Exodus 30

Chinese TTVR (現代台語譯本羅馬字版)

← Chapter 29 Jump to: Chapter 31 →

1“Lí tio̍h ēng kim-ha̍p-hoan-bo̍k chòe chi̍t chō sio-hiuⁿ ê tôaⁿ,

2sī sù-hong--ê, tn̂g kap khoah lóng sì-cha̍p-gō͘ kong-hun, koân káu-cha̍p kong-hun. Tôaⁿ hit sì ki khiàu--khí-lâi ê kak tio̍h kap tôaⁿ liân-chiap chòe chi̍t tè.

3Tôaⁿ ê téng-bīn, sì-ûi, í-ki̍p hiah-ê kak, lóng tio̍h ēng sûn-kim pau--teh; mā tio̍h tī tôaⁿ ê sì-ûi siuⁿ kim-sòaⁿ.

4Lí tio̍h tī kim-sòaⁿ ê ē-bīn, tôaⁿ ê siang-pêng, nn̄g ki hoâiⁿ-koaiⁿ ê téng-bīn, chòe nn̄g ê kim-khoân, thang chhng kǹg kng tôaⁿ.

5Tio̍h ēng kim-ha̍p-hoan-bo̍k chòe kǹg, ēng kim pau--teh.

6Lí tio̍h chiong hiuⁿ-tôaⁿ khǹg tī iok-kūi chêng ê tiùⁿ-lî thâu-chêng, kap iok-kūi téng-bīn ê kòa sio-tùi, hia sī góa kap lí siong-hōe ê só͘-chāi.

7A-lûn ta̍k chá-khí chéng-lí teng-hé ê sî, tio̍h tī tôaⁿ-téng sio phang-phang ê hiuⁿ.

8Kàu hông-hun A-lûn tiám-teng ê sî, mā tio̍h sio-hiuⁿ. Lín tio̍h sè-sè-tāi-tāi tī Siōng Chú ê bīn-chêng put-toān án-ni sio-hiuⁿ.

9M̄-thang tī chit-ê tôaⁿ sio pa̍t-khoán ê hiuⁿ, mā m̄-thang tī chia hiàn sio-hòa-chè, sò͘-chè, kap tiān-chiú-chè.

10A-lûn tio̍h chi̍t nî chi̍t piàn, ēng sio̍k-chōe-chè ê huih boah tôaⁿ-téng ê sì ki kak, kā hiuⁿ-tôaⁿ kiâⁿ kiat-chēng-lé. Lín sè-sè-tāi-tāi tio̍h án-ni chòe. Chit-ê tôaⁿ tī Siōng Chú ê bīn-chêng sī chì-sèng--ê.”

11Siōng Chú koh tùi Mô͘-se kóng,

12“Lí tiâu-cha Í-sek-lia̍t -lâng jîn-kháu ê sî, in ta̍k-ê lâng tio̍h ūi ka-kī ê sìⁿ-miā hiàn sio̍k-kim hō͘ Siōng Chú, chiah bián tī phó͘-cha ê sî chai-hō lîm-kàu in.

13Só͘-ū tiám-sǹg--kè ê lâng, ta̍k-ê tio̍h chiàu sèng-só͘ ê kong-chhìn the̍h la̍k kong-khek ê gûn hiàn hō͘ Siōng Chú.

14Só͘-ū tiám-sǹg--kè jī-cha̍p hè í-siōng ê lâng, tio̍h chiong chit la̍k kong-khek ê gûn hiàn hō͘ Siōng Chú.

15Hó-gia̍h-lâng m̄-bián chhut khah chōe, sàn-chhiah-lâng m̄-thang chhut khah chió; ta̍k-ê lâng lóng tio̍h hiàn la̍k kong-khek ê gûn hō͘ Siōng Chú, chòe sìⁿ-miā ê sio̍k-kim.

16Lí tio̍h tùi Í-sek-lia̍t -lâng siu chit-ê sio̍k-kim, chòe hōe-bō͘ ê lō͘-ēng, hō͘ Í-sek-lia̍t -lâng tī Siōng Chú ê bīn-chêng tit-tio̍h kì-liām, che sī lín sìⁿ-miā ê sio̍k-kim.”

17Siōng Chú tùi Mô͘-se kóng,

18“Lí tio̍h ēng tâng chòe sóe-tn̄g ê phûn kap phûn-chō, hē tī hōe-bō͘ kap chè-tôaⁿ ê tiong-kan, lāi-bīn tóe chúi.

19A-lûn kap i ê kiáⁿ beh tī hia sóe chhiú, sóe kha.

20In ji̍p hōe-bō͘, á-sī óa tôaⁿ-chêng ho̍k-sāi, hiàn ēng hé sio ê chè-mi̍h hō͘ Siōng Chú ê sî, tio̍h ēng chúi sóe, chiah bián sí.

21In tio̍h án-ni sóe chhiú sóe kha, chiah bián sí; che beh chòe A-lûn kap i ê hō͘-tāi sè-sè-tāi-tāi éng-oán ê kui-lē.”

22Siōng Chú koh tùi Mô͘-se kóng,

23“Lí tio̍h chhú siōng-téng ê hiuⁿ-liāu, chiū-sī liû-chit ê bu̍t-io̍h la̍k kong-kun, phang ê jio̍k-kùi saⁿ kong-kun, phang ê chhiong-pô͘ saⁿ kong-kun,

24kùi-phê la̍k kong-kun, lóng chiàu sèng-só͘ ê kong-chhìn, í-ki̍p kaⁿ-ná-iû sì kong-seng,

25chiàu chòe hiuⁿ-liāu ê hong-hoat tiâu-hô, chòe thang boah ê sèng-iû.

26Tio̍h ēng chit-ê iû boah hōe-bō͘ kap iok-kūi,

27toh kap toh-téng só͘-ū ê khì-khū, teng-tâi kap teng-tâi ê khì-khū, hiuⁿ-tôaⁿ,

28sio-hòa-chè ê chè-tôaⁿ kap tôaⁿ só͘-ū ê khì-khū, í-ki̍p sóe-tn̄g ê phûn kap phûn-chō.

29Lí tio̍h kā in hun-pia̍t-choh-sèng, hō͘ in chiâⁿ-chòe chì-sèng; só͘-ū bong-tio̍h chiah-ê mi̍h-kiāⁿ--ê lóng chiâⁿ-chòe sèng.

30Lí tio̍h kā A-lûn kap i hiah-ê kiáⁿ boah-iû, hō͘ in hun-pia̍t-choh-sèng chòe chè-si ho̍k-sāi góa.

31Lí tio̍h kā Í-sek-lia̍t -lâng kóng, ‘Chit-ê iû beh tī lín sè-sè-tāi-tāi chòe góa ê sèng-iû.

32M̄-thang tò tī it-poaⁿ-lâng ê seng-khu, mā m̄-thang ēng chit-ê tiâu-hô ê hong-hoat chòe chhin-chhiūⁿ chit-khoán ê iû. Chit-ê iû sī sèng--ê, lín mā tio̍h kā i tòng-chòe sèng.

33Só͘-ū chè-chō kap sèng-iû kâng-khoán ê iû, á-sī ēng lâi boah chè-si í-gōa ê lâng--ê, tio̍h tùi jîn-bîn ê tiong-kan kā in kek-chhut.’”

34Siōng Chú tùi Mô͘-se kóng, “Lí tio̍h the̍h so͘-ha̍p-hiuⁿ, hiuⁿ-lê, pe̍k-siông-hiuⁿ chiah-ê hiuⁿ-liāu, kap sûn ê jú-hiuⁿ, ta̍k-hāng pîⁿ tāng,

35ēng chè-chō phang-liāu ê hong-hoat chòe hiuⁿ, koh ēng iâm tiâu-hô, hō͘ i chheng-khì sèng-hòa.

36Lí tio̍h the̍h chi̍t-sut-á chit-ê hiuⁿ, géng-chòe hún, hē tī hōe-bō͘ lāi iok-kūi chêng; góa beh tī hia kap lí siong-hōe; lín tio̍h khòaⁿ che chòe chì-sèng.

37Lín m̄-thang chiàu chit-ê hong-hoat ūi-tio̍h ka-kī chòe hiuⁿ; tio̍h khòaⁿ i chòe sèng, kui hō͘ Siōng Chú.

38Nā ū lâng chè-chō kâng-khoán ê hiuⁿ beh phīⁿ-phang, tio̍h tùi jîn-bîn ê tiong-kan kā i kek-chhut.”

← Chapter 29 Jump to: Chapter 31 →