1 Samuel 19

Zande

← Chapter 18 Jump to: Chapter 20 →

1Saura ki gumba pai fu wiriko nga Yonatana na fu gako amoyambu dunduko, ya i imi Dawidi. Ono Dawidi angba angba ti Yonatana wiri Saura ni rengo.

2Yonatana ki gumba ha fu Dawidi, ki ya, “Buba nga Saura nagbata ro ka imo ro; si du mi nazungadi ro awere mo bánda tiro wiso, ki nye kina bagbuko yo, ki oko tiro;

3mi nikandu ka ru pati buba ati yo kina bara ho mo ka du ni, ani afúra na buba tipa pa ro; ka mi gi pai, mi agúmba ha foro.”

4Yonatana ki nigumba wene apai tipa Dawidi fu bako nangia Saura, ki ya fu ko, “Ka bakindo íngi nga pai kuti vuruko nga Dawidi ya; bambiko ko ainga nga pai kuti ro te, bambiko gako mangaapai foro ni kina wene he gbe;

5bambiko ko aidi ka baga kpioko ki imi gu Fereseto re, Yekova fu bakere diabese fu aYisaraere dunduko. Mo abi he a, rago ki ngba angba ti ro; tipagine tie mo aye ka inga pai ti ni kuti kure ruru boro, ka imo Dawidi zanga ndupai?”

6Saura ki gi sangba Yonatana; Saura ki zunga he, ki ya, “Wa du Yekova ni ungako, i aimo nga Dawidi te.”

7Yonatana ki yambu Dawidi, Yonatana ki yugu agu apai re fu ko dunduko. Yonatana ki ye na Dawidi koyo du Saura ni, ko ki du ku bara bangiriko a wa ko adu mbata.

8Vura ki kuru berewe; Dawidi ki ndu ki so vura na aFereseto, ki imi yo ni dungu yo, i ki oro be ko.

9Gbigbita toro ki ye be Yekova ku ri Saura, wa ko asungu dimo kpuko yo na gako baso be ko; Dawidi ki nita kundi.

10Saura ki asadi ka so Dawidi ni baso kina kuti vuro bambu; ono ko ki birikpo bara bangiri Saura, ko ki so kina vuro bambu ni baso. Dawidi ki oro, ki merẽ ni gu yuru re.

11Saura ki kedi asunge ku Dawidi yo, i pidi ko, Saura imi ko wiso. Mikara nangia dia Dawidi ki gumba ha fu ko, ki ya, “Ka mo abátasa nga ungaro areme yuru ya, i aímo ro gba.”

12Si du Mikara ki zogo Dawidi ti bangiri bambu; ko ki oro, ki merẽ.

13Mikara ki di kpiahe nga terafima, ki pigi he auru ba, ki moi mangu na mange ameme rogo ho ku ba ri he, ki dadi he na aroko.

14Ho Saura akedi asunge ni i zi Dawidi, ri ki ya, “Ko nawoka awoka.”

15Saura ki kedi asunge berewe i ndu ka bi Dawidi, niya, “Oni yé na ko na gako ba, mi imi ko.”

16Ho asunge ada ni ku dimo yo, oni ngére, kina kpiahe nga terafima ki du auru ba na mangu na mange ameme rogo ho ku ba ri he.

17Saura ki ya fu Mikara, “Tipagine nangi mo re ti ni were, ki mbu vurare ko merẽ, bati ko ti ni?” Mikara ki karaga ha fu Saura ki ya, “Ko aya fere, ‘Mo ídi he fere mi merẽ; tipagine ka mi imi ro ti ni?’ ”

18Si du Dawidi ki oro ki merẽ, ki ye koyo du Samuere ni Rama yo, ki gumba agu apai fu ko dunduko nga gu Saura amangi ko na ni. I ki ndu na Samuere ki raki Naiota yo.

19I ki gumba ha fu Saura, ki ya, “Mo ngére, Dawidi du Naiota yo du Rama yo.”

20Saura ki kedi asunge i zi Dawidi; ho i abi gu rika anebi ni i nitungusi pai, Samuere ki ru ni bakumba ku ri yo, ga Mbori Toro ki ye ku ri ga Saura asunge, i ki tungusi pai a wo.

21Ho i agumba pa ha ni fu Saura, ko ki kedi kura asunge, i tigayo ki tungusi pai a wo. Saura ki kedi kura asunge berewe ni biata yo, i ki tungusi pai kina wo a.

22Ko ki guari ni tiko ka ndu ku Rama yo, ki da pati gu bakere guga naadu Seku yo; ko ki sana he ki ya, “Wari du aSamuere ni na Dawidi?” Boro sa ki ya, “Mo ngére, i du Naiota yo du Rama yo,”

23Ko ki guari yo ki ndu ku Naiota yo du Rama yo; ga Mbori Toro ki ye ku ri ko a, ko ki ta ndu mbata yo nitungusi pai wa nebi, daho ko ada ni Naiota yo du Rama yo.

24Ko ki uru gako aroko, ko ki tungusi pai wa nebi barangba Samuere a, ki pi sande ni kundiri ko ni gu uru re na yuru a ki da ku wiso. Si du i aya ti ni, “Saura dagba anebi yo a?”

← Chapter 18 Jump to: Chapter 20 →