Isaiah 13

Chin (Mara Bible RV (BSI))

← Chapter 12 Jump to: Chapter 14 →

1He bie he Amôza sawchapawpa Isai ta Babylaw kyh liata aluahna a hmôpa a châ.

2“Tlâh padâ tawhta ngiana poh chaluahpa ta, A paropa ta Babylaw mo cha awsao u la, Beimachâ chhikaozy liata a ngia awpa ta, Nama ku thliethlâpa teh u.

3Ei pathaisapazy cha keima tlai ta biepie ha ei na ta, Ei pasaipha, ei ly kawpa nata ei palaikhei kawpazy cha, Ei hiehâhna pi patloh nawpa ta ei aw ha ei.

4“Tlâhpizy liata zawpi atymâna pyu cha nathlie u la, Zasâh manôh hluh ngaitapa pyu a lyupa cha nathlie tua u! Khinarâhzy palopasahpa pyu cha nathlie u la, Râhzy ahmaohpakhypa pyu cha nathlie tua u! Pheisaihzy Abeipa ta adyuhna châta Pheisaihzy a pahmaohpa pyu a châ chuh.

5Abeipa nata a hiehâhna chariah chhaichhizy châ ei ta, Babylaw râh pôhpalôhpa parao awpa ta, Râh hlapi tawhta a vy ei ta, Avâ chy chhânazy tawhta amâ vy.

6“A rôh teh u, Abeipa noh a hnia ha ta, Atotaotheipa ta a pahleipadia nawpa noh â hnia haw.

7Chavâta ku zydua thazeipa ta y aw ta, Chyhsa to palôh a zao khai aw.

8Chipa ta y aw ei ta, Pasana nata rietheitaona ta âmo cha a patu aw; Chanô saw a zeihpa hawhta, Pachârôh ngaitapa ta ama y aw. Thlazoh pachârôhpa ta a moh raihrie aw ei ta, Ama hmiazy meipaleih hawhta a saih aw.

9“Moh teh u, Abeipa noh a vaw tlô hai, Ngiachhiena a hnei leipa noh châ ta, Pathiiana nata hiehâhna ru ngaitapa noh a châ. Râh cha roryhrapa ta paysa aw ta, A chhôh liata moleipazy a pahleipadia khai aw ei.

10Vâ awhsizy ta ama khaihna papua leipa aw ei ta, Awhsi hlaozy ta ama khaihna papua aw veih ei; Noh a vaw chhipa nahta thlai pazohsapa châ aw ta, Thlâpâ chhao a khaihna papua khao aw vei.

11“Khizaw he a moleina vâta hrie aw na ta, Moleipazy cha ama paraona vâta ei hrie aw ei. Akhotlâhpazy apapiparysana pachhâsa aw na ta, Nôchhiepazy apalaina ei panawhsa aw.

12Chyhsazy cha ngôh suapa hlâta chakoh viapa ta tao aw ei na ta, Chyhsapa cha Ôphi ngôh hlâta chakoh viapa ta ei tao aw.

13“Chavâta avâzy chalyusa aw na ta, Pheisaihzy Abeipa pathiiana noh liata, A hiehâhna ru ngaitapa vâta Alei he a yna tawhta chatho pathlahpa a châ aw.

14Sakhih amâ chadaipa hawhta, Chyhsa to ama chiheihzy lâ a heih aw ei ta, Pahmaohtuhpa a hnei leipa mietaku hawhta, Chyhsa to ama râh chyu lâta amâ râpai aw.

15Ama hmôpa maih a chôsaopa châ aw ei ta, Ama patupa maih zaozi ta ama pao aw.

16Ama hawsaihzy taichheihpa châ aw ei ta, Ama mohmô lia tlai ta taichheihpa ama châ aw; Ama ozy hraopa châ aw ta, Ama lapinôzy patupakhipa ama châ aw.

17“Pachâ teh u, âmo a dyuh awpa ta Media mo pathyu aw na ta, Cha phopi cha tâkâ pachâ leipa ei ta, Ngôh liata a ly hra veih ei.

18Ama libawzy ta satliazy hriechheih aw ta, Chhi thei chô liata zawngiahna hnei leipa aw ei ta, Ama mo ta hawtizy ngiachhie hra aw vei.

19“Khazohpa ta a parao ti ei ta cha, Khinarâhzy lôsôhpa Babylaw cha, Sawdawmâ nata Kawmawrâ hawh ta châ aw ta; Kaldia mo rônahna nata apalaina chhao, Sawdawmâ nata Kawmawrâ hawhta a châ aw.

20Khati ta hmahta, Cha liata chyhsa pahrâ khao leipa aw ei ta; Chhâ zydua ta, A chhôh liata chyhsa y khao aw veih ei. Arabia chyhsazy ta, Cha liata ama poh o parai khao leipa aw ei ta; Mietaku vaituhpa ta, Cha liata ama mietaku zawzy pabyusa khao aw veih ei.

21Râhsazy ta cha liata tlao a byu aw ei ta, Ama ozy cha vakuzy ta a bie aw. Cha liata pavawpizy pahrâ aw ei ta, Sathawhzy châki ama zoh aw.

22O sâhpazy liata changiezy pahrâ aw ei ta, Abei o ngiaryh chhihpazy liata savaizy ama pahrâ aw. Babylaw hriena daihti cha a hnia ha ta, A nohzy pasisapa châ aw vei.”

← Chapter 12 Jump to: Chapter 14 →