2 Kings 10

Zande

← Chapter 9 Jump to: Chapter 11 →

1Were awiri Aba ni akumba adu Somorona yo wa 70. Yeu ki ke awaraga, ki kekedi he ku Somorona yo fu agu abazogo nga ga Yizerere yo, fu kina abaakumba, na fu agu yo nabanda awiri Aba, ki ya,

2“Wa gi waraga re ka da koyo du oni ni, wa du awiri bairaroni na kina roni, angbagidavura na afarasi ki du kina yo a, na bakporo ngapa a, na auvura,

3oni sia gu bawene ni nga gu ni ngba dagba awiri bairaroni yo, ki moi ni ku auru ga bani mbatabakindo. Oni ki so vura tipa ngbatunga bairaroni.”

4Ono i agunde agunde ki susi, ki ya, “Oni ngére, wa abakindo ue aru nga barangba ko ya: ani awira pa ru waĩ?”

5Gu ko nadu ri ga bakindo aborokporo, na gu ko nadu ku ri bakporo, na abaakumba, na agu yo nabanda awiri Aba a, i ki kedi sunge koyo du Yeu ni, ki ya, “Ani nga gamo amoyambu, ani amánga kina agu apai dunduko mo aya ani mángi he. Ani amáa nga boro ni bakindo te. Mo mángi gu pai ngba bangiro.”

6Yeu ki ke waraga fu yo ni ue he, ki ya, “Ka oni du ni gimi aboro, ka oni idi ka gia sangbare a, oni káfu ri awiri bairaroni ti yo, ki ye kono du mi ni ku Yizerere no gba ti saa wa gere.” Were agu awiri bakindo re naadu 70, i adu ku bakindigi aboro yo nangia ga bakporo yo, nga agu yo namou ti yo.

7Si adu wa gere, ho waraga aye ni fu yo, i ki rogo awiri bakindo, ki imi yo, wa aboro 70, ki mamoi ariyo ku rogo abaga, ki kedi he fu Yeu ku Yizerere yo.

8Ho sunge aye ni, ki gumba ha fu ko, ki ya, “I ye na ri awiri bakindo,” Yeu ki ya, “Oni moi he ni guguda ue pa ngbadimo bakporo yo ki da ku wiso.”

9Si adu wa gere wiso, ko ki kuru, ki ru, ki ya fu aboro dunduko, “Bape ku ri roni te. Mi ni tire ata bura kuti bairare, ki imi ko; ono da imi agi yo re dunduko?

10Oni ini he awere ya a nga wiri pai ho sa nga ga Yekova nikati ku sande gbua te, nga gu pai Yekova agumba tipa ngbatunga Aba; bambiko Yekova mangi gu pai ko agumba ku ngba gako moyambu nangia Eriya.”

11Si du Yeu aimi agu aboro ti ni dunduko nanye nga ngbatunga Aba Yizerere yo, na gako bakindigi aboro du na abadiako, na gako aboromotumo, daho ko ambu nga gu ni ni sa ya.

12Yeu ki tona ka ndu ku Somorona yo. Wa ko andu ngba gako gene ko ki gbia tiko na awirina Azaya nangia bakindo aYudo, pati Bambu Kpemangeanya nga ga Ababanda akandoro. Ko ki ya fu yo, “Ada nga oni?” I ki karaga ha ki ya, “Ani nga awirina Azaya. Ani nandu ka paa kuti awiri bakindo na awiri nakindo.”

14Ko ki ya, “Oni zi yo ni ungayo.” I ki zi yo ni ungayo, ki imi yo pati gu due nga ga Bambu Kpemangeanya, wa aboro 42. Ko abatasa nga gu ni sa te.

15Fuo euari ko ho, ko ki gbia Yonadada nangia wiri Rekaba naaye ka gbia ko. Ko ki poi kuti ko, ki ya fu ko, “Berãro kono du mi ni nzunzu, wa du berãre koyo du mo ni?” Yonadada ki karaga ha ki ya, “Wo du he.” Yeu ki ya, “Ka si du wo, mo táĩ bero kono.” Ko ki taĩ beko koyo du Yeu ni, Yeu ki gbe ko fuo ko ku ngbagidavura yo.

16Ko ki ya, “Ani ndú na mo, mo bi gi nyemuse fu Yekova.” Si du i ki oro na ko rogo gako ngbagidavura.

17Ho ko ada ni Somorona yo, ko ki imi agu aboro dunduko nga ga Aba yo nanye Somorona yo, daho ko agbarasi yo ni dunduko, kuti sangba Yekova, nga gu ko agumba ha fu Eriya.

18Yeu ki dungura aboro dunduko, ki ya fu yo, “Aba amangi pa Bara toni; ono Yeu nikamanga pa ha bakere.

19Si du oni yambu agu anebi du nga ga Bara yo kono du mi ni na airisi he dunduko, na gaha aboromotumo dunduko. Ka boro kpá nga wa sa ya, bambiko mi du na bakere motumo ka manga ha fu Bara. Gu boro ka nye koyo, ni anyé nga ni ungani te.” Ono Yeu amangi he ni biriki, tipa gu pai nga ko gbarasi airisi Bara dunduko.

20Yeu ki ya, “Oni yámbu irisiirisi gbuu tipa Bara.” I ki taki pande he.

21Yeu ki kedi asunge ku rogo ringara aYisaraere yo dunduko. Airisi Bara ki ye dunduko. Si du boro anye nga sa nga irisi Bara te. I ki rimi ku rogo ga Bara bambu yo. Ga Bara bambu ki hi ahi tona bani ki da ti digida ha ku bani.

22Yeu ki ya fu gu ko nadu ku ri bambu igaroko, “Mo yé na aroko fu airisi Bara dunduko.” Ko ki kusi aroko fu yo.

23Yeu ki ndu na Yonadaba wiri Rekaba, ku dimo yo ku rogo ga Bara bambu yo. Ko ki ya fu airisi Bara, “Oni ngére nga ka bi nga, si ngia gu ni sa erẽ nga vuru Yekova, ono kina airisi Bara.”

24I ki rimi ka tumo ni amotumo na zozo amotumo. Were Yeu aringbisi abóro ku zegi yo wa 80, ki ya fu yo, “Ka gu boro sa merẽ dagba agu yo fu mi yo ku be roni, gu ni ka mbu ni ni ga, i aimo kina ni ku ba ni.”

25Si adu wa gere, wa ko adigisi pa manga motumo na zozo motumo, Yeu ki ya fu ababandarago na fu abarutirivura, “Oni rimi, ka imo yo. Ka boro bati nga sa ya.” I ki imi yo ni basape. Ababandarago na abarutirivura ki nibafu yo ku zegi yo, ki ndu sa gu bakporo ga Bara bambu adu rogo.

26I ki kusi gu duadua kpiaahe nadu rogo ga Bara bambu yo, ki zokodi he.

27I ki kuadi gu duadua mbia nga ga Bara, ki kuadi ga Bara bambu ku sande, si ki du ni gbogorogbi ki da ku awere.

28Wo Yeu agbarasi ga Bara pai dagba aYisaraere.

29Ono Yeu ambu nga peka gu ingaapai nga ga Yerobama wiri Nebata, nga gu ko anaingisa aYisaraere na ni i niingi pai te, nga gu kpia wiri abagara naadu ni dahabu, gu ku Betere yo na gu ku Dana yo a.

30Yekova ki ya fu Yeu “Bambiko wa mo namangi agu apai dunduko wenengaĩ ru aru bangire, ki mangi apai dunduko fu ngbatunga Aba wa si adu kpotore yo, gu rika awiro nga biama ha nikasunga auru ga aYisaraere mbatabakindo.”

31Ono Yeu abanda nga tiko ka apeka sangba ga Yekova arugute nga ga aYisaraere Mbori na kpotoko yo dunduko te. Ko ambu nga peka gu ingaapai nga ga Yerobama te, nga gu ko anaingisa aYisaraere na ni i niingi pai.

32Yekova ki tona ka umbasi ringara aYisaraere ni gu rago re. Azaere ki mangi yo ti abangbanda arago dunduko nga ga aYisaraere;

33tona Yaradene yo ku uroyo, na gu ringara dunduko nga ga Girada, na ga aGado, na ga aRubeno, na ga aManase, tona Aroere yo naadu pati ngboongboorago Arunona yo, nga Girada na Basana.

34Were kura ga Yeu apai na agu apai dunduko ko amangi, na pa gako ngarã dunduko, ati si ni keke he rogo gu Kitabu Peka pa agu apai Abakindo aYisaraere anamanga?

35Yeu ki kpi fuo atitako. I ki kpisidi ko Somorona yo. Yoaza nangia wiriko ki zogo rago ku ba ko.

36Yeu azogo aYisaraere Somorona yo tipa agarã 28.

← Chapter 9 Jump to: Chapter 11 →