1 Samuel 24

Zande

← Chapter 23 Jump to: Chapter 25 →

1Ho Saura ayega ni ti do fuo aFereseto, i ki gumba ha fu ko, ki ya, “Mo ngére, Dawidi gu du ngbakungba Ene-gedi yo.”

2Saura ki rogo siasia aboro dagba aYisaraere yo dunduko wa aboro 3,000, ki ndu ka gbata Dawidi na gako aboro ri Ambia Amemenvuo.

3Ko ki da ti ndugu akandoro pangba gene, yo simbia adu ni; Saura ki rimi koyo ka ra, Ono Dawidi adu na gako aboro rogo gu pavuru simbia naturũ aturã ku mbata yo.

4Ga Dawidi aboro ki ya fu ko, “Mo ngére, areme nga mu uru Yekova agumba pa ha foro ki ya, ‘Mo ngére, mi afú vuraro ku be ro, mo ki mangi fu ko a wa si ka ngba ti ro.’ ” Dawidi ki guari tie, ki yere ngba ga Saura gbanga roko ni gbuko.

5Fuo ho, ngbadu Dawidi ki imi, bambiko wa ko ayere ngba ga Saura roko.

6Ko ki ya fu gako aboro, “Ka Yekova idi nga ha mi mangi gi pai re fu gi gbia, nga ga Yekova mbedimbedi boro ya, nga taã bere sa ko, wa du ko ni ga Yekova mbedimbedi boro.”

7Si du Dawidi aza gako aboro ti ni ni agi apai re, ka ko aida nga ha fu yo i mo kuti Saura ya. Saura ki guari simbia yo, ki ndu ngba gako nduge.

8Fuo ho Dawidi ki guari a, ki kuru simbia yo, ki ta paa ku ari fuo Saura niya, “Gi gbia nga bakindo!” Ho Saura angere ni ku gii ko yo, Dawidi ki nugadi ku sande ni kpakpuko, ki tumusa fu ko.

9Dawidi ki ya fu Saura, “Tipagine mo agia sangba aboro ti ni, wa i niya, ‘Mo ngére, Dawidi nagbata ro ka imisa ro’?

10Mo ngére, areme re bangiro nibi gu pai wa Yekova nifu ro ku be re simbia yo; agu yo nikpari fere mi imi ro, ono gi berã ki batasi ro. Mi ki ya, ‘Mi atáã nga bere kuti gi gbia te; bambiko mo nga ga Yekova mbedimbedi boro.’

11Ku ri gere, buba, mo bí nga, wawa, mo bí nga ga gbanga roko be re; bambiko wa mi niyere ngba ga gbanga roko, ka mi aimo nga ro ya, mo ini he ki bi he ya gbigbitapai ti re na samungu a te. Si du mi ainga nga pai k uti ro ti ni a ya, wa mo avura nigbata ungare ka imo re.

12Yekova sári ngbanga dagba rani na mo, Yekova ki iri bape ro ti re; ono mi amáa nga bere ti ro te.

13Wa ga adumbata sanza agumba ha ya, ‘Gbegberẽpai nakura be kina gbegberẽpai’; ono mi amáa nga bere ti ro te.

14Da bakindo aYisaraere agbata ni? da mo tigamo ado fuo ni? Fuo kangba ango! fuo kangada!

15Si du ka Yekova du ni basaringbanga, ka sara ngbanga dagba rani na mo, ki bi he, ki zungadi he tipa gi pai re, ki batasi re vuru be ro.”

16Ho Dawidi adigisi gumba gako apai ni fu Saura, Saura ki ya, “Fugoro du, Dawidi, wire?” Saura ki poi ku ari, nikpari ni aume.

17Ko ki ya fu Dawidi, “Mo nga ruru boro ki susi re; bambiko mo mangi kina wenepai fere, ono mi tigimi ninamanga kina gbigbitapai foro.

18Ono mo taki pande he areme ya mo mangi pai fere wenengaĩ; bambiko ho Yekova nifu re ni ku be ro, mo naimo nga re te.

19Bambiko ka boro bi vurani, ni mbu ni ni ga zezeredi? Si du Yekova afú mosoro wenepai foro tipa gi pai mangi mo fere areme re.

20Awere, mo ngére, mi ini he ni rengo ya mo adú adu ni bakindo ni rengo, gu ngbi nga ga aYisaraere ki kii akia ku be ro.

21Si du mo zúnga he fere awere ti rimo Yekova ya mo abá nga angbatungare kpakaya fuo kpiore te, mo agbárasa nga rimore dagba ngbatunga buba a te.”

22Dawidi ki zunga he fu Saura. Saura ki ga ku kpuko yo; ono Dawidi ki ga ku ba ko yo berewe na gako aboro.

← Chapter 23 Jump to: Chapter 25 →