1 Samuel 28

Zande

← Chapter 27 Jump to: Chapter 29 →

1Ni agu arago re aFereseto adungura gayo aborovura tipa sovura, ka so vura kuti aYisaraere. Akisa ki ya fu Dawidi, “Mo ini he ni rengo, ya ani nikandu na mo dagba rimbasa vura, mo na gamo aboro.”

2Dawidi ki ya fu Akisa, “Wo du he, mo aína gu pai rengbe vururo ka manga ni rengo.” Akisa ki ya fu Dawidi, “Wo du, mi amáa ro ni babanda re nye anye kindi.”

3Ono Samuere aima kpi, aYisaraere dunduko akpari ko gbe, nita ngbaduyo ki kpisidi ko Rama yo, rogo gako bakporo. Saura akusi agu aboro nga agu yo naadu ni agumba sangbaatoro, na airamangu rogo gu ringara re.

4AFereseto ki dungura tiyo, ki ye ki zi bataya Sunema yo; Saura ki dungura aYisaraere dunduko, i ki zi bataya Giriboa yo.

5Ho Saura abi gu rimbasavura ni nga ga aFereseto, ko ki nigunde agunde, kpotoko yo ki nikio akio bakere.

6Ho Saura asana Yekova ni, ka Yekova akaraga nga pai fu ko ya, rogo musumo yo, watadu be Urima, na ku ngba anebi a ya.

7Saura ki ya fu gako amoyambu, “Oni gbáta gu de fere nagumba sangbaatoro, mi ndú koyo du ri ni, ka sana ri tipa pai.” Gako amoyambu ki ya fu ko, “Mo ngére, de du Ene-doro vo ninagumba sangbaatoro.”

8Saura ki biriki tiko ki ukadi kura roko, ko ki ndu, ko na aboro ue fuo ko; i ki da yo du gu de ni re yuru. Ko ki ya, “Mi nakpara foro, mo sóroka fere, be sangba ga toro gumbapai, mo kúsi gu boro fere mi ka yamba rimom foro.”

9Gu de re ki ya fu ko, “Mo ngére, mo tigamo ini gu pai Saura amangi, wa ko arogo agu yo ku sa yo naadu ni agumba sangbaatoro, na airamangu, rogo gi ringara re. Tipagine mo tigamo amanga pai ti ni ni nzingiri pai tipa ungare, ka imo re?”

10Saura ki zunga he fu ri ku bangiri Yekova, ki ya, “Wa du Yekova ni ungako, mbusa adú nga ho foro tipa gi pai re te.”

11Gu de re ki ya, “Da mi akakusa ni foro?” Ko ki ya, “Mo kúsi Samuere fere.”

12Ho gu de re abi Samuere ni, ri ki poi ku ari ni bakere fugo; gu de re ki gumba pai fu Saura, ki ya, “Tipagine mo ninangi re ti ni? Wa du mo nga Saura.”

13Bakindo ki ya fu ri, “Ka mo gúnde nga ya; gine bi mo?” Gu de re ki ya fu Saura, “Mi bi he wa mbori si nikuru sende yo.”

14Ko ki ya fu ri, “Gini kpiahe du he wa ha?” Ri ki ya, “Kuru gbinza kumba nakura; ko ni ukadiukadi ko na gbanga roko.” Saura ki ini he nga Samuere du, ko ki nugadi ni kpakpuko ku sende, ki tumusa.

15Samuere ki ya fu Saura, “Tipagine mo afuda re ti ni i kusi re ku zegi no?” Saura ki karaga ha ki ya, “Mi ni fudifudi re gbe ni rengo; bambiko aFereseto naso vura kuti re, ono Mbori guari ti re, ka ko akaraga nga pai fere berewe ya, watadu ku ngba anebi, na rogo musumo a ya; si du yambu mi ro ti ni, mo yúgu gu pai fere tie nga gu mi akamanga.”

16Samuere ki ya, “Tipagine mo asana re ti ni, wa ini mo ho nga Yekova guari ti ro, ki sa tiko ni vuraro?

17Ono Yekova namanga pai tipa ro, wa ko agumba ha ku ngbare; bambiko Yekova di ngbi be ro, ki fu he fu kuaro, nga Dawidi.

18Bambiko mo agia nga sangba Yekova te, ka mo amanga nga pa gako ngariangaria zinga kuti aAmareko a ya, si du mangi Yekova gi pai re ti ni foro areme.

19Ku ri agi apai re Yekova afú roni na aYisaraere ku be aFereseto. Gba mo tigamo asúnga na mi na awiro nga akumba a; Yekova afú gu rimbasavura nga ga aYisaraere ku be aFereseto a.”

20Saura ki ti ni ba sa na omeko dũ ku sande, ki du na kere gunde be agu apai nga gu Samuere agumba, ka ome adu nga rogo ko yo berewe ya, bambiko ko ari nga riahe ni gu uru dunduko te re, watadu yuru a dunduko te.

21Gu de re ki ye koyo du Saura ni, ki bi he ya pai nafuda ko gbe, ri ki ya fu ko, “Mo ngére, ga moyambu nigi sangbaro; mi mbu ungare ku be ro, ki gi agu apai nga gu gumba mo fere.

22Mi nakpara foro awere, mo dége turo sa fugo ga moyambu; mo ídi ne fere mi moi bete riahe barangba ro; mo ri he, mo ki du na ome, ho mo ka ga ni ngba ga gene.”

23Ono ko ki ka aka, ki ya, “Mi arí nga he te.” Ono gako amoyambu ki dungura tiyo na gu de re ka sosoda ko; ko ki gi fugoyo. Si du ko ki guari sande, ki sungu ri barame.

24Ono wiri bagara adu ni nzenze ru be gu de re kpuri ho, ri ki ipisi tiri ki imi ru, ri ki di ngungo ki fio ho, ki zo kpokuta na ni zanga agbooro ti ni,

25ri ki ye na ni ku barangba Saura na ku barangba gako amoyambu a; i ki ri he. I ki guari ku ari, ki ga ni gu yuru re.

← Chapter 27 Jump to: Chapter 29 →