2 Kings 11

Zande

← Chapter 10 Jump to: Chapter 12 →

1Were ho Ataraya nangia na Azaya abi he ni ya wiriri kpi, ri ki guari ki imi ngbatunga bakindo aimo du.

2Ono Yoseba nangia wiri Bakindo Yorama nangia dawiri Azaya, ri adi Yoasa nangia wiri Azaya dagba awiri bakindo nga agu yo i akaimo yo, ki merẽ na ko, ko na nambutiko a, ki oko yo ku bamburame yo. I ki oko ko be Ataraya, si du i aimo nga ko ti ni ya.

3Ko araki be ri ni okooko ko rogo ga Yekova bambu yo tipa garã sita, Ataraya ki zogo ringara.

4Ono ti saba garã Yoyada ki kedi asunge ka roga abarutirivura nga ga akama yo nga aKara na ga ababandarago yo. I ki ye na yo koyo du ko ni ku rogo ga Yekova bambu yo. Ko ki mangi mokido na yo, i ki zunga he fu ko rogo ga Yekova bambu yo. Ko ki yugu wiri bakindo fu yo.

5Ko ki rugu yo, ki ya, “Gere nga gu pai oni akamanga: gu rikaroni du wa sa dagba biata roni ninaye ti rago sabiti, oni nikadu ni ababanda ga bakindo bambu;

6gu kura rikaroni du wa sa dagba biata roni ki du ngbadimo bakporo Sura yo, gu kura rikaroni du wa sa dagba biata roni du ngbadimo bakporo ku gii ba babandarago yo. Wo oni ka sunguda ku bakindo, ki du ni susu.

7Na gu rikaroni du ue, nga agu yo ninakura rago sabiti, i nikasunguda ga Yekova bambu.

8Oni arú pati bakindo kirikiri, aboro ni ba sa sa na kina gayo marãvura be yo. Gu ni ka ye ku dagba rikaroni yo, i ki imi ni aimo. Oni ki du pati bakindo ho ko ka kura ni, na ho ko ka rima ni.”

9Abarutirivura nga ga akama yo ki mangi agu apai dunduko Yoyada boromotumo arugu yo kuti ni. Aboro ni ba sa sa ki nirogo kina gayo aboro nga agu yo ninaye ti rago sabiti, na agu yo ninadu tipa kura rago sabiti, i ki ye koyo du Yoyada ni nangia boromotumo.

10Boromotumo ki fu agu abaso na avurakube nangia ga Bakindo Dawidi, naadu rogo ga Yekova bambu yo fu agu abarutirivura nga ga akama yo.

11Ababandarago ki rundu, aboro ni ba sa sa na kina gayo auvura be yo, tona ku kumbabe pavuru bambu ku bani, na ku garebe ku pavuru bambu ku bani a, pati bamotumo na bambu, na pati bakindo kirikiri.

12Yoyada ki kusi wiri bakindo, ki moi kpakpari bakindo ku riko yo, ki fu dezirepai fu ko. I ki moi ko ni bakindo, ki mbedi ko. I ki ta beyo, ki ya, “Mbori fú gbanga rame fu bakindo!”

13Ho Ataraya agi woro ababandarago ni na woro aboro, ri ki ye koyo du agu aboro ni nadu rogo ga Yekova bambu yo.

14Ri ki ngereke, bakindo ki ru pati dangba bambu, wa sino abakindo nidu. Abarutirivura na abavudi ambanya ki ru pati bakindo, aboro ringara dunduko ki ningi angi, ki nivudi ambanya. Ataraya ki siri gari aroko, ki poi ku ari, niya, “Pa tabura du! Pa tabura du!”

15Yoyada nangia boromotumo ki rugu agu abarutirivura nga ga akama yo nga agu yo i amoi yo ku ri rimbasa aborosovura, ki ya fu yo, “Oni kúsi ri dagba arika aboro. Gu ni ka pe ri oni ími ni ni basape.” Bambiko boromotumo aya, “Ka i imi nga ri kina rogo ga Yekova bambu yo ya.”

16Si du i ane gene ti ni fu ri. Ri ki ndu barima yo nga ga afarasi ku bakindo yo, i ki imi ri yo.

17Yoyada ki zunga he fu Yekova tipa bakindo na aboro a, i adú ni ga Yekova aboro; dagba bakindo a wo na aboro.

18Aboro ringara dunduko ki ndu ku rogo ga Bara bambu yo, ka kuadi he ku sande. Gaha bamotumo na gaha kpiaahe i ki kuadi he mbusumbusu, ki imi Natana ga Bara boromotumo barangba abamotumo. Boromotumo ki ringbisi abarumbatayo i du ku ri ga Yekova bambu.

19Ko ki rogo abarutirivura nga ga 100 yo, na aKara, na ababandarago, na aboro ringara dunduko; i ki kusi bakindo rogo ga Yekova bambu yo, ki kuru ngba gu gene nga ga ngbadimo babandarago ku bakindo yo. Ko ki sungu auru gu mbatabakindo nga ga abakindo.

20Si du aboro ringara dunduko ki ningi angi, bakporo ki du zezeredi, wa i naimi Ataraya ni basape ku bakindo yo.

21Garã Yoasa adu saba ho ko atona zoga rago ni.

← Chapter 10 Jump to: Chapter 12 →