2 Kings 22

Zande

← Chapter 21 Jump to: Chapter 23 →

1Gará Yosiya adu muambi ho ko atona zoga rago ni. Ko ki zogo rago Yerusarema yo tipa garã 31. Rimo nako nangia Yedida wiri Adaya nangia boro Bosakata.

2Ko ki nimangi gu pai naru aru bangiri Yekova, ki nipeke sino Dawidi dunduko nangia titako, ka ko akpara nga ku bani ku kumbabe watadu ku garebe yo a ya.

3Si adu wa gere ti gu 18 garã zogarago nangia ga Bakindo Yosiya, bakindo akedi Safana nangia wiri Asaraya nangia bakeapai, Saraya ki ngia wiri Mesurama, ko ndu ku tii ga Yekova bambu yo, ki ya,

4“Mo ndu koyo du Erekiya ni nga gbiamotumo, ko gedi agu amarã nga gu i naye na ni ku rogo ga Yekova bambu yo, nga gu ababanda angbadimo naadungura ha be aboro.

5I ki fu ra ku be agu ababisunge nga agu yo ninabi pa ga Yekova bambu. I tigayo ki fu ra fu agu aborosunge du rogo ga Yekova bambu yo, nambakada sapusapu bambu,

6nga abasekengua, na abamebambu, na abasekembia a. I ningbéke sekeseke ngua na seseambia ka mbakada bambu na ni a.

7Ono i ageda nga agu amarã i afuka ku be yo te; bambiko wa i amanga ha tigayo ni yososopai.”

8Erekiya nangia gbiamotumo ki ya fu Safana nangia bakepai, “Mi abi kitabu rugute rogo ga Yekova bambu yo.”

9Erekiya ki fu gu kitabu re fu Safana, ko ki gedi he. Safana ki ye koyo du bakindo ni nangia bakeapai, ki ringbisi pai berewe fu bakindo, ki ya, “Gamo amoyambu akusi agu amarã i abi he bambu yo, ki fuku ra fu agu ababisunge ninabi sunge rogo ga Yekova bambu yo.”

10Safana nangia bakeapai ki pe he fu bakindo, ki ya, “Erekiya nga boromotumo afu kitabu fere.” Safana ki gedi he fu bakindo.

11Si ki ta du wa gere, ho bakindo agi agu apai ni nga ga kitabu rugute, ko ki siri gako aroko.

12Bakindo ki ta ruga aErekiya nangia boromotumo, na Aikama wiri Safana, na Akabora wiri Mikaya, na Safana nangia bakeapai, na Asaya nangia ga bakindo moyambu, ki ya,

13“Oni ndu ka sana Yekova tipa ré, na tipa aboro, na tipa Yuda dunduko, tipa pa gu pai dũ rogo gi kitabu bi oni re; bambiko ga Yekova zinga ki ni bakere he ki rungudi kuti rani, bambiko atitarani agia nga sangba agu apai du rogo gi kitabu re, ka amanga ha wa du he ni keke he fu rani dunduko te.”

14Si du Erekiya nangia boromotumo, na Aikama, na Akabora, na Safana, na Asaya andu ti ni koyo du Uruda ni nangia denebi, nangia dia Saruma wiri Tikiwa, Tikiwa angia wiri Arasaa nangia babanda aroko. (Ono ri tigari anaraka Yerusarema yo rogo Ue Paparaha.) I ki fura na ri.

15Ri ki ya fu yo, “Ya Yekova nga ga aYisaraere Mbori wẽ: ‘Oni gumba ha fu gu kumba nakedi roni kono du mi ni,

16Ya Yekova wẽ, Oni ngere, mi aye na gbigbitapai ku ri gi rago re, na ku ri araki rogo ho, nga agu apai dunduko du rogo gu kitabu bakindo aYudo nigedi.

17Bambiko i mbu re, ki nizo fuõngua fu kura ambori, ka gara gi zinga kuti yo na gu mangaapai dunduko nga ga beyo. Si du gi zinga akĩ ti ni kuti gi ba re, ka si abísa nga ya.

18Ono oni aya fu bakindo aYudo, nakedi roni ka sana Yekova, oni aya fu ko wẽ, Ya Yekova nga ga aYisaraere Mbori wẽ: Tipa gu pai mo agi he,

19bambiko ho mo agi gu pai ni mi agumba kuti gi ba re, na kuti araki rogo ho, nga i asa yo ni úkiga ni aboro motiwa; ngbaduro yo adu na rungo, mo ki umbasi tiro bara bangiri Yekova, mo ki siri gamo aroko, ki nikpari ku bangire; mi gi pa ro a, wo poi Yekova.

20Mo ngere, si du mi aga na mo koyo du atitaro ni, mo ki ndu ku murá yo rogo zereda, bangiro abi nga gu gbigbitapai dunduko mi ka ye na ni ku ri gi ba te re.’ ” I ki yega na karagapai fu bakindo berewe.

← Chapter 21 Jump to: Chapter 23 →