Exodus 16

Chinese TTVR (現代台語譯本羅馬字版)

← Chapter 15 Jump to: Chapter 17 →

1Í-sek-lia̍t -lâng choân-thé hōe-chiòng tùi Í-lîm chhut-hoat, tī lī-khui Ai-ki̍p liáu-āu tē-jī kò-ge̍h ê cha̍p-gō͘ ji̍t, lâi kàu Í-lîm kap Se-nāi tiong-kan ê Sìn ê khòng-iá.

2In tī hia bâi-oàn Mô͘-se, A-lûn.

3Í-sek-lia̍t -lâng kā in kóng, “Goán lêng-khó tī Ai-ki̍p -tōe sí tī Siōng Chú ê chhiú-thâu. Hit-sî, goán ū kui-tiáⁿ ê bah, ū piáⁿ thang chia̍h kàu pá. Lín kā goán chhōa-lâi kàu chit-ê khòng-iá, sī beh hō͘ goán só͘-ū ê hōe-chiòng lóng gō-sí sī--bô!”

4Siōng Chú tùi Mô͘-se kóng, “Góa beh tùi thiⁿ lo̍h bí-niû hō͘ lín. In ta̍k-ê lâng ta̍k-ji̍t tio̍h chhut-khì khioh hit chi̍t ji̍t ê hūn; góa beh án-ni chhì-giām in, khòaⁿ in ū beh chun-hêng góa ê bēng-lēng á bô.

5Kàu tē-la̍k ji̍t, in tio̍h chún-pī nn̄g ji̍t ê chia̍h-mi̍h, khioh pêng-sî ê têng-pē.”

6Mô͘-se, A-lûn tùi Í-sek-lia̍t chèng-lâng kóng, “Kim-mî lín chiū ōe chai, chhōa lín chhut Ai-ki̍p -tōe--ê sī Siōng Chú.

7Bîn-á-chá-khí lín ōe khòaⁿ-kìⁿ Siōng Chú ê êng-iāu, in-ūi Siōng Chú ū thiaⁿ-tio̍h lín tùi I ê oàn-giân. Goán sǹg sím-mi̍h, lín kèng-jiân bâi-oàn goán!”

8Mô͘-se koh kóng, “Siōng Chú ōe hō͘ lín àm-sî ū bah thang chia̍h, chá-khí-sî ū bí-niû thang chia̍h kàu pá; in-ūi lín tùi Siōng Chú ê oàn-giân, I lóng ū thiaⁿ--tio̍h. Goán sǹg siáⁿ; lín m̄-sī bâi-oàn goán, sī teh bâi-oàn Siōng Chú.”

9Mô͘-se kā A-lûn kóng, “Lí tio̍h kiò Í-sek-lia̍t -lâng choân-thé hōe-chiòng lâi kàu Siōng Chú ê bīn-chêng, in-ūi I í-keng thiaⁿ-tio̍h lín ê oàn-giân.”

10A-lûn tú-teh tùi Í-sek-lia̍t -lâng choân-thé hōe-chiòng kóng-ōe ê sî, in khòaⁿ-kìⁿ khòng-iá ū Siōng Chú ê êng-kng tī hûn-tiong hián-hiān.

11Siōng Chú tùi Mô͘-se kóng,

12“Góa í-keng thiaⁿ-kìⁿ Í-sek-lia̍t -lâng ê oàn-giân; lí tio̍h kā in kóng, ‘Kàu hông-hun, lín beh ū bah thang chia̍h, chá-khí-sî ū bí-niû thang chia̍h kàu pá, án-ni lín chiū chai góa sī Siōng Chú — lín ê Siōng-tè.’”

13Àm-thâu-á, ū ian-chhun pe--lâi, khàm-móa kui-ê iâⁿ-tōe; thàu-chá, iâⁿ-tōe sì-ûi ū chi̍t têng lō͘-chúi.

14Lō͘-chúi ta--khì, in khòaⁿ-tio̍h khòng-iá ê tōe-bīn ū sòe-sòe îⁿ-îⁿ ê mi̍h, iù-iù chhin-chhiūⁿ sng.

15Í-sek-lia̍t -lâng khòaⁿ--tio̍h, m̄ chai sī sím-mi̍h, hō͘-siōng kóng-lâi-kóng-khì, “Che sī sím-mi̍h?” Mô͘-se kā in kóng, “Che chiū-sī Siōng Chú hō͘ lín chia̍h ê bí-niû.

16Siōng Chú án-ni hoan-hù: Lín tio̍h khioh ta̍k-ê lâng ōe-tàng chia̍h ê hūn-liōng, chi̍t ê lâng nn̄g kong-seng, chiàu ke-lāi ê jîn-sò͘ khì khioh.”

17Í-sek-lia̍t -lâng chiàu án-ni khì chòe, ū-ê khioh chōe, ū-ê khioh chió.

18Kàu ēng khì-khū niû ê sî, khioh chōe--ê bô chhun, khioh chió--ê mā bô khiàm; ta̍k-ê lâng lóng chiàu in chia̍h ê hūn-liōng khì khioh.

19Mô͘-se kā in kóng, “M̄-thang chiong chhun--ê lâu kàu keh-chá-khí.”

20M̄-kú ū lâng m̄ thiaⁿ Mô͘-se ê ōe, chiong chhun--ê lâu kàu keh-chá-khí, chiū siⁿ-thâng chhàu--khì; Mô͘-se chiū tùi in hoat siū-khì.

21In ta̍k chá-khí chiàu ta̍k-ê lâng chia̍h ê hūn-liōng khì khioh; ji̍t-thâu chi̍t-ē chhut, hiah-ê niû-si̍t chiū iûⁿ--khì.

22Kàu tē-la̍k ji̍t, in khioh têng-pē ê hūn, ta̍k-ê lâng sì kong-seng; choân hōe-chiòng ê léng-siù chiong chit-hāng sū kā Mô͘-se pò-kò.

23Mô͘-se kā in kóng, “Siōng Chú án-ni kóng, ‘Bîn-á-chài sī an-hioh ê ji̍t-chí, sī Siōng Chú sèng ê An-hioh-ji̍t; lín ài hang--ê kin-á-ji̍t chiū seng hang--khí-lâi, ài chú--ê chiū kin-á-ji̍t chú--khí-lâi; chhun--ê, tio̍h siu--teh, lâu kàu keh-chá-khí.’”

24In chiū chiàu Mô͘-se ê hoan-hù kā chhun ê chia̍h-mi̍h lâu kàu keh-chá-khí; chiah-ê chia̍h-mi̍h bô chhàu--khì, mā bô siⁿ-thâng.

25Mô͘-se koh kóng, “Lín kin-á-ji̍t chiū chia̍h chiah-ê, in-ūi kin-á-ji̍t sī Siōng Chú ê An-hioh-ji̍t; kin-á-ji̍t lín tī iá-tōe chhē bô bí-niû.

26La̍k ji̍t, lín thang khì khioh, tē-chhit ji̍t sī An-hioh-ji̍t, chit-ji̍t lín bô chia̍h-mi̍h thang khioh.”

27Tē-chhit ji̍t, ū lâng chhut-khì khioh, chhē lóng bô.

28Siōng Chú tùi Mô͘-se kóng, “Lín m̄-khéng chun-siú góa ê bēng-lēng kap kà-sī, beh kàu tī-sî?

29Lín tio̍h chai, Siōng Chú í-keng chiong An-hioh-ji̍t sù hō͘ lín, só͘-í tē-la̍k ji̍t I hō͘ lín nn̄g ji̍t ê bí-niû, tē-chhit ji̍t ta̍k-ê lâng tio̍h tiàm tī ka-kī ê só͘-chāi, m̄-thang chhut--khì.”

30Jîn-bîn chiū tī tē-chhit ji̍t an-hioh.

31Í-sek-lia̍t -lâng chiong chit-ê mi̍h kiò-chòe má-ná; i chhin-chhiūⁿ iân-sui ê chí, sek-tì sī pe̍h--ê, chu-bī chhin-chhiūⁿ chham-bi̍t ê po̍h-piáⁿ.

32Mô͘-se kóng, “Siōng Chú án-ni hoan-hù, ‘Tio̍h tóe nn̄g kong-seng tīⁿ-tīⁿ ê má-ná, lâu hō͘ lín ê hō͘-tāi. Hō͘ in khòaⁿ góa chhōa lín chhut Ai-ki̍p ê sî tī khòng-iá hō͘ lín chia̍h ê bí-niû.’”

33Mô͘-se kā A-lûn kóng, “Lí the̍h chi̍t ê àng-á, tóe nn̄g kong-seng tīⁿ-tīⁿ ê má-ná, khǹg tī Siōng Chú ê bīn-chêng, lâu hō͘ lán ê hō͘-tāi.”

34A-lûn chiàu Siōng Chú hoan-hù Mô͘-se ê ōe, chiong má-ná lâu-teh chòe kiàn-chèng.

35Í-sek-lia̍t -lâng chia̍h má-ná lóng-chóng sì-cha̍p nî kú, it-ti̍t kàu in lâi tī ū lâng tòa ê só͘-chāi. In chia̍h má-ná, ti̍t-kàu in lâi kàu Ka-lâm -tōe ê pian-kài.

36Tng-sî niû mi̍h-kiāⁿ phiau-chún ê tan-ūi sī jī-cha̍p kong-seng.

← Chapter 15 Jump to: Chapter 17 →