2 Kings 17

Zande

← Chapter 16 Jump to: Chapter 18 →

1Ti gu 12 garã zogarago nga ga Aza bakindo aYudo, Osea nangia wiri Era ki tona zoga aYisaraere Somorona yo, ki zogo rago tipa garã ribua.

2Ko ki nimangi gu pai nadu ni gbigbita ha bangiri Yekova, ono ko amanga nga pai wa agu abakindo aYisaraere naadu mbata fu ko te.

3Saramanesere nangia bakindo aAsuro ki ye kuti ko na vura, Osea ki du ni gako zogo, ki niru he fu ko.

4Ono bakindo aAsuro ki ini ga Osea biriki kuti ko, bambiko Osea akedi asunge koyo du So ni nangia bakindo aEzipeto, ka ko arú nga he berewe fu bakiindo aAsuro wa ko anamanga ha na garã na agarã ya. Si du bakindo aAsuro akisi ko ti ni, ki vo ko ku bambukisa yo.

5Bakindo aAsuro ki ni mo ka ndu ku rogo ringara dunduko, ki da ku Somorona yo, ki ru nguru pati he garã ki du biata.

6Ti gu ribua garã zogarago nga ga Osea, bakindo aAsuro ki di Somorona, ki ga na aYisaraere ku Asura yo, ki moi yo ku Ara yo, na ku pavuru gu di nga Abora, ringara Gozana yo, na rogo ga aMadai abaakporo.

7Si adu wo bambiko awiri aYisaraere ainga pai kuti Yekova nga gayo Mbori, naakusi yo ringara Ezipeta yo tii be Faro nangia bakindo aEzipeto. I agunde ti kura ambori,

8ki nipeke gu rugaapai nga ga agu arikaaboro Yekova anado yo barangba awiri aYisaraere, na ga abakindo aYisaraere rugaapai nangia gu i arugu he ni tiyo.

9Awiri aYisaraere ki nimangi agu apai ni gbuko naaru nga ya kuti Yekova nga gayo Mbori. I ki dudua tumbatumba arago tipa yo rogo gayo abaakporo dunduko, tona ti ngbaho ga babandarago bambu ki da ti bakporo ngapa.

10I ki moi duadua ambia na aAsera nga ngbama ku ri gbanga agangara dunduko, na tii agu angua dunduko du na fogo kpehe.

11I azo fuõngua ri gu tumbatumba arago re, a wa agu arikaaboro anamanga nga agu yo Yekova aroga yo ku sa yo barangba yo. I amangi gbigbitapai ka gara ga Yekova zinga ku ri yo.

12I ki nimangi pa kpiaahe, nga gu Yekova ay a fu yo, “Ka oni mangi nga gi pai re ya.”

13Ono Yekova anayugo dezirepai fu aYisaraere na fu aYudo, ku ngba anebi ni ba sa sa, na ku ngba ababiapai a ni ba sa sa, ki ya, “Oni sa tironi ti gaoni gbigbitapai, ki ka kuti sangbare na gi rugaapai, ku sangba agu arugute yo dunduko nga gu mi arugu atitaroni kuti ni, nga gu mi akedi he fu roni ku ngba gimi amoyambu nangia anebi.”

14Ono i akpi nga nyemu ka dega tuyo te, ono i anyakasi riyo kindi, a wa kina atitayo anyakasi riyo naida nga pa Yekova gayo Mbori ya.

15I ki gindiga sangbako, na gako zungahe ko azunga fu atitayo, na gako adezirepai gu ko agumba pa ha fu yo. I ki nipeke fuo kungba apai, ki sa tiyo ni airaruka, ki merẽ fuo agu arikaaboro naadu pati yo kirikiri, nga agu yo Yekova arugu yo tipa yo, ya ka i nimangi nga wa yo ya.

16I ki mbu agu arugute dunduko nga ga Yekova gayo Mbori, ki meke kpiaahe ni zaragasizaragasi he, nga wiri abagara ue, ki mbakadi Asera nga ngbama, ki niirisi rimbasa aũngbangbaturũ dunduko, ki nimangi pa Bara.

17I ki nimangi awiriyo nga akumba na ade i susi rogo we, ki nimangi asoroka na angua, ki nifu tiyo ka manga gu pai nadu ni gbigbita ha bangiri Yekova, ka gara gako zinga ku ri yo.

18Si du Yekova adu ti ni na bakere zinga kuti aYisaraere, ko ki rogo yo ku sa yo bara bangiriko. Boro anye nga yo te kina ngbatunga Yuda sa.

19AYudo aka nga kuti ga Yekova arugute nga gayo Mbori a te, ono i apeke kina ga aYisaraere rugaapai nangia gu pai i arugu he ni tiyo.

20Yekova ki gindiga angbatunga aYisaraere dunduko, ki nirungosi yo, ki fu yo ku be abagbuahe, daho ko abafu yo ni ku sa yo bara bangiriko.

21Bambiko ho ko akpara aYisaraere ni ti ngbatunga Dawidi, i ni tiyo ki moi Yerobama nangia wiri Nebata ni bakindo. Yerobama ki sa aYisaraere ti peka fuo Yekova, ki ingisi yo i nimangi bakere ingapai.

22Awiri aYisaraere anapeka kina ga Yerobama ingaapai dunduko nga gu ko anamanga. I ambu nga ha te;

23daho Yekova arogo aYisaraere ni bara bangiriko ku sa yo, a wa ko anagumba pa ha ku ngba gako amoyambu nangia anebi dunduko. Si du i arogo aYisaraere ti ni ku sa yo rogo gayo ringara ku Asura yo daku areme.

24Bakindo aAsuro ki ye na aboro Babera yo, na Kuta yo, na Awa yo, na Amata yo, na Sefarawayima yo, ki moi yo ku rogo abaakporo Somorona yo, ku ba awiri aYisaraere. I ki di Somorona ni gayo, ki niraki rogo gaha abaakporo.

25Si adu wo, ti tonatona gayo raka yo, i agunde nga ti Yekova te. Si du Yekova akedi abahu ti ni ku dagba yo, ami ki imi bete yo.

26Si du i agumba ha fu bakindo aAsuro ki ya, “Gu rikaaboro mo andu na yo koyo, ki moi yo ku rogo agu abaakporo nga ga Somorona, i aina nga sino gu Mbori nga ga gu ringara re te. Si du kedi ko abahu ti ni ku dagba yo, mo ngere, ami naimo yo aimo, bambiko i aina nga sino gu Mbori nga ga gu ringara rete.”

27Bakindo aAsuro ki rugu yo, ki ya, “Oni kedi gu boromotumo sa dagba agu yo yo oni ayega na yo kono. Ko ndu ka raka yo, ka yugo sino gu Mbori nga ga gu ringara re fu yo.”

28Si du boromotumo sa dagba agu yo i ayega na yo Somorona yo ki ndu ka raka Betere yo, ki niyugu pa waĩ i ka gunde ti Yekova fu yo.

29Ono arikaaboro ni ba sa sa ambakadi gayo ambori kindi, ki nimoi he ku rogo agu abambu nga ga tumbatumba arago, nga gu aSomorono ambakadi he, arikaaboro ni ba sa sa kina ku rogo gayo abaakporo, yo i anarakani.

30Aboro Babera ki dua Sakotabenota, aboro Kuta ki dua Neregara, aboro Amata ki dua Asima,

31aboro Awa ki dua Nebaza na Tarataka, aboro Safarawa ki nizo awiriyo ku we yo fu Aduramereke na Anamereke, nangia agu ambori nga ga Safarawayima.

32I ki nigunde ti Yekova a, ki sa aboro dagba yo ni aboromotumo tipa yo nga ga tumbatumba arago yo, nga agu yo nikafu motumo tipa yo ku rogo agu abambu nga ga tumbatumba arago.

33Ono i anagunde ti Yekova tigu, ki nimangi pa kina gayo ambori a, wa kina gu sino nga ga agu arikaaboro i arogo yo dagba yo yo.

34Daku areme i namanga kina gu kuru sino naadu mbata kindi. I agunde nga ti Yekova te, i amanga nga pai kuti gako rugaapai, watadu kuti sangba asapangbanga, watadu kuti sangba rugute watadu ku sangba andika yo a te, nga agu apai Yekova arugu awiri Yakoba na ni, nga gu ko ko ayambu rimoko nga Yisaraere.

35Yekova azunga he fu yo, ki rugu yo, ki ya, “Ka oni nigunde nga ti kura ambori ya, ka oni ninúgadi nga fu he ya, ka oni nimángi nga pa ha ya, ka oni nitúmo nga fu he a ya.

36Ono Yekova nga gu ko naakusi roni ringara Ezipeta yo ni bakere tandu na ni taĩtaĩ beko, kina ko oni ka agunde ti ko, ko oni ka anugadi fu ko, ko oni ka atumo fu ko a.

37Oni aká kuti rugaapai nye anye kindi, na sangba asapangbanga na rugute, andika a, nga gu ko ake he fu roni. Ka oni agunde nga ti kura ambori ya.

38Gu zungahe zunga mi fu roni re, ka bangironi gó nga ti ni ya. Ka oni agunde nga ti kura ambori a ya.

39Ono kina Yekova gaoni Mbori oni ka agunde ti ko. Ko nikabatasa roni be avuraroni dunduko.”

40Ono i adega nga tuyo sa agu apai re te, i ki nimangi kina gu gayo kuru asino naadu mbata.

41Si du agi arikaaboro re agunde ti Yekova, ki nimangi pa gayo sese kpiaahe a; na awiriyo a wo, na awiri awiriyo wa atitayo anamanga, kina ha i amanga daku awere.

← Chapter 16 Jump to: Chapter 18 →