2 Kings 12

Zande

← Chapter 11 Jump to: Chapter 13 →

1Ti gu saba garã zogarago nga ga Yeu, Yoasa atona zoga rago. Ko ki zogo rago Yerusarema yo tipa garã 40. Rimo nako nangia Sibaya ni boro Bera-saba.

2Yoasa amangi agu apai naru aru bangiri Yekova ti arameko dunduko, nga agu apai Yoyada boromotumo arugu ko kuti ni.

3Ono ko aroga nga tumbatumba arago ku sa yo te. Aboro atumo ki nizo fuõngua kindi ri tumbatumba arago yo.

4Yoasa ki ya fu aboromotumo, “Agu amarã dunduko nga ga kparakpara ahe, nga gu i naye na ni ku rogo ga Yekova bambu yo, gu marã i agedi he ni ruhe fu aboro ni ba sa sa na gu marã naye be ga aboro ruhe ni ba sa sa na gu marã dunduko rago ningba ti boro ni ye na ni ku rogo ga Yekova bambu yo,

5aboromotumo rogo ra ni gayo, aboro ni ba sa sa ka roga ra be agu aboro ini yo yo. I tigayo i ki mbakadi agu aba nagberẽ ti ga Yekova bambu, ho i ka bi gbegberẽ ba ni ti ni.”

6Ono si adu ni gu 23 garã zogarago nga ga Bakindo Yoasa, aboromotumo ambakada nga agu ahe nagberẽ ti bambu wa sa te.

7Si du Bakindo Yoasa akedi sunge fuo Yoyada nangia boromotumo, na kura aboromotumo, ki ya fu-yo, “Tipagine oni ambakada nga agu aba ti ni nagberẽ ti bambu ya? Si du awere ka oni rogo nga kura marã be agu aboro ini oni yo ya, ono oni fú kina agu ra du ho tipa mbakada agu aba nagberẽ ti bambu.”

8Aboromotumo ki idi gu pai nga ka i rogo nga kura marã berewe be aboro ya, watadu mbakada agu aba nagberẽ ti bambu a ya.

9Ono Yoyada boromotumo adi sanduki igamarã, ki biringa ri pipi he, ki moi he pati bamotumo ku kumbabe wa boro narima ku tii ga Yekova bambu yo. Agu aboromotumo naabanda ngbadimo ki moi agu amarã koyo dunduko nga gu aboro aye na ni ku rogo ga Yekova bambu yo.

10Si ki du wo, ho i abi he ni ya bakere marã du sanduki igamarã yo, ga bakindo bakeapai na gbiamotumo ki ye, i ki gedi ra ki moi ra ku rogo amangu nga gu marã i abi rogo ga Yekova bambu yo.

11I ki fu gu marã i aringbisi barõaha ku be agu aboro namangi sunge, nga agu yo narugu pa sunge ga Yekova bambu. I ki fu ra fu abasekengua na abaduabambu, nga agu yo namangi sunge ga Yekova bambu,

12na fu abame bambu, na fu abaseke ambia, na tipa ngbe angua na gege ambia ka mbakada ga Yekova bambu na ni, na tipa agu ahe i akusi tipa bambu ka mbakada ha na ni.

13Ono i amanga nga ainga feda tipa ga Yekova bambu na gu marã i aye na ni ku rogo ga Yekova bambu yo te, watadu aubisawe, na akurungbu, na ambanya, na aũsunge ni dahabu, watadu ni feda a te.

14Bambiko i afu gu marã re fu agu yo namangi sunge, ka mbakada ga Yekova bambu na ni a.

15Ku ri gere i ageda nga marã na agu aboro i afu marã ku be yo i fu ra fu agu yo namangi sunge te; ― bambiko wa i amanga ha ni yososopai.

16Ono marã tipa motumo tindika i aye nga na ni ku rogo ga Yekova bambu yo te; si adu ni ga aboromotumo.

17Ti gu rago re Azaere nangia bakindo aSurio andu ka so vura kuti Gata, ki di he. Ono ho Azaere asa kpakpuko ni ka ndu ku Yerusarema yo,

18Yoasa bakindo aYudo ki rogo gu kparakpara ahe dunduko nga gu Yosafata akpara ha na Yorama, na Azaya na atitako a, nangia abakindo aYudo, na boro gako kparakpara ahe a, na agu adahabu dunduko i abi rogo gu baiga kikiipaahe yo nadu rogo ga Yekova bambu, na ku bakindo yo a. Ko ki kusi he du fu Azaere nangia bakindo aSurio. Si du Azaere ki mbu Yerusarema.

19Were kura ga Yoasa apai, na agu apai dunduko ko anamanga, ati si ni keke he rogo gu Kitabu Peka pa agu apai Abakindo aYudo anamanga?

20Gako amoyambu ki guari ki ta bura ko, ki imi Yoasa pati bambu Miro, ngba gu gene nandu ku Sira yo.

21Yozakara nangia wiri Simata, na Yozabada nangia wiri Somere, nangia gako amoyambu, i namangi ko, ki imi ko. I ki kpisidi ko fuo atitako rogo gu bakporo nga ga Dawidi. Amasaya ki zogo rago ku ba ko nangia wiriko.

← Chapter 11 Jump to: Chapter 13 →