2 Kings 4

Zande

← Chapter 3 Jump to: Chapter 5 →

1Dia wiri nebi sa dagba anebi yo ki kpari fu Erisa, ki ya, “Ga moyambu kpi nga kumbami. Mo ini he ya ga moyambu anagunde ti Yekova, ono irabape ye ka zia awire ue, i du ni gako akanga.”

2Erisa ki ya fu ri, “Gini he mi ka manga ha foro? Mo gúmba nga ha fere, gini he du be ro dimoyo?” Ri ki ya, “A nga he sa be ga moyambu dimoyo te, kina akoro nzeme du sa.”

3Ko ki ya fu ri, “Mo ndú, ka õ ku aakoro be akuaro dunduko, ka mo ó nga ha ni umba ha ya.

4Mo ki rimi ku dimoyo na awiro, ki kisi ngbadimo fuo roni, ki ukaga nzeme ku rogo agu aakoro re dunduko; gu hi mo ki moi he ku bani.”

5Si du ri ki guari pati ko, ki rimi ku dimo yo na awiriri tvi kisi ngbadimo fuo yo. I ki ye na aakoro fu ri, ri ki niukaga nzeme ku rogo ho.

6Ho aakoro ahiki ni dunduko, ri ki ya fu wiriri, “Mo yé na kura akoro.” Ko ki ya fu ri, “Kura akoro ho te.” Nzeme ki nye.

7Ri ki ye ki gumba ha fu ga Mbori kumba. Ko ki ya fu ri, “Mo ndú, ki bagi gu nzeme re, ki tumo ga bape na marãha. Gu yangara ra ki rengbe tipa ga zingoahe na ga awiro kindi.”

8Si ki ta du wa gere, ni gu rago Erisa andu ku Sunema yo, yo kikiipa de adu ni, ri ki zungadi ko ko ri riahe. Wo si adu, ho ko anasusa ni, ko ki nike yo ka ri riahe.

9Ri ki ya fu kumbari, “Mo ngére awere, mi ini he ya gi kumba re ninasusa erẽ dedede, ga Mbori ziazia kumba nga ko.

10Mi nakpara foro, ani dúa wiri bambu ri vuro bambu. Ani ki moi barame ku vuru he yo fu ko, na mbisa, na mbata, na baduawe. Si du ho ko ka niye ni kono du ani ni, ko ki niongodi yo.”

11Si ki ta du wa gere, ni gu rago ko ada yo, ko ki rimi koyo ki ongodi yo.

12Ko ki ya fu gako moyambu nangia Geazi, “Mo yámbu nga gi de Sunema re.” Ho ko ayambu ri ni, ri ki ye ki ru bara bangiriko.

13Erisa ki ya fu Geazi, “Mo yá fu ri wẽ, Mo ngére, wa mo nabanda rani wenengaĩ gbe; gini he ani ka manga ha foro? Mo nakpi nyemu ani gumba paro fu bakindo, watadu fu barutiri rimbasa aborosovura?” Ri ki karaga ha ki ya, “Mi naraka kina dagba gimi aboro.”

14Erisa ki ya, “Gini he ani ka manga fu ri?” Geazi ki karaga ha ki ya, “Ni rengo kumbagude be ri te, kumbari ni gbinza ko.”

15Erisa ki ya, “Mo yámbu ri.” Ho ko ayambu ri ni ri ki ye ki ru pa ngbadimo bambu.

16Erisa ki ya fu ri, “Ti rago wa gere, ho ragoho ka da ni, mo adú na kumbagude be ro.” Ri ki ya, “Ako, gi gbia, nga ga Mbori kumba, ai, ka mo pé nga zire fu ga moyambu ya.”

17Gi de re ki du na mobara, ki batika kumbagude ti kina gu rago ragoho ada, a wa Erisa agumba ha fu ri.

18Ho gude asono ni, ko andu fuo bako ni gu uru koyo du abakeahe ni.

19Ko ki ya fu bako, “Ako rire, ako rire!” Bako ki ya fu gako moyambu, “Mo tindi ko koyo du nako ni.”

20Ko ki tindi ko ki ndu na ko fu nako, gude ki sungu ri rukusuri ki da ku bebere uru, ko ki kpi.

21Nako ki biti na ko ki pigi ko auru ga ga Mbori kumba barame, ki kisi ngbadimo fuo ko, ki kuru.

22Ri ki yambu kumbari, ki ya, “Mi nakpara foro, mo kedi gu moyambu sa fere, na nadongi sa, mi óro koyo du ga Mbori kumba ni, ki yega berewe.”

23Ko ki ya fu ri, “Tipagine mo andu ti ni koyo du ko ni areme? wa adu nga rago fogo diwi du na sabiti a ya.” Ri ki ya, “Si ngba ni ndu andu.”

24Ri ki moi basunga ku auru nadongi, ki ya fu gari moyambu, “Mo nirúgu ru, ki nindu ku mbata yo; ka mo zéresi nga nduge ya, da kina ho mi ka gumba pai ni foro.”

25Si du ri andu ti ni, ki da koyo du ga Mbori kumba ni pavuru Bagangara Karumera. Si ki ta du wa gere, ho ga Mbori kumba abi ri ni tuturu ku sa yo, ko ki ya fu gako moyambu nga Geazi, “Mo ngére, de Sunema du yore.

26Mo óro ni ba sa ka gbia ri, ki sana ri ki ya, Mo zezeredi? kumbamo zezeredi? wiro zezeredi a?” Ri ki karaga ha ki ya, “Ani zezeredi.”

27Ho ri ada ni koyo du ga Mbori kumba ni pavuru bagangara, ri ki zi nduko. Geazi ki ye ka tura ri ku sa yo. Ono ga Mbori kumba ki ya, “Mo mbú ri, bambiko ngbaduri naima gbe. Yekova aoko gi pai re ti re, ka ko agumba nga pa ha fere ya.”

28Ri ki ya fu ko, “Ako gbia, mi asana ro tipa kumbagude? ati mi aima gumba ha mbata foro ki ya, Ka mo biriki nga re ya?”

29Ko ki ya fu Geazi, “Mo tápa ga roko ku dimoro, ki di gi ngbondo ku bero, ki ndu. Ka mo gbia boro gene, ka mo apáa nga kuti ni ya. Ka boro poi kuti ro, ka mo aída nga ha fu ni a ya. Mo ki pigi gi ngbondo ku ri kpakpu gude.”

30Na gude ki ya fu ko, “A wa du Yekova ni ungako, mbisimoro ki du ni ungaha a, mi ambú nga ro te.” Si du Erisa ki guari ki nipe ri.

31Geazi ki susi ku mbata yo fu yo, ki da pigi ngbondo ku ri kpakpu gude, ono ka fugo adu nga na giapai a ya. Si du ko akaraga tiko ti ni ka gbia Erisa gene, ki gumba ha fu ko, ki ya, “Gude azinga nga te.”

32Ho Erisa ada ni ku dimo yo, ko ki bi kangba gude, ko pi auru gako barame.

33Si du ko ki rimi ku dimo yo, ki kisi ngbadimo fuo yo ue na kangba gude, ki kpari fu Yekova.

34Ko ki guari, ki vagadi ku auru kangba gude, ki moi ngbako ti ngba kangba gude, na bangiriko ti bangiri kangba gude, na beko auru be kangba gude. Ko ki taĩ tiko auru kangba gude, kpoto kangba gude ki foi.

35Ko ki guari berewe, ki ndu vuru bambu ku bani bara sa ki karaga tiko; ki rimi berewe, ki vagadi ku auru ko. Gude ki zika bara saba, ki za bangiriko.

36Erisa ki yambu Geazi ki ya, “Mo yámbu gu de Sunema re.” Si du ko ki yambu ri. Ho ri aye ni koyo du Erisa ni ku dimoyo, ko ki ya fu ri, “Mo túmba wiro ku ari.”

37Ri ki rimi, ki ti ku pati nduko, ki nugadi ku sende. Ri ki tumba wiriri ku ari, ki kuru na ko ku zegi yo.

38Erisa ki ye berewe ku Girigara yo. Gberãngbi ki ti ku rogo gu ringara re. Awiri anebi ki sungu bara bangiri Erisa. Ko ki ya fu gako moyambu wẽ, “Mo moi bapere ku we yo, ki pasi kpepasio fu awiri anebi.”

39Gu ko sa ki ndu ku ati yo ka kitika kpepasio, ki bi kungba wawangua, ki kafu fogo nagbanga ti ni si ki hi auru kpakpu mbosoko. Ko ki yega na ni ki yepe he ku bapere yo, ka ko aina nga gu he nga ha ya.

40Si du i ki uka ha fu akumba i ri he. Ono ho i ari gi he ni re, i ki poi ku ari, ki ya, “Ako ga Mbori kumba, kpio du rogo gi bapere re!” Ka i arengba nga na ri he ya.

41Ono Erisa ki ya, “Oni yé na ngungo fere.” Ko ki uka ha ku bapere yo ki ya, “Oni úka nga ha awere fu akumba i ri nga ha tie.” Ka egetere he adu nga berewe bapere yo ya.

42Kumba aye Bara-sarisa yo, na makawa riahe fu ga Mbori kumba, nga kpokuta 20 rogo ngungo he wa ga mapunga, na vovo zende ahe rogo gako mangu. Erisa ki ya fu ko, “Mo fú he fu akumba, i ri he.”

43Ono gako moyambu ki ya, “Waĩ tie, ka mi moi gere barangba agu aboro du 100?” Erisa ki ya berewe, “Mo tú he fu akumba, i ri he, bambiko ya Yekova wẽ, ‘I ari he, bete he ki nye anye.’ ”

44Si du ko ki moi he barangba yo, i ki ri he, bete he ki nye, a wa Yekova agumba ha.

← Chapter 3 Jump to: Chapter 5 →