1 Samuel 20

Zande

← Chapter 19 Jump to: Chapter 21 →

1Dawidi ki oro Naiota yo du Rama yo, ki da ru bara bangiri Yonatana, ki ya, “Gini pai mangi mi? Gi irairapai nga gine? Gi ingapai nga gine bangiri bamo, ko agbata ungare ti ni?”

2Ko ki ya fu ko, “Mbori aída nga ha wo te! Mo akpi nga te. Mo ngére, buba namanga nga pai gii bangire te, watadu kikii he na toni he a te; tipagine ka buba oko gi pai ti ni re ti re? Si adu nga wo te.”

3Ono Dawidi azunga he, ki ya, “Bamo ini he wenengaĩ ya ngba mi angba bangiro; si du ko niya ti ni, ‘Ka Yonatana ini nga gere ya, ko ka rungo ku k pot oko yo.’ Ono ni rengo wa du Yekova ni ungako, a wa du mbisimoro ni ungaha, ono bete rago koyo toni mi ki kpi.”

4Yonutana ki ya fu Dawidi, “Gu he mbisimoro akpi nyemu he, mi amánga kina ha foro a.”

5Dawidi ki ya fu Yonatana, “Mo ngére, fogo diwi akúra gba, ka mi mbú nga sunga tigimi na bakindo pati riahe te; ono mo ídi he fere mi ndú, ka gbu ati yo tipa rame biata ku nyemu.

6Ka bamo ngere tipa re vurũ, mo ki ya fu ko, ‘Dawidi azungadi re kakaka ya mi idi he fu ko ko oro ku Betereme yo ku kpuko yo; bambiko si nga rago gu motumo i natumo na ni na agarã tipa angbatungako dunduko.’

7Ka ko ya wẽ. ‘Si ngba!’ ga moyambu ki du zezeredi; ono ka ko zingi azinga, mo ki ini he nga ko nagbata kina gbigbitapai ka manga ha.

8Si du ka mo mangi pai ti ni na ga moyambu ni weneringise, bambiko mo mangi kidohe na ga moyambu fu Yekova. Ono ka irairapai du kpotore yo, kina ro ími re ni sa ro; waĩ ka mo ndu na mi fu bamo berewe?”

9Yonatana ki ya, “Ka si dú nga wo tipa ro ya! Bambiko ka mi niini he nga buba nagbata gbigbitapai kuti ro, ka mi gumba nga ha foro, te?”

10Dawidi ki ya fu Yonatana, “Da nikagumba ha fere si ngia bamo karaga pai foro gbegberẽ?”

11Yonatana ki ya fu Dawidi. “Mo yé ani ndú ku ati yo.” I ki mongo ndu ku ati yo.

12Yonatana ki ya fu Dawidi, “Yekova nga ga aYisaraere Mbori dú ni dezire he! Ho ka mi asadi buba ni gba ti saa wa gere, watadu ti biata rame, mo ngére, ka wenepai du ho tipa ro, mi kédi nga pai foro, te? ki yugu he foro, a te?

13Ono Yekova mángi he wo fu Yonatana, ki susi gure a, ka buba akpi nyemu ka manga ro gbegberẽ, ka mi akúsa nga ha foro, ki kedi ro ku sa yo, mo ndú zezeredi, ya. Yekova dú na mo, a wa ko adu na buba.

14Ka mo ayugo nga weneringise fere nga ga Yekova kina ho du mi ni ni ungare ya, ka mi kpi nga ya;

15ono ka mo kpara nga ga weneringise ti angbatungare nye anye kindi ya; na ti gu rago ka Yekova do avura Dawidi ni dunduko rogo arago auru kpotosende a ya.”

16Si du Yonatana ki mangi kidohe na angbatunga Dawidi, ki ya, “Yekova íri bape ti avura Dawidi.”

17Yonatana ki ya Dawidi zunga he berewe, bambiko gu nyemuse nadu ti ko sa Dawidi; bambiko ko akpi nyemu ko wa ko nakpi nyemu kina mbisimoko.

18Yonatana ki ya fu ko, “Fogo diwi adú gba; i ka ngera ti ro vurũ, bambiko ba ro adú ni ku he.

19Ho mo ka ra ni koyo biata, mo ki guari ni ipo, ki da rogo gu ba mo agbu ni mbata ni gu rago pai amangi, ki nye kina pati gu mbia nga Ezere.

20Mi tigimi abá aguanza biata ku bani tie, wa ka mi zumu he kuti ringbisiringbisi he.

21Si du, mo ngére, mi akéda gude, ki ya, ‘Mo ndú ka ngera ti aguanza.’ Ono ka mi ya fu gude, ‘Mo ngére, aguanza du pati ro kono re, mo rogo ra, ki ye na ami,’ mo ki ye, si ngia zereda du foro, kere pai te, a wa du Yekova ni ungako.

22Ono ka mi ya fu gude wẽ, ‘Mo ngére, aguanza du ku mbata yo foro’, mo ki ndu; bambiko Yekova kedi ro ku sa yo.

23Ono tipa agu apai ani afura tipa ha na mo, mo ngére, Yekova du dagba rani na mo nye anye kindi.”

24Si du Dawidi agbu ti ni kina ati yo kindi; ho fogo diwi akuru ni, bakindo ki sungu ka ri riahe.

25Bakindo ki sungu ri gako basunga a wa ko anamanga mbata, kina auru gu basunga nadu pavuru bambu yo. Yonatana aru aru ku ari, Abinera ki sungu pati Saura, ono ga Dawidi basunga ki du adu ni ku he.

26Wa si avura du wo Saura agumba nga pai ni gu uru te re; bambiko ko aberẽ he ya, “Pai mangi ko, si ngia ko gigiri te, ni rengo ko gigiri te.”

27Fuo girarago ti ue uru ti fogo diwi, ga Dawidi basunga ki du ni kina ku he. Saura ki ya fu Yonatana nangia wiriko, “Tipagine wiri Yisai aye nga ti ni sa riahe gba na areme a ya?”

28Yonatana ki karaga ha fu Saura ki ya, “Dawidi azungadi re kakaka mi idi he fu ko ko ndu ku Betereme yo;

29ko aya, ‘Mi nakpara foro, mo ídi he fere mi ndú; bambiko angbatungare nafu motumo bakporo yo, unvuruami arugu re ya mi du kina yo. Ono awere, ka mi ngba bangiro, mi nakpara foro mo ídi he fere mi gúari, ka ndu ka bi awirinami.’ Si ko aye nga ti ni ku pati ga bakindo mbisa ya.”

30Ga Saura zinga ki rungudi kuti Yonatana, ko ki ya fu ko, “Mo wiri kere de nga irasamungu, mo aina nga ha tigamo ya mi ini he ya mo sia wiri Yisai tipa ga wasiro na tipa gu zee nga ga kundiri namo a, te?

31Bambiko wa du wiri Yisai ni ungako rogo gi zegino re, pa ro anyaka nga berewe te, ga ngbi a te. Wa du he were, mo kédi sunge i ye na ko kono du mi ni, bambiko ko nikakpí akpi ni rengo.”

32Yonatana ki karaga ha fu bako nga Saura, ki ya, “Tipagine i ka imo ko ti ni? Gini pai mangi ko?”

33Ono Saura ki zumu ko na gako baso ka so ko; si au Yonatana aini he ti ni ya bako zadi pai kuti Dawidi kindi ka imo ko.

34Si du Yonatana ki guari pati mbisa ni bakere zinga, ka ko ari nga riahe ti gu ue uru nga ga diwi ya, bambiko ko arungo arungo ku kpotoko yo tipa Dawidi, bambiko bako amangi pa zee fu ko.

35Yonatana ki ndu ku ati yo wiso ti kina gu rago i aringbisi he na Dawiai, na toni gude fuo ko.

36Ko ki ya fu gako gude, “Mo óro, ka gbata agu aguanza mi akaba ra.” Wa gude aoro, ko ki ba guanza ku mbata yo.

37Ho gude aye ni ku rogo gu ba Yonatana aba guanza ku ho ni, Yonatana ki poi ku ari fu gude, ki ya, “A nga guanza ku mbata yo foro, te?”

38Yonatana ki poi ku ari fu gude berewe ki ya, “Mo óro ni ipo, ka mo rú nga ya.” Ga Yonatana gude ki dungura aguanza, ki ye koyo du bairako ni.

39Ono gude aina nga gu pai te re; kina aYonatana naini he na Dawidi.

40Yonatana ki fu gako kpokoro na mboto fu gako gude, ki ya fu ko, “Mo tíndi he ki ga ku bakporo yo.”

41Wa gude aga, Dawidi ki guari ho ko agbu ni ku sudiyo, ki ti ku sande ni kpakpuko, ko ki nugadi bara biata; i ki dungo tiyo, ki nikpari ni aume dagba yo, daho ga Dawidi kpe asusi asusa ni.

42Yonatana ki ya fu Dawidi, “Mo ndú zezeredi, bambiko wa ani amongo zunga he dagba rani nyanyaki ti rimo Yekova, niya, ‘Yekova dú dagba rani na mo, na dagba angbatungare na ngbatungaro a, nye anye kindi.’ ” Ko ki guari ka ga; Yonatana ki karaga tiko ku bakporo yo.

← Chapter 19 Jump to: Chapter 21 →