Exodus 21

Chinese TTVR (現代台語譯本羅馬字版)

← Chapter 20 Jump to: Chapter 22 →

1Siōng Chú tùi Mô͘-se kóng, “Lí tio̍h ūi jîn-bîn tēng chiah-ê kui-lē:

2“Lí nā bóe Hi-pek-lâi -lâng chòe lô͘-lē, i thang ho̍k-sāi lí la̍k nî kú, tē-chhit nî i ōe-tàng bián hù sio̍k-kim chū-iû lī-khui.

3I nā toaⁿ-sin lâi, chiū toaⁿ-sin lī-khui; i nā ū chhōa bó͘ lâi, i ê bó͘ chiū kap i chòe-hé lī-khui.

4I ê chú-lâng nā kā i chhōa-bó͘, bó͘ kā i siⁿ-kiáⁿ á-sī cha-bó͘-kiáⁿ, bó͘ kap kiáⁿ-jî tio̍h kui chú-lâng; i tio̍h toaⁿ-sin chhut--khì.

5Lô͘-lē nā bêng-bêng kóng, ‘Góa thiàⁿ góa ê chú-lâng, góa ê bó͘, kap góa ê kiáⁿ-jî, bô ài chhut-khì chòe chū-iû-jîn.’

6I ê chú-lâng chiū tio̍h chhōa i khì sím-phòaⁿ-koaⁿ hia, hō͘ i óa mn̂g á-sī mn̂g-khiā, ēng chǹg-á chǹg i ê hī-á; i chiū éng-oán ho̍k-sāi chú-lâng.

7“Nā ū lâng bōe cha-bó͘-kiáⁿ chòe lô͘-lē, cha-bó͘ gín-á sio̍k-sin ê tiâu-lē kap ta-po͘ lô͘-lē bô siâng.

8Chú-lâng nā chhōa i, āu-lâi bô kah-ì, tio̍h chún i sio̍k-sin; chú-lâng kì-jiân bô siú sìn-iōng, chiū bô koân chiong i bōe hō͘ gōa-cho̍k-lâng.

9Chú-lâng nā kā i chhōa-lâi chòe sin-pū, chiū tio̍h kā i tòng-chòe cha-bó͘-kiáⁿ khoán-thāi.

10Chú-lâng ê kiáⁿ nā koh chhōa, hit-ê lú lô͘-lē ê chia̍h, chhēng, kap choh-bó͘ ê koân-lī, iû-goân bōe-ēng-tit kiám-chió.

11Nā bô tùi i chīn chit saⁿ hāng gī-bū, i chiū thang bián hù sio̍k-kim chū-iû lī-khui.”

12“Phah-sí lâng--ê, it-tēng tio̍h hō͘ i sí.

13Nā m̄-sī kò͘-ì thâi-lâng, sī Siōng-tè iông-ún chit-kiāⁿ sū hoat-seng, góa chiū kā lín siat chi̍t ê só͘-chāi, hō͘ hit-ê lâng thang cháu-khì hia.

14Lâng nā ok-ì ēng kè-bô͘ hāi-sí lâng, chiū-sī cháu-khì kàu góa ê chè-tôaⁿ hia, mā tio̍h kā i lia̍h khí-lâi chhú-sí.

15“Phah pē-bú--ê, it-tēng tio̍h hō͘ i sí.

16“Koái-iú lâng--ê, bô-lūn kā bōe--khì, á-sī iáu tī i ê chhiú, it-tēng tio̍h hō͘ i sí.

17“Chiù-chó͘ pē-bú--ê, it-tēng tio̍h hō͘ i sí.

18“Lâng nā oan-ke, chit-ê ēng chio̍h-thâu á-sī kûn-thâu-bú phah hit-ê, bô kā phah-sí, m̄-kú hō͘ i siū-siong tó tī bîn-chhn̂g;

19nā hit-ê lâng ōe koh khí--lâi, gia̍h koáiⁿ-á kiâⁿ-lō͘, chit-ê phah i--ê, thang sǹg bô-chōe; m̄-kú tio̍h pê-siông i bōe-tàng chòe kang ê sún-sit, mā tio̍h hū-chek kā i i kàu hó.

20“Lâng nā ēng kùn kòng i ê lô͘-lē, lô͘-lē bô-lūn sī lâm--ê á-sī lú--ê, nā liâm-piⁿ sí, chú-lâng it-tēng tio̍h siū hêng-hoa̍t;

21nā kè chi̍t nn̄g ji̍t chiah sí, i chiū bián siū hêng-hoa̍t, in-ūi lô͘-lē sī i ê châi-sán.

22“Lâng nā sio-phah, siong-hāi ū-sin ê hū-jîn-lâng, tì-kàu liû-sán, m̄-kú bô pa̍t-hāng ê siong-hāi, hit-ê lâng tio̍h chiàu hū-jîn-lâng ê tiōng-hu ê iau-kiû, keng-kè sím-phòaⁿ-koaⁿ ê chhâi-koat, pê-siông.

23Nā ū kî-tha ê siong-hāi, hit-ê lâng tio̍h ēng miā pê miā,

24ba̍k-chiu pê ba̍k-chiu, chhùi-khí pê chhùi-khí, chhiú pê chhiú, kha pê kha,

25sio-siong pê sio-siong, siong-hāi pê siong-hāi, phah-siong pê phah-siong.

26“Lâng nā kā i ê lô͘-lē phah-pháiⁿ chi̍t lúi ba̍k-chiu, lô͘-lē bô-lūn sī lâm--ê á-sī lú--ê, chú-lâng tio̍h in-ūi hit-lúi ba̍k-chiu pàng i chū-iû.

27Nā kā lô͘-lē phah-tn̄g chi̍t ki chhùi-khí, lô͘-lē bô-lūn sī lâm--ê á-sī lú--ê, chú-lâng tio̍h in-ūi hit-ki chhùi-khí pàng i chū-iû.”

28“Gû nā tak-sí ta-po͘-lâng á-sī hū-jîn-lâng, tio̍h ēng chio̍h-thâu kā hit-chiah gû tìm-sí, m̄-kú m̄-thang chia̍h i ê bah; gû ê chú-lâng sǹg bô chōe.

29Hit-chiah gû nā pêng-sî chiū ōe tak--lâng, ū lâng kā gû ê chú-lâng kéng-kò, chú-lâng kèng-jiân bô kā gû pa̍k hó-sè, soah hō͘ hit-chiah gû tak-sí lâng, chiū tio̍h ēng chio̍h-thâu tìm-sí hit-chiah gû; gû ê chú-lâng mā tio̍h sí.

30Nā-sī chhâi-koat ōe-tàng ēng gûn sio̍k-hôe hit-ê chú-lâng ê sìⁿ-miā, i tio̍h chiàu só͘ chhâi-koat ê chîⁿ-gia̍h kiáu-la̍p.

31Gû bô-lūn tak-tio̍h lâng ê kiáⁿ á-sī cha-bó͘-kiáⁿ, tio̍h chiàu chit-ê kui-lē pān-lí.

32Gû nā tak-tio̍h lô͘-lē, bô-lūn sī lâm--ê á-sī lú--ê, gû ê chú-lâng tio̍h ēng saⁿ-pah sì-cha̍p kong-khek ê gûn hō͘ lô͘-lē ê chú-lâng; gû mā tio̍h ēng chio̍h-thâu tìm-sí.

33“Lâng nā sóa-khui chíⁿ-kòa, á-sī khui-chíⁿ bô khàm-kòa, soah hāi gû á-sī lû-á poa̍h-lo̍h hit lāi-bīn,

34chíⁿ ê chú-lâng tio̍h ēng gûn pê-siông cheng-siⁿ ê chú-lâng; sí ê cheng-siⁿ kui chíⁿ ê chú-lâng.

35“Lâng ê gû nā tak-sí pa̍t-lâng ê gû, oa̍h ê gû tio̍h bōe-tiāu, bōe ê kè-chîⁿ kap sí ê gû lóng tio̍h tùi-pòaⁿ pun.

36Chú-lâng nā chai i ê gû pêng-sî ōe tak--lâng, kèng-jiân bô kā gû pa̍k hó-sè, i chiū tio̍h ēng gû pê gû; sí ê gû kui i ka-kī.”

← Chapter 20 Jump to: Chapter 22 →