2 Kings 8

Zande

← Chapter 7 Jump to: Chapter 9 →

1Erisa agumba pai fu gu de ko azingisi wiriri be kpio, ki ya, “Mo gúari, ki ga na gamo aborokporo ki sungu ho rengbe mo ka sunga ni; bambiko Yekova nikafu ngbongi. Si aima ku auru kpotosende tipa garã saba.”

2Gu de re ki guari, ki mangi he kuti sangba ga Mbori kumba. Ri ki ndu na gari aborokporo, ki sungu ringara aFereseto yo tipa garã saba.

3Si adu wa gere ti digida saba garã, gu de re ki karaga tiri ringara aFereseto yo. Ri ki ndu koyo du bakindo ni ka kpara tipa gari kporo na gari aati.

4Were bakindo afu na Geazi nga ga ga Mbori kumba moyambu, ki ya, “Mi nakpara foro, mo gúmba nga pa ha fere, gu babakere apai dunduko Erisa anamanga.”

5Si adu wa gere, wa ko agumba ha fu bakindo wa Erisa azingi gu ko nakpi, gu de ko abatasi wiriri, ki kpari fu bakindo tipa gari kporo na tipa gari aati. Geazi ki ya, “Ako bakindo, nga gi gbia, gi de re du re, wiriri du re a, nga gu ko Erisa azingi ko be kpio.”

6Ho bakindo asana gu de re ni, ri ki gumba pa ha fu ko. Si du bakindo ki sia gu barumbatayo fu ri, ki ya, “Mo káraga agu ahe dunduko nangia gari, na gu zuzu ahe dunduko nga ga ati, tona kina ho ri aguari ni ringara no, daku awere a.”

7Erisa ki ye ku Damaseke yo, Benadada Bakindo aSurio ki du na kaza. I ki gumba ha fu ko, ki ya, “Ga Mbori kumba ye kono.”

8Bakindo ki ya fu Azaere, “Mo di gamahe, ki ndu ka gbia ga Mbori kumba, ko sana Yekova tipa rani, ki ya, ‘Mi ahú be gi kaza re?’ ”

9Si du Azaere ki ndu ka gbia Erisa, ki ndu na gamahe, nga wene ahe ni ba sa sa nga ga Damaseke, akameri adu 40 naatindi he. Ho ko aye ni ki ru bara bangiri Erisa, ko ki ya, “Wiro nga Benadada nga bakindo aSurio kedi re kono du mo ni, ki ya, ‘Mi ahú be gi kaza re?’ ”

10Erisa ki ya fu ko, “Mo ndú, ki ya fu ko, ‘Mo ahú ahu ni rengo.’ Ono Yekova yugu he fere ya ko akpí akpi ni rengo.”

11Erisa ki dua bangiriko ki nibi ko nyanyaki, daho zee azi ko ni. Ga Mbori kumba ki nikpari ni aume.

12Azaere ki ya, “Tipagine gi gbia akpara ti ni ni aume?” Erisa ki karaga ha ki ya, “Bambiko mi ini gu gbigbitapai mo akamanga ha fu awiri aYisaraere. Mo azókoda gayo nyanyaki aba du na we. Mo aimo gayo aparanga na abasape. Mo amérã rukutu awiriyo sande i ki kuadi rukutu, ki nisipi rogo agu ade du na agude.”

13Azaere ki ya, “Ono gini he nga ga moyambu, du wa kina ango, ka ko mangi gi bakere apai re?” Erisa ki karaga ha ki ya, “Yekova yugu he fere ya mo adú ni bakindo ku ri aSurio.”

14Ko ki guari pati Erisa, ki ye koyo du bairako ni. Bairako ki ya fu ko, “Gini pai Erisa nigumba ha foro?” Ko ki karaga ha ki ya, “Ko niya fere mo ahú ni rengo.”

15Si adu wa gere fuo girarago, ko ki di roko bahaauruse, ki zogo ho ku ime yo, ki gbaragi he auru kpakpu bairako, daho ko akpi ni. Azaere ki zogo rago ku ba ko.

16Ti gu bisue garã zogarago nangia ga Yorama wiri Aba bakindo aYisaraere, Yorama wiri Yosafata bakindo aYudo ki tona zoga rago.

17Garãko adu 32 ho ko atona zoga rago ni. Ko ki zogo rago Yerusarema yo tipa garã muambi.

18Ko ki nipeke kina agu apai nangia ga abakindo aYisaraere, wa angbatunga Aba anamanga, bambiko ko adi wiri Aba ni diako. Ko ki nimangi gu pai nadu ni gbigbita ha bangiri Yekova.

19Ono Yekova akpi nga nyemu gbarasa Yuda te, bambiko ga Dawidi pai nangia gako moyambu, a wa ko akido he ka fu imarago fu ko na fu atitako nye anye kindi.

20Ti rago Yorama aEdome asa mungu ti du ku tii be aYudo, i ki moi gayo bakindo ni tiyo ku ri yo.

21Yorama ki susi ku Saira yo, na gako angbagidavura dunduko na ko. Ko ki guari yuru na gu gako abarutirivura nga ga angbagidavura yo, ki mangi agu aboro Edome nga agu yo naru nguru pati ko kirikiri, ono gako aboro ki oro ku rogo gayo abamburoko.

22Si du aEdome asa mungu ti ni ti du ku tii be aYudo daku areme. Ribina ki sa mungu a ti kina gu rago re.

23Ono kura ga Yorama apai na agu apai dunduko ko anamanga, ati si ni keke he rogo gu Kitabu Peka pa agu apai Abakindo aYudo anamanga?

24Yorama ki kpi fuo atitako, i ki kpisidi ko fuo atitako rogo gu bakporo nga ga Dawidi. Azaya nangia wiriko ki zogo rago ku ba ko.

25Ti gu 12 garã zogarago nangia ga Yorama wiri Aba bakindo aYisaraere, Azaya nangia wiri Yorama bakindo aYudo atona zoga rago.

26Garã Azaya adu 22 ho ko atona zoga rago ni. Ko ki zogo rago tipa garã sa Yerusarema yo. Rimo nako nangia Atarava nangia tita Omeri bakindo aYisaraere.

27Ko ki nipeke kina gu pai Aba anamanga, ki nimangi gu pai nadu ni gbigbita ha bangiri Yekova, a wa angbatunga Aba anamanga; bambiko ko angia wiri kumba ku de du ni ngbatunga Aba.

28Ko ki ndu na Yorama wiri Aba ka so vura kuti Azaere bakindo aSurio ku Ramota-girada yo, yo aSurio ahogi Yorama ni.

29Bakindo Yorama ki karaga tiko i husi ko Yizerere yo be agu aoro aSurio ahogi ko na ni Rama yo, ho ko aso vura ni kuti Azaere bakindo aSurio. Azaya wiri Yorama nangia bakindo aYudo ki ndu ka bi Yorrama win Aba Yizerere yo, bambiko wa ko adu na kaza.

← Chapter 7 Jump to: Chapter 9 →