1 Samuel 13

Zande

← Chapter 12 Jump to: Chapter 14 →

1Garã Saura adu 30 ho ko atona zoga rago ni; ko ki zogo aYisaraere garã ki du ue.

2Saura ki sia aboro fuo ko wa 3,000 nga aboro aYisaraere; dagba yo yo agu yo ki du 2,000 na Saura Mikemasa yo na ringara abaagangara Betere, agu yo ki du 1,000 na Yonatana Giba yo nga ga Benyamina rago; ko ki karaga gu yangara aboro, gu ni ku rogo gani bamburoko yo.

3Yonatana ki mangi gu gbata nga ga aFereseto nga gu naadu Geba yo; aFereseto ki gi he. Saura ki vu nambongo rogo ringara dũ, ki ya, “AEbere gí he.”

4AYisaraere ki gi he dunduko ya Saura mangi gu gbata nga ga aFereseto, na pa du aYisaraere ni gbegberẽ yo bangiri aFereseto. Aboro ki dungura tiyo wa sa fuo Saura ku Girigara yo.

5AFereseto ki dungura tiyo wa sa ka so vura na aYisaraere na angbagidavura 30,000, na abanduri afarasi 6,000, na aborosovura wa kina ngume nga gu du ti ngba gango baime tipa ngehe; i ki da ki zi bataya Mikemasa yo ku uroyo gii Bete-avena yo.

6Ho aboro aYisaraere abi he ni ya i rogo kpakarakpakara ba, bambiko aboro adu ni fudifudi yo, aboro ki nioko tiyo ku siambia yo, na ku rogo agbundu, na ku dagba ambia yo, na ku rogo nyanyaki aba, na ku rogo adue,

7bete aEbere asi Yaradene ku rogo gu ringara nga ga Gada na ga Girada. Ono Saura tigako ko adu kina Girigara yo, aboro ki nipe ko dunduko ki nikio.

8Ko ki sungu tipa rame saba, kina kuti gu rago Samuere aringbisi; ono Samuere aye nga ku Girigara yo te, aboro ki tona ka gbandaka be Saura.

9Saura ki ya, “Oni yé na zozo motumo kono fere, na amotumo zereda.” Ko ki fu zozo motumo.

10Si ki ta du wa gere wa ko adigisi pa tumo ni zozo motumo, oni ngére, Samuere ki da. Saura ki ndu ka gbia ko, ka paa kuti ko.

11Samuere ki ya, “Gini pai mangi mo?” Saura ki ya, “Bambiko mi nibi aboro i nagbandaka be re, ka mo aye nga tigamo ti gu uru mo aringbisi he ya, aFereseto ki dungura tiyo a ku Mikemasa yo,

12si mi aya ti ni, ‘AFereseto nikaye kono du mi ni awere ku Girigara no, ka mi azungadi nga Yekova tipa wenepai ya’; si du mi anyakasi tire ti ni, ki fu zozo motumo.”

13Samuere ki ya fu Saura, “Mo mangi pai ni kina mumungo ho; mo aka nga kuti gu rugute nga ga Yekova ga Mbori te, nga gu ko arugu ro na ni; bambiko awere ka Yekova mbakadi ga zogarago ku ri aYisaraere nye anye kindi.

14Ono awere ga zogarago anyé nga te; Yekova gbata boro ni sa ko wa ngbaduko aida ha; ono Yekova ringbisi ni ni du ni bazogo ku ri gako aboro, bambiko mo aka nga kuti gu pai nga gu Yekova arugu ro na ni te.”

15Samuere ki mo ki guari Girigara yo ki ndu ku Giba yo du rogo ga Benyamina rago. Saura ki gedi agu aboro nadu ho na ko, i ki du wa aboro 600.

16Saura na wiriko nangia Yonatana, na agu aboro nadu ho na yo anye kina Geba yo rogo ga Benyamina rago; ono aFereseto azi bataya Mikemasa yo.

17Abagbuahe ki ye rogo ga aFereseto bataya yo ni rika aboro biata; rikayo sa asa tihe ku ngba gene Ofera yo, sa gu ringara nga Suara,

18kura rikayo ki aria tihe sa gu gene ndu ku Bete-orono yo, kura rikayo ki sa tihe sa gu bangbandarago nangera ku ngboongboorago Zeboima bara ku ngbakungba yo.

19I abi nga pangu rogo ga aYisaraere 11 ngnra te; bambiko aFereseto aya, “AEbere ka taka abasape na abaso”;

20ono aYisaraere dunduko ki ndu koyo du aFereseto in, aboro ni ba sa sa ka beda gayo amarã, na gayo agita, nga gayo amangua, na sunguru;

21ono i adu na arakaya marã a tipa beda sunguru, na tipa agita, na tipa awaza, na tipa amangua, na tipa beda ngbondomarã ruga anya.

22Si du rago vura, i abi nga basape ti ni na baso be agu aboro naadu na Saura na Yonatana a te; ono i abi he be kina aSaura na Yonatana nangia wiriko.

23Gu rikavura nga ga aFereseto ki kuru ki susi ngba gene Mikemasa yo.

← Chapter 12 Jump to: Chapter 14 →