2 Kings 13

Zande

← Chapter 12 Jump to: Chapter 14 →

1Ti gu 23 garã zogarago nga ga Yoasa bakindo aYudo nangia wiri Aza, Yoaza nangia wiri Yeu ki tona zoga aYisaraere Somorona yo, ki zogo rago tipa garã 17.

2Ko ki nimángi gu pai nadu ni gbigbita ha bangiri Yekova, ki nipeke gu ingaapai nga ga Yerobama wiri Nebata, nga gu ko anaingisa aYisaraere na ni i niingi pai. Ko ambu nga ha te.

3Ga Yekova zinga ki rungudi kuti aYisaraere, ko afu yo ku be Azaere bakindo aSurio, na ku be Bena-dada wiri Azaere kindi.

4Yoaza ki zungadi Yekova, Yekova ki gi gako kpe; bambiko ko abi gu rungosi nga ga aYisaraere, na waĩ bakindo aSurio arungosi yo.

5Yekova ki fu boro ni batasi fu aYisaraere, si du i akuru tii be aSurio ti ni, awiri aYisaraere ki niraki tii gayo abamburoko wa mbata.

6Ono wa si avura du wo i ambu nga peka gu ingaapai nga ga ngbatunga Yerobama te, nga gu ko anaingisa aYisaraere na ni i niingi pai. Ono i apeka kina ha kindi. Asera nga ngbama ki nye Somorona yo a kindi

7Bambiko Yekova ambu nga aborosovura ni dungu yo fu Yoaza te, kina abanduri afarasi 50, na angbagidavura bawe, na aborondue 10,000; bambiko bakindo aSurio aimi yo gbe, ki sa yo wa kina nvutu bataka zende ahe yo.

8Were kura ga Yoaza apai, na agu apai dunduko ko anamanga, na pa gako ngarã, ati si ni keke he rogo gu Kitabu Peka pa agu apai Abakindo aYisaraere anamanga?

9Yoaza ki kpi fuo atitako. I ki kpisidi ko Somorona yo. Yoasa ki zogo rago ku ba ko nangia wiriko.

10Ti gu 37 garã zogarago nga ga Yoasa bakindo aYudo, kura Yoasa ki tona zoga aYisaraere Somorona yo nangia wiri Yoaza. Ko ki zogo rago tipa garã 16.

11Ko ki nimángi gu pai nadu ni gbigbita ha bangiri Yekova a. Ko ambu nga peka gu ingaapai nga ga Yerobama wiri Nebata te, nga gu ko anaingisa aYisaraere na ni i niingi pai, ono ko apeka kina ha kindi.

12Were kura ga Yoasa apai, na agu apai dunduko ko anamanga, na pa gako ngarã nga gu ko aso vura na ni kuti Amasaya bakindo aYudo, ati si ni keke he rogo gu Kitabu Peka pa agu apai Abakindo aYisaraere anamanga?

13Yoasa ki kpi fuo atitako. Yerobama ki sungu auru gako mbatabakindo. I ki kpisidi Yoasa Somorona yo fuo abakindo aYisaraere.

14Ono Erisa ki kaza gu kaza ko akpi be he. Yoasa ki ye ka bi ko nangia bakindo aYisaraere, ki nikpari ku ri ko, ki ya, “Ako buba, buba! Ga aYisaraere angbagidavura na gaha abanduri afarasi!”

15Erisa ki ya fu ko, “Mo di ga mboto na aguanza.” Ko ki di mboto na aguanza.

16Erisa ki ya fu bakindo aYisaraere, “Mo zádi mboto.” Ko ki zadi he. Erisa ki moi beko ku auru be bakindo.

17Ko ki ya, “Mo zá bangiri bambu ku uroyo.” Ko ki za ha. Erisa ki ya, “Mo zúmu he.” Ko ki zumu he. Erisa ki ya, “Ga Yekova guanza diabese, nga gu guanza nikadia be aSurio! Bambiko mo amánga aSurio Afeka yo, daho mo ka ba tungayo ni kpakaya.”

18Ko ki ya, “Mo rogo aguanza.” Ko ki rogo ra. Erisa ki ya fu bakindo aYisaraere, “Mo nó sende.” Ko ki nofo ho bara biata gbua, ki mbu he.

19Ga Mbori kumba ki zingi fu ko, ki ya, “Ka mo nofo ho bara bisue watadu bara sita, si du ka mo nimángi aSurio ti ni daho mo ka ba tungayo ni kpakaya. Ono mo amánga aSurio wa bara biata gbua.”

20Erisa ki kpi, i ki kpisidi ko. Were gu rikavura nga ga aMoabo ki zuba ringara ho garã atona ni.

21Si adu wa gere, wa i akpisida kumba, oni ngére, i abi rikavura; i ki ba kangba gu kumba re ku rogo murã Erisa yo. Kina mbembedi ho wa kangba ati ku ri meme Erisa, ko ki zingi, ki guari ki ru ku ngba nduko.

22Azaere bakindo aSurio ki nirungosi aYisaraere ti rago Yoaza dunduko.

23Ono Yekova adu na inapai fu yo, nungayo ki nimangi ko, ko ki niberẽ pa yo bambiko gako zungahe fu Abarayama, fu Yisaka na fu Yakoba. Ko agbarasa nga yo te. Ko aba nga yo bara bangiriko ku sa yo ti gu rago a te re.

24Azaere bakindo aSurio ki kpi. Benadada nangia wiriko ki zoao rago ku ba ko.

25Yoasa nangia wiri Yoaza ki rogo agu abaakporo berewe be Benadada nangia wiri Azaere, nga gu Benadada anaroga be Yoaza nangia ba Yoasa ngba vura. Yoasa amangi ko bara biata, ki nirogo ga aYisaraere abaakporo berewe.

← Chapter 12 Jump to: Chapter 14 →