1 Samuel 29

Zande

← Chapter 28 Jump to: Chapter 30 →

1Ono aFereseto ki dungura gayo arimbasavura dunduko ku Afeka yo; aYisaraere ki zi gayo bataya pati gugaabi nga gu du Yizerere yo.

2Agu agbia nga ga aFereseto yo ki nisusi ni ba akama na ni ba akutu, Dawidi na gako akumba ki susi ngba fuo yo na Akisa.

3Abazogo nga ga aFereseto yo ki ya, “Gini pai agi aEbere amanga erẽ?” Akisa ki ya fu abazogo nga ga aFereseto yo, “A nga gi Dawidi du te re? nga vuru Saura nangia bakindo aYisaraere, nidu na mi na agi arame re na agi agarã te re? Mi abi nga ingapai ti ko wa ko aye kono du mi ni ki da ku areme te.”

4Ono abazogo nga ga aFereseto yo adu na zinga fu ko; abazogo nga ga aFereseto yo ki ya fu ko, “Mo káraga gu kumba re, ko gá ku rogo gu ringara mo ayugu he fu ko; ka ko ndú nga na ani sa vura ya, ko ka du rogo vura ni vurarani. Bamoiko gi kumba re asa tiko waĩ fu gako gbia berewe? A nga ni kina fu agi aboro re fu ko te?

5A nga gu Dawidi du te re? i abi bia tipa ko gu boro fu kura ni rago do gbere, niya, ‘Saura imi gako yo ni akutu, ono ga Dawidi yo ni akutu bawe.’ ”

6Akisa ki yambu Dawidi ki ya fu ko, “Wa du Yekova ni ungako, mo nidu ni kina ruru boro, pa ga nduge ku bani na pa ga yega na mi ku dagba rimbasavura si bangire ni wene he; mi abi nga gbegberẽpai ti ro tona ni gu uru mo aye kono du mi ni ki da ku areme te. Ono agbia aida nga na mo te

7Si du mo karaga tiro awere; mo ndú zezeredi, ka mo afú nga gberãrago fu agbia aFereseto ya.”

8Dawidi ki ya fu Akisa, “Ono gini pai mangi mi? Gini pai bi mo ti vururo wa mi aima ku bangiro ki da ku areme, ka mi andú nga ti ni ka so vura kuti avura gi gbia nga bakindo ya?”

9Akisa ki karaga ha fu Dawidi ki ya, “Mi ini he nga mo nga wene boro bangire, wa maraika nga ga Mbori ko; ka si vura du wo, abazogo nga ga aFereseto yo ya, ‘Ko andú nga na ani sa vura te.’

10Si du mo gúari ngbatutu wiso na avuru ga gbia naaye na mo; oni gúan ngbatutu wiso, rago nigiri, oni ki ga.”

11Si du Dawidi ki guari ngbatutu, ko na gako aboro ki ga, ka karaga tiso ku rogo ga aFereseto ringara yo. Ono aFereseto ki ndu ku Yizerere yo.

← Chapter 28 Jump to: Chapter 30 →