1 Samuel 8

Zande

← Chapter 7 Jump to: Chapter 9 →

1Si adu wa gere, ho Samuere agbinza ni, ko ki moi awiriko ni abasapungbanga ku ri aYisaraere.

2Rimo bambata wiriko nangia Yoere, rimo ue ko ki ngia Abiya; i adu ni abasapungbanga Bera-saba yo.

3Ono ka awiriko apeka nga sinoko ya, i asa tiyo sa kina nyemu diangbiti ahe; ki nirogo marã ni mobirimo, ki niirasi sarangbanga.

4Ga aYisaraere abaakumba ki dungura tiyo dunduko, ki ye koyo du Samuere ni ku Rama yo,

5i ki ya fu ko, “Mo ngére, mo tigamo du ni gbinza ro awere, awiro apeka nga sinoro te; mo mói bakindo awere fu rani ko zogo rani wa kura rikaaboro dunduko.”

6Ono gi pai re agberẽ ti Samuere, ho i aya ni, “Mo mói bakindo fu rani ko zogo rani.” Samuere ki kpari fu Yekova.

7Yekova ki ya fu Samuere, “Mo gí fugo agu aboro re dunduko nga gu i agumba foro; bambiko i agindiga nga ro te, ono i gindiga kina re, ya ka mi du nga ni bakindo ka zoga yo ya.

8Kuti gu mangaapai i amangi dunduko kuti re tona ti gu rago mi akusi yo Ezipeta yo ki da ku areme, ni gu pai i ambu re, ka manga pa kura ambori, kina wo i tigayo amanga ha foro a.

9Awere mo dége turo ka gia fugoyo; ono mo ki fugu pai fu yo kakaka, ki yugu sino gu bakindo fu yo nikazoga yo.”

10Samuere ki gumba agu apai nga ga Yekova dunduko fu agu aboro re nasana ko tipa bakindo.

11Ko ki ya, “Gere nikangia sino gu bakindo nikazoga roni: ko aróga awironi nga akumba, ki ringbisi yo ni gako yo, tipa gako angbagidavura, i ki du ni gako abanduri afarasi, ki nioro barangba gako angbagidavura;

12ko asía agu yo i du ni gako abarutirivura ku ri rikaaboro ni ba kutu, agu yo ni abarutirivura ku ri rikaaboro ni ba bisue bawe, ko afú agu yo i nisópo gako bino ki nike ahe ti regboho, agu yo nikataka gako aũvura, na gako aũngbagidavura.

13Ko aróga agu awironi nga ade i du ni ambakadi fuõngua ni anagbindi, ni anazoriahe a.

14Ko aróga gaoni aati bino, na gaoni aati bakakue, na gaoni aati eraya, nga kina boro gu bawene he, ki nifuku he fu gako amoyambu.

15Ko adía sa dagba bawe nga ga gaoni zende ahe, na ga gaoni aati bakakue, ki nifuku he fu gako abarumbatayo, na fu gako amoyambu a.

16Ko aróga gaoni amoyambu nga akumba na agu yo nga ade a, na gaoni bawene abagara, na gaoni adongi, ki nimoi ra ti gako sunge.

17Ko anidi sa dagba bawe nga ga gaoni rimbasa anya, oni tigaoni adú ni gako akanga.

18Oni akpára ni wawa ni gu rago re be gu gaoni bakindo oni asia ko ni tironi; Yekova akáraga nga pai fu roni ni gu rago te re.”

19Ono aboro ki ka pa dega tuyo sa fugo Samuere; i ki ya, “Ai! ono ani naida kina bakindo ku ri rani,

20ani tigaani ki du wa kura rikaaboro dunduko, gaani bakindo nizógo rani, ki ningbeku mbata yo fu rani a, ki niso gaani vura.”

21Ho Samuere agi ga aboro pai ni dunduko, ko ki gumba ha fu Yekova.

22Yekova ki ya fu Samuere, “Mo dége turo sa fugoyo, ki moi bakindo fu yo.” Samuere ki ya fu aboro a Yisaraere, “Oni gá ni ba sa sa, gu ni kina ku rogo gani bakporo.”

← Chapter 7 Jump to: Chapter 9 →