1 Samuel 5

Zande

← Chapter 4 Jump to: Chapter 6 →

1Ho aFereseto adi ga Mbori sanduki ni, i ki di he Ebenezere yo ki ye na ni ku Asedodo yo;

2aFereseto ki di ga Mbori sanduki ki ye na ni ku tii ga Dagona bambu yo, ki moi he pati Dagona.

3Ho aboro azingi ni Asedodo yo ngbatutu wiso, oni ngére, Dagona ati ni vagadivagadi he ni kpakpuhe ku sande barangba ga Yekova sanduki. I ki di Dagona ki dua ha ku ba ha berewe.

4Ono ho i azingi ni ngbatutu wiso, oni ngére, Dagona ati ni vagadivagadi he ni kpakpuhe ku sande barangba ga Yekova sanduki, ri Dagona na kpatabehe ue apiki ni kuadikuadi he ti ba rima ku dimo yo; kina ngbakutukpa Dagona ki nye.

5Si du ga Dagona aboromotumo na agu aboro nanarima ku tii ga Dagona bambu yo, i asi nga ba rima ku dimo ku Dagona yo Asedodo yo ti ni berewe daku areme ya.

6Ono be Yekova adu ni rõrõi he ku ri aboro Asedodo, ko ki gundesi yo, ki mangi yo na kere anangito, nga agu yo naadu Asedodo yo na gaha ringara.

7Ho aboro Asedodo abi he ni ya wo du he, i ki ya, “Gu sanduki nga ga ga aYisaraere Mbori ka si nyé nga be rani ya; bambiko beko du ku ri rani ni kpio, na ku ri Dagona gaani mbori a.”

8Si du i akedi sunge ti ni ki dungura agbia aFereseto koyo du yo ni dunduko, ki ya, “Gini pai ani ka manga na gu sanduki nga ga ga aYisaraere Mbori?” I ki karaga ha ki ya, “I tindi gu sanduki nga ga ga aYisaraere Mbori ku Gata yo.” I ki tindi gu sanduki nga ga ga aYisaraere Mbori koyo.

9Ono fuo tinda yo ho koyo, be Yekova adu ku ri gu bakporo re na bakere rungosiro gbe, ko ki mangi aboro gu bakporo re, nga aparanga na gbinza aboro a, anangito ki nikuru ti yo.

10Si du i akedi ga Mbori sanduki ti ni ku Ekurone yo. Ono ho ga Mbori sanduki ada ni ku Ekurone yo, aboro Ekurone ki poi ku ari, niya, “I ye na gu sanduki nga ga ga aYisaraere Mbori kono du ani ni, si imi rani na gaani aboro a.”

11Si du i akedi sunge ti ni ki dungura agbia aFereseto dunduko, ki ya, “Oni kédi gu sanduki nga ga ga aYisaraere Mbori ku sa yo, si gá berewe kina ku baha yo, ka si aímo nga rani na gaani aboro ya.” Bambiko bakere rungosiro amangi aboro dunduko rogo gu bakporo re sa kina kpio. Be Mbori adu ni barõrõi he ku ri yo;

12agu aboro nakpika nga ya, gu kere anangito re ki kukuru ti yo; kpe bakporo ki da ku ngbangbaturũ yo.

← Chapter 4 Jump to: Chapter 6 →