1 Samuel 21

Zande

← Chapter 20 Jump to: Chapter 22 →

1Dawidi ki da ku Nobo yo koyo du Aimereke ni nangia boromotumo; Aimereke ki ta kio akio niye ka gbia Dawidi, ki ya fu ko, “Tipagine du mo ti ni ni sa ro, ka boro adu nga fuo ro ya?”

2Dawidi ki ya fu Aimereke boromotumo, “Bakindo rugu re na pai, ki ya fere, ‘Ka boro ini nga pa gu pai re mi akeda ro ti ni ya, na gu pai rugu mi ro na ni a ya.’ Mi ringbisi aparanga sa gu rago re rengbe bangire.

3Si du awere gini he du be ro? Mo fú udiudi kpokuta bisue fere, watadu gu he ka du ho.”

4Boromotumo ki karaga ha fu Dawidi, ki ya, “Kungba kpokuta ho be re te, ono kina ziazia kpokuta du ho; kina gu ka aparanga banda tiyo ti ade.”

5Dawidi ki karaga ha fu boromotumo, ki ya fu ko, “Ni rengo ade adu nga na ani tipa agi arame biata te re; ho mi akuru ni, aparanga adu adu ziazia, ka si vura du wa si angia kungba nunguro vurũ; waĩ tie ka i adu nga areme ziazia ti ni ya?”

6Si du boromotumo ki fu ziazia kpokuta fu ko; bambiko kpokuta adu nga ho te ono kina kpokuta yugopai, nga gu i anadia ha kina bara bangiri Yekova, ki moi fafoi he ku ba ha ni gu uru i adia ha ku sa yo.

7Were kumba adu ho nadu dagba ga Saura amoyambu yo ni gu uru re, i adika ko ku bara bangiri Yekova; rimoko angia Doege boro Edome, gbia ga Saura ababanda anya.

8Dawidi ki ya fu Aimereke, “Baso watadu basape be ro erẽ? bambiko mi aye nga na gi basape watadu gimi aũvura bere te, bambiko bakindo naida gako pai ni ngarã.”

9Boromotumo ki ya, “Gu basape nga ga Goriata gu Fereseto, nga gu ko mo aimi ko ngboongboorago Era yo, mo ngere, kina ha du erẽ ni kaikai he na roko gii efoda yo; ka mo akpi nyemu ka dia ha, mo di he adia, bambiko a nga kura ha ho te kina ha du erẽ.” Dawidi ki ya, “Kura ha ho wa ha te; mo fú he fere.”

10Dawidi ki guari ki oro ni gu uru re be gunde Saura, ki ndu koyo du Akisa ni nangia bakindo Gata.

11Avuru Akisa ki ya fu ko, “A nga Dawidi du re nga bakindo ringara, te? I abi bia gu boro fu gu ni tipa ko rago do gbere, te? ki ya, ‘Saura imi gako yo wa akutu, ono ga Dawidi yo adu wa akutu bawe’?”

12Dawidi ki moi agi apai re ku kpotoko yo, ki du na, bakere gunde be Akisa bakindo Gata.

13Si du ko asa sinoko ti ni ku bangiriyo, ki sa tiko wa kina irapupo fu yo, ki nigbaki vuro akpuguru bakporo, sure ki niga ngbako yo ki niyuru kuti maingbako.

14Akisa ki ya fu avuruko wẽ, “Oni ngére, oni bí gu kumba re irapupo nga ko; tipagine ye oni na ko ti ni kono du mi ni?

15Zingo irapupo namanga re amanga tigu ye oni ti ni na gi boro re ni nimangi gani pa pupo ku bara bangire? Gi kumba re, ko ayé ku dimo kpure yo?”

← Chapter 20 Jump to: Chapter 22 →