2 Kings 6

Zande

← Chapter 5 Jump to: Chapter 7 →

1Awiri anebi ki ya fu Erisa, “Mo ngére awere, gu ba ani naraka rogo ho na mo, kii nga ha rengbe tipa rani te.

2Mo idi he fu rani ani ndú ku Yaradene yo, aboro ni ba sa sa tindi angbongbo yo, ani ki dua ba tipa rani, yo ka ani aráka ni.” Ko ki karaga ha ki ya, “Oni ndú.”

3Gu ko sa ki ya, “Ka si ngbá ti ro, mo ndú na gamo amoyambu a.” Ko ki karaga ha ki ya, “Mi andú.”

4Si du ko ki ndu na yo. Ho i ada ni ku Yaradene yo, i ki nidewe angua ku sande.

5Ono wa gu ko sa ade ngua, mangua ki uru be ko ki ti ku ime yo. Ko ki poi ku ari, ki ya, “Ako bairare! Mi adi ru adia be kura boro.”

6Ga Mbori kumba ki ya, “Bara wari ti u ni?” Ko ki yugu gu ba re fu ko. Erisa ki kiti wiri ngua, ki ba ha ku ho, mangua ki kuru ki niya aya bangiri ime.

7Ko ki ya, “Mo di ru.” Si du ko ki taĩ beko ki di ru.

8Were Bakindo aSurio ki ye na vura kuti aYisaraere. Ko ki saki pai na avuruko, ki ya, “Gi bataya adú rogo gu ba re.”

9Ono ga Mbori kumba ki kedi pai koyo du bakindo aYisaraere ni, ki ya, “Mo bánda tiro ka mo súsi nga gu ba re ya; bambiko aSurio naye koyo.”

10Bakindo aYisaraere kikedisunge ku rogo gu ba ga Mbori kumba agumba paha fu ko, a wa ko afugu pa ha fu ko, yo ko anabatasa tiko ni wa bara sa, na bara ue a te.

11Gi pai re ki nifudi bakindo aSurio kpotoko yo gbe. Ko ki yambu avuruko, ki ya fu yo, “Ka oni yúgu nga gu ni fere dagba rani nara fu bakindo aYisaraere te?”

12Boro sa dagba avuruko ki ya, “Ako, gi gbia, nga bakindo; ai, ono kina Erisa, nga gu nebi du ku Yisaraere yo, ko ninagumba agu apai mo nagumba barame yo, fu bakindo aYisaraere.”

13Ko ki ya, “Oni ndú ka bi ho du ko ni, mi kedi sunge ka zia ko.” I ki gumba ha fu bakindo, ki ya, “Mo ngere, ko du Dotona yo.”

14Si du ko akedi afarasi ti ni, na angbagidavura, na bakere rimbasa aborosovura. I ki ye yuru, ki ke pati bakporo kirikiri.

15Ho ga ga Mbori kumba moyambu azingi ni ngbatutu wiso, ka kura ku zegi yo, rimbasa aborosovura na afarasi na angbagidavura ki ru pati bakporo kirikiri. Gako moyambu ki ya fu ko, “Ako, bairare! Ani amánga waĩ?”

16Erisa ki karaga ha ki ya, “Ka mo gúnde nga ya, bambiko agu yo du na ani i ngee ti agu yo du na yo.”

17Erisa ki ta kpara, niya, “Ako Yekova, mi nakpara foro, mo zá bangiriko, ko bi agi apai re.” Yekova ki za bangiri gu paranga re; ko ki bi he, nga afarasi na angbagidavura nga ga we ki du kirikiri pati Erisa ri bagangara ni badungu ra.

18Ho aSurio azorõ ni koyo du ko ni, Erisa ki kpari fu Yekova, ki ya, “Mi nakpara foro, mo sá agi yo du re ni airavurari.” Ko ki sa yo ni airavurari a wa Erisa agumba ha.

19Erisa ki ya fu yo, “Gaoni gene nga gi te re, na gi kporo a te re. Oni péke fuo re, mi ki ndu na oni koyo du gu kumba ni oni agbata ko.” Ko ki ndu na yo ku Somorona yo.

20Ho i ada ni ku Somorona yo. Erisa ki ya, “Ako Yekova, mo zá bangiri agi akumba re, i ngére.” Yekova ki za bangiriyo, i ki ngere, ki bi tiyo kina bebere Somorona yo.

21Ho bakindo aYisaraere abi yo ni ko ki ya fu Erisa, “Buba; mi ími yo? mi ími yo?”

22Ko ki karaga ha ki ya, “Ka mo ími nga yo ya. Mo naimo agu aboro zi mo yo mbiko ga basape na ga mboto? Mo moi riahe na ime barangba yo, i ri he ki mbiri he, ki ga koyo du bairayo ni.”

23Ko ki mbakadi dungu riahe tipa yo. Ho i ari he ni ki mbiri he ko ki karaga yo ku sa yo, i ki ga koyo du bairayo ni. Rimbasa aSurio aye nga berewe ku rogo ringara aYisaraere te.

24Fuo gure, Benadada bakindo aSurio ki dungura gako rimbasa aborosovura dunduko ki ndu, ki ru nguru kuti Somorona.

25Bakere ngbongi ki du Somorona yo wa i aru nguru pati he. Si du i abagi ri dongi sa tipa sekere feda 80, na regbo mbipo ni kparakakparaka ha wa bebere ritere tipa sekere feda bisue.

26Wa bakindo aYisaraere asusa auru ngapa bakporo, de ki poi ku ari koyo du ko ni, ki ya, “Ako bakindo, gi gbia, mo únda re!”

27Ko ki ya, “Ka Yekova aunda nga ro ya, wari ka mi unda ro ni? bataka zende ahe yo, watadu bapira imekakue yo?”

28Bakindo ki ya fu ri, “Gini pai nafuda ro?” Ri ki karaga ha ki ya, “Gi de re aya fere, ‘Mo fú wiro, ani ri ko areme, gba ani ki ri wire.’

29Si du ani ki pasi wire, ki ri ko. Mi ki ya fu ri ti kura uru, ‘Mo fu wiro, ani ri ko.’ Ono ri aoko wiriri aoka.”

30Si ki ta du wa gere, ho bakindo agi sangba gu de re ni, ko ki siri gako roko ono ko asusa asusa ri ngapa bakporo aboro ki ngere, ki bi ko, ko naukadi kina mbuzaroko ti kpotoko

31ko ki ya, “Mbori mángi wo fere, na kura ha ku ri he a, ka ri Erisa wiri Safata nye ngba gorõko areme.”

32Ono Erisa asungu kina dimo kpuko yo, abaakumba ki sungu na ko. Bakindo ki di boro sa ki kedi ni; ono ka sunge ata da nga koyo du Erisa ni ya, Erisa ki ya fu abaakumba, “Oni bi he wa gi wiri baimiaboro re akeda sunge ka dia rire ti re? Oni ngére, ho sunge ka da ni, oni ki kisi ngbadimo, ki zi kpuguru nyanyaki. A nga woro ndu bairani nawo giini yo te re?”

33Si kina ku ngbako, sunge ki da koyo du ko ni, ki ya, “Gi gbigbitapai re si naye be Yekova, tipagine ka mi asunguda Yekova berewe ti ni ni gbanga ha?”

← Chapter 5 Jump to: Chapter 7 →