2 Kings 5

Zande

← Chapter 4 Jump to: Chapter 6 →

1Namana adu ni barutiri ga bakindo aSurio rimbasa aborosovura. Ko adu ni bakere boro bangiri bairako, ni irisiirisi boro, bambiko Yekova afu diabese fu aSurio mbiko ko. Ko adu ni nyanyaki boro ni ngangarã ko, ono ko adu ni boro ngbataka.

2ASurio akuru na rikayo, i ki zi toni degude ni gu rago ni kanga rogo ringara aYisaraere. Ri ki nimángi sunge fu dia Namana.

3Ri ki ya fu nairari, “Ako, ka gi gbia da koyo du gu nebi ni du Somorona yo! si du ka ko husi ko ahusa be gako ngbataka.”

4Namana ki rimi koyo du bairako ni, ki ya fu ko, “Gu degude nga boro ringara aYisaraere nigumba pai wa gere were.”

5Bakindo aSurio ki ya, “Mo ndú koyo awere, mi akéda waraga fu bakindo aYisaraere.” Ko ki guari ka ndu, na ataranda feda be ko bawe, na asekere dahabu wa 6,000, na aremu bawe tipa unda gu.

6Ko ki ye na waraga fu bakindo aYisaraere, waraga ki ya, “Ho gi waraga re ka da ni koyo du mo ni, mo ini he ya kina mi kedi Namana gi moyambu koyo du mo ni, mo husi ko be gako ngbataka.”

7Si adu ho bakindo aYisaraere agedi gi waraga re ni, ko ki siri gako roko, ki ya, “Mbori nga mi, ka imi boro ki zingisi ni berewe, gi kumba re nikedi boro kono du mi ni ya mi husi ni be gani ngbataka? Mi nazungadi roni, oni bérẽ nga ha, ki bi nga ha wa ko agbata pai kuti re.”

8Ono ho Erisa agi he ni nangia ga Mbori kumba ya bakindo aYisaraere siri gako roko, ko ki kedi sunge koyo du bakindo ni, ki ya, “Tipagine siri mo ga roko ti ni? Mo kédi ko awere kono du mi ni, ko ini he ya nebi du ringara aYisaraere no.”

9Si du Namana aye ti ni na gako afarasi na angbagidavura, ki ru pati ga Erisa bambu.

10Erisa ki kedi sunge koyo du ko ni, ki ya fu ko wẽ, “Mo nau ki zundu tiro Yaradene yo bara saba, kpotoro ki sa tiru berewe, mo ki du gigiri.”

11Ono Namana ki zingi azinga, ki ta guari ku sa yo, niya, “Oni ngére, mi niberẽ he tigimi, ya ko akúra fuo re ni rengo, ki ru ki yambu he ti rimo Yekova nga gako Mbori, ki pedi ho du ngbataka ni ni beko, ki husi boro ngbataka.

12A nga adi Damaseke yo, nga Abana na Parupara, ngba susi agu adi dunduko du ringara aYisaraere no te? Ka mi zundu nga tire rogo yo mi giri te?” Si du ko ki birĩ tiko ku sa yo na bakere era.

13Ono gako amoyambu ki ye koyo du ko ni, ki gumba pai fu ko ki ya, “Buba, ka ngia nebi niya foro mo mángi gu pai kii akia, mo mángi nga ha te? Waĩ tie, ka mo mángi nga gu pai gumba ko ho foro te? nga ‘Mo zúndu tiro, ki giri.’ ”

14Si du ko ki ndu ku di yo, ki mogo tiko ku Yaradene yo bara saba, kuti sangba ga Mbori kumba. Kpotoko ki sa tiru berewe wa kina kpoto toni gude, ko ki giri.

15Ko ki karaga tiko koyo du ga Mbori kumba ni, ko na gako aboro dunduko, ki da ru bara bangiriko. Ko ki ya, “Mo ngére, mi ini he awere ya a nga kura Mbori ho auru kpotosende te, ono kina ku Yisaraere no. Si du mi nakpara foro, mo di gamahe be ga moyambu.”

16Ono Erisa ki ya, “A wa du Yekova ni ungako, nga gu ko ru mi bara bangiriko, mi adia nga he be ro wa sa te.” Were Namana ki dari ko ko di he; ono ko ki ka aka.

17Namana ki ya, “Ka si adu nga tie wo ya, mi nazungadi ro mo ídi he i fu sende fu ga moyambu wa ka i ringbisi he ku auru adongi ue ami tindi he; bambiko ga moyambu atúmo nga na zozo motumo na ubuga fu kura ambori berewe te, ono fu kina Yekova sa.

18Yekova nivú ga moyambu ti manga gi pai re; nga, ho bairare nandu ni ku tii ga Rimona bambu yo ka fu irisa yo, ko ki nisongodi tiko kuti bere, mi ki ninugadi rogo ga Rimona bambu yo, ho mi ka ninugadi ni tii ga Rimona bambu yo, Yekova nivú ga moyambu ti gi pai re.”

19Erisa ki ya fu ko, “Mo gá zezeredi.” Ono ho Namana aguari ni pati Erisa ngbutuko,

20Geazi nangia ga Erisa moyambu nangia ga Mbori kumba ki ya, “Oni ngére, wa bairare nahe Namana boro Suria, ko ga na agu ahe ko aye na ni ka ko adia nga he be ko ya. Wa du Yekova ni ungako, mi nikaora fuo ko, ki rogo bete ahe be ko.”

21Si du Geazi ado fuo Namana ti ni. Ho Namana abi ko ni ko niyara fuo ko, ko ki zorõ ri gako ngbagidavura ka gbia ko, ki sana ko, “Pai du?”

22Ko ki ya, “Pai te. Bairare nikedi re, ki ya, ‘Aparanga da ue kono du mi ni awere, nga awiri anebi rogo ringara abaagangara Efuraima. Mi nakpara foro, mo fú taranda feda fu yo sa, na aremu ue tipa unda gu.’ ”

23Namana ki ya, “Si ngba, mo rogo ataranda ue.” Ko ki zungadi ko, ki vodi ataranda feda ue na amangu ue, na aremu ue tipa unda gu, ki moi he ku ri gako amoyambu ue. I ki tindi he ku mbata yo fu Geazi.

24Ho ko ada ni pati tumbatumba rago, ko ki rogo ho be yo, ki igi he ku dimo yo. Ko ki mbu akumba i ga. I ki ga.

25Ko ki rimi ku dimoyo, ki ru bara bangiri bairako. Erisa ki ya fu ko, “Mo naye wari, Geazi?” Ko ki ya, “Ga moyambu andu nga te.”

26Ono Erisa ki ya fu ko, “A nga mi nindu na kina ro rogo toro yo, ho gu kumba nikaraga tiko ni rogo gako ngbagidavura ka gbia ro, te? Rago roga ahe du awere? watadu roga marã, na aremu, na aati aeraya na aati bakakue, na akandoro na abaabagara, na amoyambu na anagbindi?

27Si du gu ngbataka naadu ti Namana nikazia ro, na angbatungaro nye anye kindi.” Ko ki guari bara bangiriko na kinaku ngbataka ti ko, kpotoko ki vuru avura kpau wa kina morogumba.

← Chapter 4 Jump to: Chapter 6 →