1 Samuel 4

Zande

← Chapter 3 Jump to: Chapter 5 →

1Sangba Samuere agbandaka ku dagba aYisaraere dunduko. AYisaraere ki ndu na vura kuti aFereseto; i ki zi bataya pati Ebenezere, aFereseto ki zi gayo bataya ku Afeka yo.

2AFereseto ki mangi aYisaraere amanga. I ki imi aboro bavura yo wa 4,000.

3Ho rimbasa aborovura ayega ni ku bataya yo, ga aYisaraere abaakumba ki ya, “Tipagine Yekova nimangi rani ti ni areme barangba aFereseto? Ani yé na ga Yekova sanduki mokido Siro yo kono du ani ni, si yé ku dagba rani ka batasa rani be avurarani.”

4Si du aboro akedi sunge ti ni ku Siro yo, i ki ye na ga Yekova sanduki mokido, nga ga arimbasa ko, nga gu ko nasunga ri akeruba; ono agu awiri Eri ue nangia Ofeni na Finasa adu yo ga Mbori sanduki mokido adu ni.

5Ho ga Yekova sanduki mokido ada ni ku bataya yo, aYisaraere dunduko ki ngbiko ni bakere fugo, kpotosende ki poi berewe.

6Ho aFereseto agi gu woro ngbiko ni re, i ki ya, “Gini pai gi bakere ngbiko ayugo ho re ku rogo ga aEbere bataya yo?” I ki ini gu pai nga ga Yekova sanduki da ku bataya yo.

7AFereseto adu na gunde, bambiko i aya, “Mbori ye ku bataya yo.” I ki ya, “Na gberẽ he fu rani! Bambiko ngbatunga pai adu nga wa gere mbata te.

8Na gberẽ he fu rani! Da nikabatasa rani vurube agi ambori ome re? Agi yo re nga agu ambori namangi aEzipeto na ngbatunga agberãngbi dunduko ngbakungba yo.

9Ako aFereseto, oni dú nyanyaki, oni dú wa akumba, oni ka du ni akanga fu aEbere, wa i nidu fu roni. Oni dú wa akumba ka so vura.”

10AFereseto ki so vura, i ki mangi aYisaraere, i ki oro ni ba sa sa sa gayo abamburoko; bakere kpio aboro ki du, mbiko aYisaraere akpiki wa aboro 30,000 nandu ni nduyo.

11I ki di ga Mbori sanduki; i ki imi awiri Eri ue nangia Ofeni na Finasa a.

12Kumba nangia ngbatunga Benyamina ki oro dagba rikavura, ki ye ku Siro yo ni kina gu uru re, na gako roko ni sipisipi he, na sende ti ri ko.

13Ho ko ada ni, Eri asungu ri gako basunga pangba gene nipidi rago, bambiko ngbaduko akua tipa ga Mbori sanduki. Ho gu kumba re aye ni ku bakporo yo, ki gumba pa ha, aboro bakporo ki mongo ta ngbayo dunduko.

14Ho Eri agi pa aboro ni, i nita ngbayo, ko ki ya, “Gini he bakere tatangba awo ti ni, gini pai dũ?” Gu kumba re ki ipisi tiko ki ye ki gumba pa ha fu Eri.

15Were garã Eri adu wa 98, bangiriko adu ni tataita ha, ka ko angera nga ngba ya.

16Gu kumba re ki ya fu Eri wẽ, “Mi nga gu boro naye dagba rikavura yo; mi nioro areme kina dagba rikavura.” Ko ki ya, “Gini pai nimángi yo, wire?”

17Gu kumba naye na gupangbanga re ki karaga ha ki ya, “AYisaraere nikiti ti ngba vura ki oro be aFereseto, ono i imi dungu aboro dagba yo; awiro ue nga Ofeni na Finasa ki kpiki, i ki di ga Mbori sanduki a.”

18Si ki ta du wa gere, ho ko ape pa ga Mbori sanduki ni, Eri ki ti ni gii ko, ri gako basunga ko asungu auru he pangbadimo bakporo; gorõko ki kiti, ko ki kpi, bambiko gbinza boro nangia ko, ni rõrõi ko gbe. Ko asapa ngbanga fu awiri aYisaraere garã ki du 40.

19Ono dia wiriko adu na gude, nga dia Finasa, mbembedi ka vunga. Ho ri agi he ni nga i di ga Mbori sanduki, ya ba kumbari na kumbari kpi a, ri ki nuga tiri ki vungu; bambiko ima aye sa ri.

20Ti rago gari kpio agu ade naunda ri ki ya fu ri wẽ, “Ka mo gúnde nga ya, bambiko mo vungu kumbagude.” Ono ri akaraga nga pai te, ri aberã nga pa ha a te.

21Ri ki yambu rimo gu gude re nga Ikabodo, niya, “Taarimo guari ti aYisaraere!” bambiko i adi ga Mbori sanduki, na bambiko pa ba kumbari na pa kumbari a.

22Ri ki ya, “Taarimo guari ti aYisaraere, bambiko i di ga Mbori sanduki ku sa yo.”

← Chapter 3 Jump to: Chapter 5 →