1 Samuel 18

Zande

← Chapter 17 Jump to: Chapter 19 →

1Ho ko adigisi gumba pai ni fu Saura, mbisimo Dawidi ki ngba ti mbisimo Yonatana, Yonatana ki nikpi nyemu ko wa kina boro mbisimoko.

2Saura ki di ko ti kina gu uru re, ka ko aida nga ko ga ku kpuyo yo ku bako yo berewe ya.

3Yonatana ki mangi kidohe na Dawidi, bambiko ko akpi nyemu ko wa kina boro mbisimoko.

4Yonatana ki uru gu gako gbanga roko nadu ti ko, ki fu he fu Dawidi, na gako ũvura, gbia kuti boro gako basape, na gako mboto na gako giri dimose a.

5Dawidi ki nindu kina ku ho Saura anakeda ko ku ho ni, ki nimángi gako apai wenengaĩ ni tatamana; Saura ki moi ko ku ri abasovura. Si ki ngba angba bangiri aboro dunduko, na bangiri avuru Saura a.

6Si ki ta du wa gere wa i ayega, ho Dawidi akaraga tiko ni gene imo aFereseto yo, ade akuru rogo agu abaakporo dunduko nga ga aYisaraere, ki ta bi bia nido gbere, ka gbia Bakindo Saura, na agaza, na abia ngbarago, na sagiru a du na girihe biata.

7Ade ki nikaraga bia dagba yo nitaki gayo ũworoahe du na gire, ki niya, “Saura aimi gako yo wa aboro akutu, ga Dawidi yo ki du wa aboro akutu bawe.”

8Saura ki zingi azinga gbe, gi pai re ki gberẽ ti ko, ko ki ya, “I ringbisi aboro fu Dawidi nga akutu bawe, ono i ringbisi yo fere wa akutu gbua; gini kura he ko ka dia fuo kina gi ngbi?”

9Saura ki nimoi berã ti Dawidi tona ti gu rago re na ku mbata yo kindi.

10Fuo girarago gbigbita toro ki ye be Mbori na bakere tandu ku ri Saura, ko ki nigumba agu apai wa nebi dimo kpuko yo, Dawidi ki nitaki kundi, wa ko anamanga ha na uru. Saura adu na gako baso be ko;

11Saura ki zumudi gu baso re, bambiko wa ko aberẽ he, “Mi asó Dawidi kina kuti vuro bambu.” Ono Dawidi aneke he bara ue.

12Saura ki nigunde be Dawidi, bambiko Yekova adu na ko, ono Yekova aguari pati Saura.

13Si du Saura akpara ko ti ni pati ko, ki moi ko ni gako barutirivura ku ri aboro 1,000; ko ki nita kura tipa apai niyega berewe ku bangiri aboro.

14Dawidi ki nimángi gako apai dunduko ni tatamana; Yekova adu na ko.

15Ho Saura abi he ni ya ko namanga gako apai dunduko ni tatamana, iriwo Dawidi ki niti ati ti ko.

16Ono aYisaraere na aYudo dunduko akpi nyemu Dawidi gbe; bambiko ko anita kura tipa apai niyega berewe ku bangiriyo.

17Saura ki ya fu Dawidi, “Mo ngére, bambata wire ni de nga Meraba; ri mi afú ri foro ni diaro; kina ro ki du fere ni gi ngangarã boro, ka aso ga Yekova vura.” Bambiko Saura aberẽ he ya “Ka bere dá nga ti ko ya, ono kina be aFereseto zi ko.”

18Dawidi ki ya fu Saura, “Da nga mi, ada nga agumere, da nga angbatunga buba dagba aYisaraere, ka mi du ni kumba ku wiri bakindo?”

19Ono ho rago ada ni Saura fu wiriko nga Meraba fu Dawidi, ko afu ri fu Adiriere nangia boro Meora ni diako.

20Ono Mikara wiri Saura akpi nyemu Dawidi; i ki gumba ha fu Saura, gu pai re ki ngba ti ko gbe.

21Saura ki berẽ he ya, “Mi afú ri fu ko, ri du ni nzingiri pai fu ko, si du wo be aFereseto dú kuti ko.” Si du Saura aya ti ni fu Dawidi berewe, “Mo nikadu ni kumba ku wire awere.”

22Saura ki rugu gako amoyambu, ki ya, “Oni gúmba ha fu Dawidi ni rondo, ki ya, ‘Mo ngére, ngba mo bangiri bakindo gbe, avuruko nakpi nyemu ro dunduko; wa du he were mo dú ni kumba ku wiri bakindo tie.’”

23Ga Saura amoyambu ki gumba agu apai re fu Dawidi. Dawidi ki ya, “Si bangironi nga tataa pai ka du ni kumba ku wiri bakindo, wa du mi tigimi ni rungorungo boro nga irisiirisi boro a te?”

24Ga Saura amoyambu ki gumba ha fu Saura, ki ya, “Dawidi nigumba pai wa gere.”

25Saura ki ya, “Were oni ka gumba ha fu Dawidi, ‘Bakindo akpi nga nyemu marã diade te, ono kina yera pito aFereseto 100 ka ira bape ti avura bakindo.’ ” Saura aberẽ he were ka manga Dawidi ko kpi be aFereseto.

26Ho gako amoyambu agumba agi apai ni re fu Dawidi, si ki ngba ti Dawidi gbe ka du ni kumba ku wiri bakindo. Rame he adiga nga te,

27Dawidi ki guari ka ndu, ko na gako akumba, ki imi aboro dagba aFereseto yo wa aboro 200; Dawidi ki ye na kpoto pitoyo, i ki fu he dũ fu bakindo wa gedigedi yo adu, ya ko du ni kumba ku wiri bakindo. Saura ki fu wiriko nangia Mikara fu ko ni diako.

28Saura ki bi he ki ini he ya Yekova du na Dawidi, Mikara nangia wiri Saura ki nikpi nyemu Dawidi,

29Saura ki nigunde be Dawidi ki susi gu naadu mbata. Ono Saura adu ni vura Dawidi kindi.

30Abazogo nga ga aFereseto yo ki kuru sa vura, si ki ta du wa gere, wa i anakura, Dawidi ki nimangi gako pai ni tatamana ki susi avuru Saura dunduko; si du rimoko awo awo ti ni gbe.

← Chapter 17 Jump to: Chapter 19 →