chòe lé-khò͘, tùi io kàu tōa-thúi, jia in ê hā-thé.

43A-lûn kap i ê kiáⁿ ji̍p hōe-bō͘, á-sī lâi sèng-só͘ óa-kūn chè-tôaⁿ ho̍k-sāi ê sî, tio̍h chhēng lé-khò͘, chiah bián in siū hêng-hoa̍t lâi sí. Che beh chòe A-lûn kap i ê hō͘-tāi éng-oán ê kui-lē.”

← Chapter 27 Jump to: Chapter 29 →