Isaiah 11

Chin (Mara Bible RV (BSI))

← Chapter 10 Jump to: Chapter 12 →

1Zese thabypa tawhta chhyh vaw thao aw ta, A tharizy tawhta a chiah a thaopa a pathei aw.

2Abeipa Thlahpa cha a chô liata a choh aw ta, Cha Thlahpa cha sona nata novâhna Thlahpa châ ta, Ryhraona nata thatlôna Thlahpa chhao châ ta, Abeipa pahnona nata china Thlahpa a châ.

3Â lyna cha Abeipa china liata châ aw ta, A mo ta a hmôpa hawhta pachia leipa aw ta, A nah ta a theipa hawhta bietluna tao aw vei.

4Dyhchhiepazy chô liata adona ta ryureih aw ta, Lei chyhsa nônaipazy châta a khongâh kawpa ta a pachia aw. A pakah chôchahrei ta nôchhiepazy tu aw ta, A hmao hu ta hmoparaopazy a thie aw.

5Siana ta a chai a saih aw ta, Ngâchhihna ta a chai â saih aw.

6Changie cha mietakutaw hnohta pahrâ aw ta, Keichhoh chhao mietaw hnohta â byu aw. Viahchaotaw nata chakeibarôhneipa ama lao bâ khoh aw ei ta, Viahchaotaw pathawhpa chhao ama hnohta a lao bâ aw ta, Hawti chyhpata ta âmo cha a chhihtha aw ei.

7Viahchao nata chavyh ama lao bâ khoh aw ei ta, Ama tawzy hmaohkha ta amâ byu aw. Chakeibarôhneipa cha viahchao tôhpa hawhta Sâhkô a bâ aw.

8Hawti sâhpi a pazypa cha, Chyuphao khaoh chô liata palao aw ta; Hawti sâhpi a pathleih hapa chhao, Vâzi khaoh liata a ku a chahraoh aw.

9Ei tlâh pathaihpa liata cha, Apasasana rai y khao leipa aw ta, Aparaona chhao y khao aw vei. Tilaipi cha tizy ta a biepa hawhta, Leilô he Abeipa pahnona ta a bie khai aw.

10Cha noh liata, Zese thari cha phopizy châta ngiana poh hawhta a duah aw ta, râhzy ta a thâtih patluah aw ei ta, â pahâna su cha a rônah ngaita aw.

11Cha noh liata, Abeipa ta a ei nona ta a ku pazawh heih aw ta, a phopi laibâhpazy cha Asuria, Izi, Pâtharô, Kusi, Elâmi, Sinâ nata Hâmathi râhzy tawhta nata tilaipi kiah râhzy tawhta â vaw chhipakhy heih aw ei.

12Râhzy lâta ngiana poh chaluahpa ta, Ama râh tawhta papuapa Izarei sawzy pahmaoh aw ta, Zudâh paipatlapazy cha, Alei ki palih tawhta a pakhy aw.

13Epharai hiatliana lei aw ta, Zudâh a patypamâtuhpazy Chhawh pathlahpa ama châ aw. Epharai ta Zudâh chô liata a hiatlia khao leipa aw ta, Zudâh ta Epharai patypamâ khao aw vei.

14Epharai nata Zudâh cha, Notla lâta Philistinâ mo ngiatlâh liata a zâ zaw aw ei ta; Hmaohkha ta nochhi sawzy ama hrao aw. Edômâ nata Môabâ chô liata ama ku hy aw ei ta, Amawri mo ta ama rei amâ ngiah aw.

15Abeipa ta Izi Tilaipi paleih cha, Tlokhuh pahleipadia aw ta; Ufrâti Chavah chhao, A ku ta thlih lalôhpa a chatho thlu aw; Vahtie miasari ta pachhaihna taihta tu aw ta, Pheiky dâ leipa ta ama chaka aw.

16Izi râh tawhta ama kaw pua nota, Izarei châta lâlai a ypa hawhna khata, A phopi laibâhpazy châta chhao, Asuria râh tawhta lâlai a y aw.

← Chapter 10 Jump to: Chapter 12 →