1 Samuel 22

Zande

← Chapter 21 Jump to: Chapter 23 →

1Dawidi ki guari yo tie, ki merẽ ku rogo gu simbia nga Adurama; ho aunvuruako agi he ni na ga bako aborokporo dunduko, i ki ndu koyo du ko ni.

2Agu aboro dunduko nadu ngba pai, na agu yo nadu na bape, na agu yo nadu na imisiri ngbaduse, i ki dungura tiyo koyo du ko ni dunduko; ko ki du ni gayo barumba tayo. Aboro ki du na ko wa 400.

3Dawidi ki guari yo ki ndu ku Misipa yo du Moaba yo; ko ki ya fu bakindo aMoabo wẽ, “Mi nakpara foro, mo ídi fu abuba na nina, i ye kono ki sungu na mo daho mi ka ina gu pai ni Mbori ka mangá ha fere.”

4Ko ki ye na yo ku bangiri bakindo aMoabo, i ki nisungu na ko ku kpuko yo ho Dawidi adu ni rogo nyanyaki ba yo.

5Nebi nangia Gada ki ya fu Dawidi, “Ka mo nyé nga nyanyaki ba yo ya; mo gúari, ki ndu ku ringara Yuda yo.” Si du Dawidi ki guari, ki da ku rogo gu birengua nangia Erete.

6Saura ki gi he ya i bi Dawidi, na agu aboro naadu na ko. Saura asungu Giba yo tii gu angua nga abanza naadu Rama yo, na gako baso be ko, gako amoyambu du ki rundu arunda pati ko kirikiri.

7Saura ki ya fu gu gako amoyambu narundu kirikiri pati ko, “Oni gí he awere, oni nga ngbatunga Benyamina; wiri Yisai afú aati bino na aati bakakue fu roni ni ba sa sa? ko amáa roni dunduko ni abarutirivura nga ga akutu yo na ga akama yo?

8oni dunduko ata bura re ti ni? A nga boro sa nakusi pa gu rago fere wire namanga kidohe na wiri Yisai te, a nga boro sa du na nunga re ti ni dagba roni yo te, watadu kusi pa ha fere ya wire zingisi gi moyambu kuti re, ka pida re, wa du he ni gi uru te re.”

9Doege boro Edome ki karaga ha ki ya, nga gu ko naaru pati ga Saura amoyambu, “Mi abi wiri Yisai ko niye ku Nobo yo, koyo du Aimereke ni wiri Aituba,

10ko ki sana Yekova tipa ko, ki fu aúngba fu ko, ki fu gu basape fu ko nangia ga Goriata gu Fereseto re.”

11Bakindo ki kedi sunge ni ndu ka yamba Aimereke boromotumo, nangia wiri Aituba, na ga bako aborokporo du, nga agu aboromotumo nadu Nobo yo; i dunduko ki ye koyo du bakindo ni.

12Saura ki ya, “Mo gí he awere, mo wiri Aituba.” Ko ki karaga ha ki ya, “Mi du re, gi gbia.”

13Saura ki ya fu ko, “Tipagine oni ata bura re ti ni, mo na wiri Yisai, wa mo afu kpokuta fu ko, na basape a, ki sana Mbori a tipa gako pai, ko zingi azinga kuti re, ka pida re, wa du he ni gi uru re?”

14Aimereke ki karaga ha fu bakindo, ki ya, “Da du nga dagba gamo amoyambu yo ni irarengo wa Dawidi, nga gu ko nga kumba ku wiri bakindo, du ku ri ga gbuu, ki du ni irisiirisi ko rogo ga kporo?

15Tona mi ka sana Mbori areme tipa ko? Ai! Mi are nga na ni te! Ka bakindo gédi nga wiri pai kuti gako moyambu ya, watadu kuti ga buba aborokporo a ya; bambiko ga moyambu aina nga pai tipa agi apai dunduko te re, toni he watadu bakere he a te.”

16Bakindo ki ya, “Aimereke, mo nikakpí akpi ni rengo, mo na ga bamo aborokporo.”

17Bakindo ki ya fu gu babandarago naru pati ko, “Mo sá tiro ka imo agu aboromotumo nga ga Yekova yo; bambiko i zi beyo na Dawidi, bambiko i aini aina ya ko naora aora, ka i akusa nga ha fere ya.” Ono ga bakindo amoyambu aida nga ka taa beyo ka imo ga Yekova aboromotumo te.

18Bakindo ki ya fu Doege, “Mo tigamo sá tiro ka imo aboromotumo.” Doege boro Edome ki sa tiko, ki mangi aboromotumo dũ, ko ki imi aboro ni gu uru re wa 85, nga agu yo naaukadi efoda du ni tutu he ni giri nzibi.

19Ko ki gbarasi Nobo nangia ga aboromotumo bakporo ni basape; akumba na ade, agude na agude ngbamai, abaabagara na anaadongi na akandoro a ni basape.

20Wiri Aimereke sa rimoko angia Abiatara, ki bati ki merẽ fuo Dawidi, Aimereke ki ngia wiri Aituba.

21Abiatara ki gumba ha fu Dawidi ya Saura imi ga Yekova aboromotumo dunduko.

22Dawidi ki ya fu Abiatara, “Mi aini he aina ni gu uru, ho Doege boro Edome adu ni yo, ya ko agumba ha agumba fu Saura. Ono enge pa kpio ga bamo aborokporo ti kina re.

23Mo nyé na mi, ka mo gúnde nga ya; bambiko gu ni nagbata ungare ni nagbata ungaro a; bambiko mo adú na mi ni bandabanda ro.”

← Chapter 21 Jump to: Chapter 23 →