Isaiah 55

Chin (Mara Bible RV (BSI))

← Chapter 54 Jump to: Chapter 56 →

1“Hy nâmo, dâhphipa zydua saih u, A vy u la, ti yna lâ a vy teh u. Tâkâ a hnei leipazy chhao a vy u la, Chalei u la, nie teh u! A vy u la, kresawhti nata sâhpiti zy cha, Tâkâ byuh leipa ta chalei u la, A mâ leipa ta chalei teh u.

2Khazia viahchhâ châta a châ leipa liata Nama sôh pahryuh ei chi ta, Rih bie nawpa a châ leipa liata Nama tha namâ pahryuh? Pakhâta ta na nathlie teh u; Hmo phapa nie u la, Nie pahâhpazy ta nama hro lôhrâ a patlô teh u.

3Nama nah pachôhpa ta kei lâ a vy u la, Nama hro thei nawpa ta ei bie nathlie teh u, Nama hnohta tlyzaw biehrai ei tao aw; Dâvi hnohta bie ei taihpa kha pa-i aw na ta, Ei kyhpachâna ngâchhihpa ei pa-i aw.

4Ano cha phopizy châta pahnokheituhpa ta rao na ta, Phopizy chhituhpa nata hyutuhpa ta ei rao.

5Abeipa na Khazohpa ta cha parônahsa ta, Izarei Mo Pathaihpa ta a cha parônahsapa vâta, Na pahno beih leipa phopi aw aw chi ta, Châ pahno beih leipa phopi ta nâ lâ â vaw râ aw.

6“Hmô thei awpa ta a y nota Abeipa cha tlua u la, Â hnia nona heta aw teh u!

7Moleipa ta a hrozie siesai sala, Sialeipa ta a pachânazy pathleih sala, Abeipa lâ kua heih mawh sy, Abeipa ta a vaw ngiachhie aw; Eima Khazohpa lâ kua heih mawh sy, Khazohpa ta tlokhuh â ngiahthai aw.

8Ei pachâpazy cha, Nama pachâpazy châ leipa ta; Nama hroziezy chhao, Ei hroziezy châ vei,” Abeipa ta a tah.

9“Avâzy khi alei hlâta â sâh viapa hawhta, Ei hroziezy cha nâmo hroziezy hlâta a sâh via ta, Ei pachâpazy chhao nama pachâpazy hlâta â sâh via.

10“Vâsua nata dâhaw zy cha, Avâ tawhta za tla ei ta, Avâ lâ kua heih leipa ta, Alei tlao ama padâ tyh. Alei tawhta chi papyusa ei ta, A chhyh ama pakasa tyh; Chi tutuhpa hnohta sâh chi pie ta, A nietuhpa hnohta viahchhâ a pie tyh.

11Cha hawhna hra chata ei bie chhao, Ei pakah tawhta pua aw ta; Aruapa ta kei lâ vaw kua aw vei. Ei chhuahpa patlô aw ta, Ei tuana chhâpa rai a pangoh aw.

12“Thaphapa ta pua aw ei chi ta, Thlalôhpa ta a chhipa nama châ aw; Tlâhpizy nata tlâhthlôhzy ta Nama hmiakô liata hla sa aw ei ta; Lyurâh thokô zydua ta Ama ku ama chabaih aw.

13Ahloh vyuhpa ta meisah vyhpa pyuh aw ta, Diahsai vyuhpa ta mytlia kô a pyuh aw. Cha cha Abeipa moh pha nawpa châta châ aw ta, Chhawh pathlahpa ta y beih leipa aw ta, Tlyzaw châta ngiana ta a y lymâ aw.”

← Chapter 54 Jump to: Chapter 56 →