1 Samuel 10

Zande

← Chapter 9 Jump to: Chapter 11 →

1Samuere ki di keka na nzeme rogo ho, ki uka ha ku ri Saura yo, ki nyoro ngbako, ki ya, “A nga Yekova mbedi ro ni nzeme mo du ni bazogo ku ri gako aboro, te?

2Ho mo ka guari ni pati re areme, mo abí akumba ue pati murã Raere, ringara Benyamina yo ku Seruza yo, i ayá foro, ‘Agu anaadongi nga agu ra mo andu ka gbata ra, i bi ra, awere bamo mbu berã pa anaadongi ki nibaki bangiriko tipa k na ro, niya, “Mi amánga waĩ tipa wire?” ’

3Mo ki ndu ku mbata yo berewe, mo ki da pati gu ngua du wa gero Tabora yo; akumba biata agbía ro yo nandu ku Betere yo koyo du Mbori ni, gu ni sa atinda wiri ameme biata, kura ni ki tindi udiudi kpokuta biata, kura ni ki tindi kambu na imekakue rogo ho.

4I apáa kuti ro ki fu udiudi kpokuta foro ue, nga gu mo ka dia ha be yo.

5Fuo gure mo adá ti ga Mbori gangara, yo du ga aFereseto gbata abasovura ni; si adú wa gere, ho mo ka da ni ku bakporo yo, mo agbía rika anebi nazorã ri tumbatumba rago yo na kindondo, na gaza, na kpangi, na sagiru, nandu mbata yo fu yo, i ki nigumba pai wa anebi.

6Gu toro nga ga Yekova ayé ku ri ro na bakere tandu, mo ki nigumba pai na yo wa nebi, mo ki du wa kura boro akia.

7Ho gi yuguyugupai ka gbia ro ni re, mo ki mangi pai wa rengbe he ti gu rago re, bambiko Mbori du na mo.

8Mo nikandu mbata fere ku Girigara yo; mo ngére, mi tigimi ayé koyo du mo ni ka fu zozo amotumo, na ka tumo ni amotumo zeredaí Mo ará koyo tipa rame saba, daho mi ka da ni koyo du mo ni, ki yugu agu apai foro mo ka manga.”

9Si ki du wo, ho Saura asa giiko ni fu Samuere ka ga Mbori ki fu kura ngbaduse fu ko akia; gu yuguyuguapai dunduko re si ki ye ka manga ni kina gu uru re.

10Ho i ada ni ku gangara yo, oni ngére, rika anebi ki gbia ko; ga Mbori toro ki ye ku ri ko na bakere tandu, ko ki nigumba pai wa nebi na yo a.

11Ho agu aboro abi ko ni naaini ko mbata, ya ko nigumba pai wa nebi na anebi wa sa, i ki niya dagba yo, “Gini pai nga gere namanga wiri Kisi were? Saura dagba anebi yo a?”

12Boro gu rago re sa ki karaga ha ki ya, “Da nga bayo?” Si du si ki du ni kina sanza nga, “Saura dagba anebi yo a?”

13Ho ko adigisi gumba pai ni wa nebi, ko ki ye ku ri tumbatumba rago yo.

14Unduruba Saura ki ya fu ko na fu gako moyambu, “Wari oni andu ku ho ni?” Ko ki ya. “Ka gbata anaadongi; ono ho ani abi nga ra ni ya, ani ki ndu koyo du Samuere ni.”

15Unduruba Saura ki ya, “Mi nazungadi ro, mo gúmba nga ha fere, gini pai Samuere agumba foro?”

16Saura ki ya fu undurubako, “Ko agumba ha fu rani zukazuka ya i bi anaadongi.” Ono pa agu apai Samuere agumba nga pa zogarago, ko agumba nga ha fu ko te.

17Samuere ki yambu aboro i dúngura tiyo ku Misipa yo koyo du Yekova ni;

18ko ki ya fu awiri aYisaraere, “Ya Yekova nga ga aYisaraere Mbori wẽ, ‘Mi nakusi aYisaraere ringara Ezipeta yo, ki batasi roni be aEzipeto, na be agu arikaaboro dunduko nanarungosi roni.’

19Ono areme oni gindiga gaoni Mbori, nga gu ko nabatasa roni ni tiko be gu gbigbitaapai dunduko namanga roni na gaoni arungo a; bambiko oni aya fu ko, ‘Ai! ono mo mói bakindo fu rani ku ri rani.’ Awere tie, oni yé ku bara bangiri Yekova ni angbatungaroni, ni ba akuturoni.”

20Si du Samuere ambedisi angbatunga aYisaraere ti ni dunduko, i ki sia gu ngbatunga nangia ga Benyamina.

21Ko ki mbedisi ngbatunga Benyamina a wa rikayo adu, i ki sia gu rika nangia ga Metere, fuo gure ko ki mbedisi rika Metsre ni aboro ni ba sa sa; i ki sia Saura wiri Kisi. Ono ho i agbata ko ni, ka i abi nga ko ya.

22Si du i asana Yekova ti ni berewe, ki ya, “Kura boro ho ka ye kono?” Yekova ki karaga ha ki ya, “Oni ngére, ko oko tiko ku dagba ahe yo.”

23I ki oro fuo ko koyo ki ye na ko; ho ko aru ni dagba aboro ko ki au ni gbanga ko ki susi aboro dú tona ti pagorõko ki da ku ari.

24Samuere ki ya fu aboro dunduko, “Oni bi gu ko Yekova asia ko, gini boro du nga ho sa dagba aboro, wa ko?” Aboro ki ta ngbayo dunduko, ki ya, “Mbori fũ gbanga rame fu bakindo!”

25Samuere ki gumba sino zoaarago fu aboro; ko ki ke pa ha rogo kitabu ki moi he ku bangiri Yekova. Samuere ki asia aboro dunduko, aboro ni ba sa sa ku kpuyo yo.

26Saura ki ga a ku kpuko Giba yo. Rimbasa ngangarã aboro ki ga na ko koyo, nga agu yo Mbori azadi ngbaduyo.

27Ono gu gbegberẽ sino aboro aya, “Waĩ ka gi kumba batasi rani re?” I ki nipayasi pa ko, ka i afu nga gamahe fu ko ya. Ono ko aongo aonga.

← Chapter 9 Jump to: Chapter 11 →