Isaiah 61

Chin (Mara Bible RV (BSI))

← Chapter 60 Jump to: Chapter 62 →

1Dyhchhiepazy hnohta thâtihpha chho awpa ta, Abeipa ta sathaw eina thupa vâta, Abeipa Zehôvâh Thlahpa cha ei chô liata a y. Palôh keichheihpazy patlâh awpa ta na tuah ta, Seizy hnohta puana bie phuah awpa ta eina tuah. Mochaopazy mopavâna bie phuah awpa ta na tuah ta, Atâhpazy puana bie phuah awpa ta eina tuah.

2Abeipa palôhtlâhna kô phuah awpa ta na tuah ta, Eima Khazohpa phuh lana noh phuahpa ta, Mâchhie a sapa zydua thlapalôh awpa ta eina tuah.

3Zaio liata mâchhie a sapazy hnohta, Buchâh vyuhpa ta, Khutho pie awpa ta eina tuah; Mâchhiesana vyuhpa ta, Thaphana sathaw pie awpa ta tuah ta; Thachhâna thlahpa vyuhpa ta, Reithaina chysia pie awpa ta eina tuah. Abeipa lopa siana ôkâ thozy tahpa ta awpa châ aw ei ta, Abeipa cha palyupalihpa ta a y aw.

4Bohpi a ry hapa suzy paduapathi aw ei ta, Roryhrapa ta khâ a y tyhpa suzy ama paduapathi aw. Khihpi rypazy paduapathi aw ei ta, Chhâ hluhpi roryhrapa ta a ypazy ama paduapathi aw.

5Hmia pahno leipazy ta nama sahroh zawzy a duapâ aw ei ta, Ama lao ama pabâsa aw; Chihropazy ta nama leizy palie aw ei ta, Nama kre sadôzy ama mohôh aw.

6Nâmo deikua cha, Abeipa theihthaipazy tahpa châ aw ei chi ta, Eima Khazohpa chakaotuhpazy ama cha tah aw. Râh hropazy hneirôna nie aw ei chi ta, Ama rônahna namâ palaikhei aw.

7Nama nozana vyuhpa ta, Tovyuh a lie no ta to aw ei chi ta; Nohzaona vyuhpa ta, Ama tovyuh liata amâ ly aw. Chavâta ama râh liata tovyuh a lie no ta hnei aw ei ta, Chhâzaw lyna ama hnei aw.

8Kei, Abeipa he adona pasô na ta, Hraona nata adoleina ei hao. Ama chô liata ei ngâchhihna palâsapa ta, Ama pasataona lymâ pie aw ei na ta, Ama hnohta chhâzaw biehrai ei tao aw.

9Ama sawzy cha, Râhzy hry liata pahnopa châ aw ei ta; Ama pathlazy cha, Phopizy hry liata pahnopa ama châ aw. A hmôpa maihta âmo cha, Abeipa byhnâ piepa chipathla ama châ tahpa ama pahno aw.

10Myuhneituhpa ta theihthaipa hawhta a luh a tobi ta, Myuh ta lôsôhpazy ta â tobipa hawhta; Abeipa ta pachhana chysiazy ta na tobi ta, Siana poh eina pabu; Chavâta Abeipa liata thapha ngaitapa ta y aw na ta, Ei Khazohpa liata ei hro â ly ngaita aw.

11Alei ta chizy papyusa ta, Sadô ta a chhôh liata chi tupazy a papyusapa hawhta, Abeipa Zehôvâh ta phopizy hmiakô liata Siana nata reithaina zy a papyusa aw.

← Chapter 60 Jump to: Chapter 62 →