1 Samuel 15

Zande

← Chapter 14 Jump to: Chapter 16 →

1Samuere ki ya fu Saura. “Yekova akedi re mi mbedi ro mo du ni bakindo ku ri gako aboro, nga aYisaraere; si du mo dége turo sa agu apai nga ga Yekova.

2Ya Yekova nga ga arimbasa ko wẽ, ‘Mi ambúsa aAmareko tipa gu pai i amangi fu aYisaraere, wa i auru nguru kuti yo gene, ni gu rago i akuru Ezipeta yo.

3Mo ndú awere ka manga aAmareko, ki gbarasi agu ahe agbarasa du be yo kpakaya; ka mo abátasa nga yo ya, ono mo ími akumba na ade, fogo agude na ahamai, abaabagara na akandoro, akameri na adongi a.’ ”

4Saura ki yambu aboro, ki gedi yo Teraima yo, agu aboro nandu ni nduyo i adu 200,000, na aboro Yuda wa 10,000.

5Saura ki da rogo gu bakporo nga ga aAmareko, ki ru nguiu kuti yo ngboongboorago yo.

6Saura ki ya fu aKeno, “Oni gúari, oni ndú, oni kúru dagba aAmareko yo, mi ka imo roni na yo; bambiko oni ayugu weneringise fu awiri aYisaraere dunduko, ho i akuru ni Ezipeta yo.” Si du aKeno ki guari dagba aAmareko yo.

7Saura ki mangi aAmareko, tona Awira yo wa ka mo ndu ki da ku Sura yo, nga gu du barangba Ezipeta ku uroyo.

8Ko ki di Agaga nangia bakindo aAmareko ni ungako, ki gbarasi aboro kpakaya ni basape.

9Ono Saura na aboro abatasi Agaga, na gu bawene akandoro, na abaabagara na agu anyanzeme, na awiri akandoro, na agu ahe nadu ni wene he dunduko, ka i agbarasa nga ha dunduko ya; ono agu ahe nadu ni payapaya ha dũ na gu kungba ahe, i agbarasi he kpakaya.

10Sangba Yekova ki ye koyo du Samuere ni, ki ya,

11“Mi birĩ tire wa mi amoi Saura ni bakindo; bambiko ko asa tiko ti peka fuo re, ka ko amanga nga gimi arugute ya.” Samuere ki zingi gbe; ko ki kpari fu Yekova ni gu yuru re sasasa.

12Samuere ki guari ngbatutu wiso ka gbia Saura wiso; i ki gumba ha fu Samuere, ki ya. “Saura ye ku Karumera yo, mo ngére, ko mangi ũtingidapai ni gako, ko ndu ki susi, ki da ku Girigara yo.”

13Samuerekiye koyo du Saura ni. Saura ki ya fu ko, “Maku dú foro be Yekova; mi mangi sangba Yekova.”

14Samuere ki ya, “Gine nga gu mi agia wa kpe akandoro ture yo, na gu paa abaabagara mi agia?”

15Saura ki ya, “I niye na ami be aAmareko; bambiko aboro nibatasi gu bawene akandoro na abaabagara, ka tumo na ami fu Yekova ga Mbori; ani ki gbarasi gu yangara ra kpakaya.”

16Samuere ki ya fu Saura, “Mo rú nga! Mi gumba gu pai foro Yekova nigumba fere ni gi yuru re.” Ko ki ya fu ko, “Mo gúmba nga ha.”

17Samuere ki ya, “Wa mo avura du ni wiri toni ro bangiro, i asa nga ro ni bakumba ku ri angbatunga aYisaraere, te? Yekova ki mbedi ro ni bakindo ku ri aYisaraere.

18Yekova ki kedi ro ngba nduge, ki ya. ‘Mo ndú ka gbarasa agu aboro ingapai nga aAmareko kpakaya, ki so vura kuti yo daho i ka nyasa ni.’

19Tipagine tie mo agia nga sangba Yekova ti ni ya? Tipagine gba mo ti ni kina ku ri gbugbu ahe, ki mangi gu pai nadu ni gbigbita ha bangiri Yekova?”

20Saura ki ya fu Samuere. “Ai, mi agi sangba Yekova, ki ndu ngba gu gene ko akedi re ngba ha, ki yega na Agaga bakindo aAmareko, ki gbarasi aAmareko kpakaya.

21Ono aboro arogo ahe dagba gbugbu ahe yo, akandoro na abaabagara, gu baawene ahe ka i akpara ha, ka tumo na ni fu Yekova ga Mbori Girigara yo.”

22Samuere ki ya. “Zozo amotumo watadu kura aũbuga, si ngba ti Yekova susi gu nga giasangba Yekova? Mo ngére, giasangba ngba ti fu motumo, dega tue ngba ti nzenze abaakandoro.

23Bambiko samungu si sa na gu ingapai nga pa soroka, rekangose si sa na irairapai na irisa kpiahe. Bambiko wa gindiga mo gu pai nga ga Yekova, ko gindiga ro kina wo ti du ni bakindo.”

24Saura ki ya fu Samuere, “Mi ingi pai; bambiko mi gu auru sangba Yekova na auru gamo apai a, bambiko mi agunde be aboro, ki gi sangbayo.

25Si du awere, mi nakpara foro, mo vú re ti gi ingapai, ki karaga tiro berewe fuo re, ya mi niirisi Yekova.”

26Samuere ki ya fu Saura, “Mi akáraga nga tire fuo ro te; bambiko mo gindiga gu pai nga ga Yekova, Yekova ki gindiga ro ti du mo ni bakindo ku ri aYisaraere.”

27Wa Samuere asa tiko ka ga, Saura ki zi ngba gako gbanga roko si ki siri.

28Samuere ki ya fu ko, “Yekova siri gu ngbi nga ga aYisaraere be ro areme, ki fu he fu gu kuaro, nga gu ni ngba ki susi ro.

29Ka ga Yisaraere Ome re nga zire te, watadu sa gako berã a te, bambiko boro nga ko te ka sa gako berã.”

30Saura ki ya. “Mi ingi pai; mi nakpara foro, mo írisi re awere ku bangiri abaakumba nga ga gimi aboro yo, na ku bangiri aYisaraere, ki ye fuo re berewe, ya mi niirisi Yekova nga ga Mbori.”

31Si du Samuere ki ye berewe fuo Saure; Saura ki irisi Yekova.

32Samuere ki ya. “Oni yé na Agaga nga bakindo aAmareko kono du mi ni.” Agaga ki ye koyo du ko ni yee. Agaga ki ya. “Imisiri kpio ima susa awere ni rengo.”

33Samuere ki ya, “A wa ga basape anamanga ade i zanga awiriyo, kina wo namo ka zanga wiriri dagba ade.” Samuere ki dewe Agaga rukutu ku bangiri Yekova Girigara yo.

34Samuere ki ndu ku Rama yo; Saura ki ga ku kpuko yo ku Giba yo nangia ga Saura rago.

35Ka Samuere ayé nga berewe ka bi Saura dati rago kpioko ya, bambiko Samuere arungo gbe tipa Saura. Yekova ki birĩ tiko wa ko amoi Saura ni bakindo ku ri aYisaraere.

← Chapter 14 Jump to: Chapter 16 →