Exodus 33

Chinese TTVR (現代台語譯本羅馬字版)

← Chapter 32 Jump to: Chapter 34 →

1Siōng Chú tùi Mô͘-se kóng, “Lí kap lí tùi Ai-ki̍p chhōa--chhut-lâi ê jîn-bîn, tio̍h tùi chia chhut-hoat khì hit-ê góa tùi A-pek-la-hán, Í-sat, Ngá-kok li̍p-sè, èng-ún beh siúⁿ-sù in ê hō͘-tāi ê thó͘-tōe.

2Góa beh chhe sù-chiá tī lí ê thâu-chêng, beh chiong Ka-lâm, A-mô͘-lī, Hek, Pí-lī-sé, Hi-bī, Iâ-pò͘-su hiah-ê cho̍k kóaⁿ--chhut-khì.

3Lín tio̍h chìn-ji̍p hit-ê lâu lin kap bi̍t ê tōe, m̄-kú góa bô beh chhin-sin kap lín chòe-hé khì, in-ūi lín sī sim-ngī kò͘-chip ê bîn-cho̍k, chiah bián góa tī lō͘--ni̍h kā lín siau-bia̍t.”

4Jîn-bîn thiaⁿ-tio̍h chit-ê pháiⁿ siau-sit, chiū hui-siông siong-sim, bô lâng chng-thāⁿ táⁿ-pān.

5Siōng Chú tùi Mô͘-se kóng, “Lí tio̍h kā Í-sek-lia̍t -lâng kóng, ‘Lín sī sim-ngī kò͘-chip ê bîn-cho̍k. Góa nā kap lín chòe-hé, chiū-sī chi̍t-sî-á-kú, it-tēng ōe kā lín siau-bia̍t. Taⁿ, lín tio̍h chiong seng-khu ê chong-sek-phín pak--lo̍h-lâi, góa ōe koat-tēng beh án-chóaⁿ tùi-thāi lín.’”

6Í-sek-lia̍t -lâng tùi lī-khui Hô-lia̍t-soaⁿ í-āu, chiū chiong seng-khu ê chong-sek-phín lóng pak--lo̍h-lâi.

7Mô͘-se tī iâⁿ-gōa ū hiah--hn̄g-ah ê só͘-chāi tah chi̍t ê pò͘-pîⁿ. I kā chit-ê pò͘-pîⁿ kiò-chòe hōe-bō͘; só͘-ū chhē-kiû Siōng Chú ê lâng, thang khì iâⁿ-gōa ê hōe-bō͘ hia.

8Mô͘-se beh khì hōe-bō͘ hia ê sî, só͘-ū ê jîn-bîn lóng khí-lâi khiā tī ka-kī pò͘-pîⁿ ê mn̂g-kháu, khòaⁿ Mô͘-se chìn-ji̍p hōe-bō͘.

9Mô͘-se ji̍p hōe-bō͘ ê sî, hûn-thiāu kàng-lo̍h tī hōe-bō͘ ê mn̂g-kháu; Siōng Chú chiū kap Mô͘-se kóng-ōe.

10Só͘-ū ê jîn-bîn khòaⁿ-tio̍h hûn-thiāu kàng-lo̍h tī hōe-bō͘ ê mn̂g-kháu, chiū lóng khí--lâi, tī ta̍k-ê lâng ê pò͘-pîⁿ mn̂g-kháu kūi-pài.

11Siōng Chú kap Mô͘-se bīn-tùi-bīn kóng-ōe, chhin-chhiūⁿ lâng teh kap pêng-iú kóng-ōe. Mô͘-se tò-tńg-lâi iâⁿ-lāi ê sî, kun-sûi Mô͘-se ê siàu-liân-lâng Lūn ê kiáⁿ Iok-su-a bô lī-khui hōe-bō͘.

12Mô͘-se tùi Siōng Chú kóng, “Siōng Chú, lí ū kau-tài góa, tio̍h chhōa chit-ê jîn-bîn khì hit-ê só͘-chāi, m̄-kú lí bô hō͘ góa chai, beh phài sím-mi̍h-lâng kap góa chòe-hé khì. Lí chí-ū kā góa kóng, lí chí-miâ kéng-tiàu góa, koh chin ì-ài góa.

13Lí nā chin-chiàⁿ ì-ài góa, kiû lí chiong lí ê tō-lō͘ chí-sī góa, hō͘ góa jīn-bat lí, thang tit-tio̍h lí ê un-tián; kiû lí ōe-kì-tit chit-ê bîn-cho̍k sī lí ê chú-bîn.”

14Siōng Chú kóng, “Góa beh chhin-sin kap lí khì, hō͘ lí an-sim.”

15Mô͘-se tùi Siōng Chú kóng, “Lí nā bô beh chhin-sin kap góa khì, chiū m̄-thang kiò goán tùi chia chiūⁿ-khì hit-ê só͘-chāi.

16Goán beh án-chóaⁿ chai, lí ū hó khoán-thāi góa kap lí ê chú-bîn? Kiám m̄-sī in-ūi lí ū kap goán chòe-hé khì, hō͘ góa kap lí ê chú-bîn, kap tōe-chiūⁿ bān-cho̍k ū hun-pia̍t?”

17Siōng Chú tùi Mô͘-se kóng, “Lí kóng ê chit-hāng tāi-chì, góa ōe chòe, in-ūi góa ì-ài lí, koh chí-miâ kéng-tiàu lí.”

18Mô͘-se kóng, “Kiû lí hō͘ góa khòaⁿ-kìⁿ lí ê êng-kng.”

19Siōng Chú kóng, “Góa beh tī lí ê bīn-chêng hián-sī góa it-chhè ê súi, it-chhè ê hó, koh beh tùi lí soan-pò͘ Siōng Chú ê miâ. Góa beh lîn-bín góa ài lîn-bín--ê, thé-thiap góa ài thé-thiap--ê.”

20I koh kóng, “Lí bōe-ēng-tit khòaⁿ góa ê bīn, in-ūi bô lâng ōe-tàng khòaⁿ-kìⁿ góa iáu ōe oa̍h.”

21Siōng Chú koh kóng, “Lí lâi khiā tiàm góa piⁿ--á chit-tè chio̍h-pôaⁿ téng.

22Góa ê êng-kng keng-kè ê sî, góa beh kā lí hē tī chio̍h-pôaⁿ ê phāng, ēng góa ê chhiú-tôe kā lí jia--teh, thèng-hāu góa kè--khì;

23jiân-āu góa beh kā góa ê chhiú kiu--tńg-lâi, lí chiū ōe khòaⁿ-kìⁿ góa ê ka-chiah-phiaⁿ, m̄-kú bōe-tàng khòaⁿ-kìⁿ góa ê bīn.”

← Chapter 32 Jump to: Chapter 34 →