1 Samuel 16

Zande

← Chapter 15 Jump to: Chapter 17 →

1Yekova ki ya fu Samuere, “Rago adu waĩ mo nirungo kindi tipa Saura, wa du mi tigimi gindiga ko ti du ko ni bakindo ku ri aYisaraere? Mo híisi ga gbanga na nzeme, ki ndu, mi nikakeda ro koyo du Yisai ni nga boro Betereme, bambiko mi akpara gu ni dagba awiriko ni du ni bakindo fere.”

2Samuere ki ya. “Mi awíra pa ndu waĩ? Ka Saura gi he, ko aimo re aimo.” Yekova ki ya, “Mo ndú na paranga bagara, ki ya. ‘Mi naye ka tumo fu Yekova.’

3Mo ki yambu Yisai ku pati motumo, mi ayúgo gu pai foro mo ka manga; mo ki mbedi gu ni fere mi ka yamba rimoni foro.”

4Samuere ki mangi gu pai nga gu Yekova arugu ko na ni, ki ye ku Betereme yo. Abaakumba bakporo ki ye ka ngbisa ko ki nikio akio ki ya, “Ye mo na pa zereda?”

5Ko ki ya. “Na zereda; mi naye ka tumo fu Yekova; oni kpára tironi ziazia, ki ye fuo re sa motumo.” Ko ki kpara Yisai na awiriko, ki yambu yo sa motumo.

6Ho i aye ni, ko ki ngere ku ri Eriaba, ki ya. “Ni rengo ga Yekova mbedimbedi boro erẽ bara bangiriko.”

7Ono Yekova ki ya fu Samuere, “Ka mo ngére nga sa tamako ya, watadu kuti basonako a ya, bambiko mi gindiga ko; bambiko Yekova abi nga he wa aboro nabi he te; mbiko aboro nabi kina gu tama boro du ti kpotoni, ono Yekova nangera ku kpoto aboro yo.”

8Yisai ki yambu Abinadaba, ko susi barangba Samuere. Ko ki ya, “Yekova asia nga gi ko a te re.”

9Yisai ki ya Sama susi. Ko ki ya. “Yekova asia nga gi ko ate re.”

10Yisai ki idi awiriko nadu saba i susi barangba Samuere. Samuere ki ya fu Yisai. “Yekova asia nga agi yo te re.”

11Samuere ki ya fu Yisai, “Awiro erẽ dunduko?” Ko ki ya, “Gu ko kina ho nga kiaro, mo ngére, ko nabanda akandoro.” Samuere ki ya fu Yisai. “Mo kédi sunge i ye na ko; bambiko ani asúnga nga te daho ko ka da ni kono.”

12Ko ki kedi sunge i ki ye na ko. Kpotoko ki du adu irĩirĩ ni rengo, tamako ki du ni wene he ki susi, bi ko ki ngba angba bangirise. Yekova ki ya, “Mo gúari, mo mbédi ko; bambiko ko du re.”

13Samuere ki di gbanga na nzeme, ki mbeai ko ku dagba aunvuruako; ga Yekova Toro ki ye na bakere tandu ku ri Dawidi tona ti gu uru re ki da ku mbata yo kindi. Samuere ki guari tie ki ga ku Rama yo.

14Ga Yekova Toro ki guari ti Saura, gbigbita toro ki ye be Yekova ki nigundesi ko.

15Avuru Saura ki ya fu ko. “Awere mo ngére, gbigbita toro naye be Mbori ka gundesi ro.

16Gaani gbia ídi he awere ki rugu gako amoyambu nga agu yo ru barangba ro, i gbata boro birĩ ini pa taka kundi; si ayé ka du wa gere, ho gu gbigbita toro ka niye ni ku ri ro naye be Mbori, ko ki nitaki kundi, mo ki nizeredi.”

17Saura ki ya fu avuruko. “Oni sia gu kumba fere ini pa taka kundi wenengaĩ, ki ye na ko Kono du mi ni.”

18Paranga sa ki karaga pai ki ya, “Mo ngére, mi abi gu ko dagba awiri Yisai nga boro Betereme nga gu ko ini pa taka kundi ni birĩ, nga nyanyaki boro ni irarugatinapai, ni basovura a, ni baberẽpai rogo fura yo, tamako ki ngba angba; Yekova du na ko a.”

19Si du Saura akedi asunge ti ni koyo du Yisai ni, ki ya. “Mo kedi Dawidi kono du mi ni nga wiro nga gu ko ninabanda akandoro.”

20Yisai ki di dongi i avo riahe ku ri ru, na mangu kpotonya na imekakue, na paranga meme, ki kedi ahe be Dawidi nga wiriko fu Saura.

21Dawidi ki ndu koyo du Saura ni, ki ru bara bangiriko. Saura ki nikpi nyemu ko bakere, ko ki au ni gako batindi uvura.

22Saura ki kedi sunge koyo du Yisai ni, ki ya, “Mi nakpara foro, mo id i he Dawidi niru bara bangire, bambiko ngba ko angba bangire.”

23Si ki ta du wa gere, ho gu gbigbita toro aniye ni be Mbori ku ri Saura. Dawidi ki nidi kundi, ki nitaki ni, si du Saura ki nizeredi, ki ningba, gu gbigbita toro re ki niguari ti ko.

← Chapter 15 Jump to: Chapter 17 →