1 Samuel 30

Zande

← Chapter 29 Jump to: Chapter 31 →

1Ho Dawidi ada ni na gako aboro ku Zikeraga yo ti biata rame, aAmareko aima gbu ahe Negebe yo, na Zikeraga yo a. I amangi Zikeraga amanga gbe, ki zo ho ni we.

2I azi ade ni zizi yo na agu aboro naadu yo dunduko, rukutu yo na kikindigi yo; i aimo nga gu ni sa te, ono kina ga aga na yo, ki nindu gayo nduge.

3Ho Dawidi ayega ni ku bakporo yo na gako aboro, i abi he i ima zo ho, adiayo na awiriyo nga akumba na ade a, i aga na yo ni zizi aboro.

4Dawidi na agu akumba naadu na ko ki poi ku ari ki nikpari ni aume, daho ome adu nga ni ti yo sa kpe berewe ya.

5AAmareko azi adia Dawidi ue ni zizi yo, nga Ainoama boro Yizerere, na Abigaira dekurugbo Nabara boro Karumera.

6Dawidi ki du ni fudifudi ko gbe; bambiko aboro agumba pa sopa ko ni ambia, bambiko aboro dunduko arungo toroyo yo, aboro ni ba sa sa ki nirungo tipa awiriyo nga akumba na ade. Ono Dawidi ki nyakasi tiko rogo Yekova gako Mbori yo.

7Dawidi ki ya fu Abiatara nangia boromotumo, wiri Aimereke, “Mo yé na efoda fere kono.” Abiatara ki ye na efoda koyo du Dawidi ni.

8Dawidi ki sana Yekova, ki ya, “Mi dó fuo gi rikavura re? Mi agbia yo?” Ko ki karaga ha fu ko ki ya, “Mo dó fuo yo; bambiko mo agbia yo agbia ni rengo, mo ki yega na yo dunduko.”

9Si du Dawidi ki ndu, ko na agu akumba naadu fuo ko 600, ki da ti gu wiridi nangia Besora, yo agu yo i ambu yo sa no asungu ni.

10Ono Dawidi ki nido fuo aAmareko kindi, ko na aboro 400; bambiko 200 asungu sa no, nga agu yo naarungbura ka i arengba nga nasi gu wiridi nga Besora ya.

11I ki bi boro Ezipeta haurago yo, ki ye na ko fu Dawidi; i ki fu riahe fu ko, ko ki ri he, i ki fu ime fu ko ko mbiri he,

12i ki fu wiri mekemeke he fu ko nga ga vurumo, na kpura ugu rindi kakue ue. Ho ko ari he ni, toroko ki yega; bambiko ko ari nga riahe te, ki mbiri wiri ime a te, uru ki du biata na yuru a biata.

13Dawidi ki ya fu ko, “Vuru da nga mo? Wari ye mo ni?” Ko ki ya, “Mi nga paranga boro Ezipeta, ni vuru gu boro Amareko; bairare ki mbu re, bambiko rame biata susi mi adu na kaza.

14Ani du naagbu ahe ku pati aKereto ku Negebe yo, na ku rogo gu rago a nga ga Yuda, na ku Kareba yo ku Negebe yo; ani ki zo Zikeraga na we.”

15Dawidi ki ya fu ko, “Mo andú na mi koyo du gu rikavura re ni?” Ko ki ya, “Mo zúnga he fere ku bangiri Mbori, ya mo aímo nga re te, watadu fú re ku be bairare a te, si du mi ka ndu na mo ti ni sa gu rikavura re.”

16Ho ko andu ni na ko koyo, oni ngére, i agbandaka agbandaka dunduko tuturũ rogo ringara, ki ta ri riahe nimbiri he, ki do gbere, bambiko gu dungu gbugbu ahe dunduko nga gu i arogo rogo ga aFereseto ringara na ringara Yuda yo a.

17Dawidi ki mangi yo tona nziinzii rago ki da k uti k ura uru nyemu; ka boro amerã nga dagba yo yo sa ya, kina aparanga 400 naoro, nga agu yo nandu ri akameri.

18Dawidi ki karaga agu ahe dunduko nga gu aAmareko arogo; Dawidi ki batasi adiako ue.

19He akpa nga be yo te, watadu toni he na bakere he te, awiriyo nga akumba na agu yo nga ade te, gbugbu ahe te, na agu ahe i agbu he a te; Dawidi ki yega na ni dunduko.

20Dawidi ki zi rimbasa akandoro dunduko, na rimbasa zogozogo anya; aboro ki nigasi agu ra ku mbata yo fu ko, ki ya, “Agi ra re nga ga Dawidi gbugbu ahe.”

21Dawidi ki yega fuo agu aboro 200 re, naadu ni rurungbura yo ka i arengba nga na pe fuo Dawidi ya, nga agu yo ko ambu yo i nye pati wiridi Besora. I ki kuru k a ndu ka gbia Dawidi, na ka gbia agu aboro naadu na ko. Ho Dawidi ambeda ni na aboro, ko ki poi kuti yo.

22Gbegberẽ aboro ki karaga pai nangia gu gbegberẽ mho aboro, dagba agu yo yo naandu na I Viwidi, ki ya, “Bambiko wa i andu nga na mu ya, ani afú nga he fu yo dagba gu gbugbu ahe yo nga gu ani akaraga te, kpara kina dere aboro na awiriyo fu yo wa du yo in ba sa sa, i ndu na yo ki ga.”

23Dawidi ki vu. “Oni amánga nga ha wo te, awirinami, mi agu ahe Yekova nifu fu rani te; nga gu ko naabanda rani, ki fu gu rikavura ku be rani nga gu naaye sa rani.

24Da nikadega tuni fu roni sa gi pai re? Bambiko wa gu boro ka dia mosoro naandu sa vura, kina wo ga gu ni mosoro ka du nga gu ni nasungu pati ahe; i aróga mosoro kina sa.”

25Si ki du kina wo tona ti gu uru re ku mbata yo, ko ki mangi he ni rugapai na ni ndika fu aYisaraere, ki da ku awere.

26Ho Dawidi ada ni ku Zikeraga yo, ko ki kedi bete gbugbu ahe fu abadiako na fu abaakumba aYudo, ki ya, “Oni ngére, gamahe du re fu roni dagba gu gbugbu ahe yo nga ga avura Yekova”;

27si adu fu agu yo naadu Betere yo, na ku Ramota du Negebe yo, na ku Yatira yo;

28na ku Aroere yo, na ku Sifemota yo, na ku Esetemoa yo,

29na ku Rakara yo, na fu agu yo naadu rogo agu abaakporo nga ga aYeramere, na fu agu abaakporo nangia ga aKeno;

30fu agu yo nadu Oruma yo, na ku Kora-asana yo, na ku Ataka yo,

31na ku Eburone yo a, na ku rogo agu arago dunduko Dawidi anaandu nduge ku ho ni na gako aboro.

← Chapter 29 Jump to: Chapter 31 →