Isaiah 50

Chin (Mara Bible RV (BSI))

← Chapter 49 Jump to: Chapter 51 →

1Abeipa ta hetana heta a tah: “Nama nô ei papua hapa kha, Ei mana ryuchâ khataih liata a y? Leih ei bâhpa ahy hnohta ma ei cha zua ei? Pachâ teh u, nâmo moleinazy vâta zuapa châ ei chi ta, Nâmo paraonazy vâta nama nô cha papuapa a châ.

2Khazia ma ei vy no kha chyhsa a hy hmah y leipa ei ta, Khazia ma ei aw no kha nâ chyh-eipa ama y vei tly? Ei ku he chatlai thei lei awpa ta pachhohsapa ma a châ haw? Pachha awpa ta hmotaotheina a hnei leipa ma ei châ haw? Moh teh u, tilaipi cha rapa ta padua na ta, Chavahzy râh raohpa lâta paliepa ta, Ti y leipa vâta nga thu roh pahnâh ta, Dâhphipa ta ama thi.

3Avâzy khi zohna ta tobi ei na ta, Amâ bu awpa ta latho poh ei tao.”

4Bie hmâpa ta thachhâpazy thapatlôzie ei pahno thei nawpa ta, Abeipa Zehôvâh ta paleih asaomâna na pachu ta, My chareih ta na pahrapa ta, Paleih asaomâna na pachu awpa ta ei nah a pahra tyh.

5Abeipa Zehôvâh ta ei nah he pahy ha ta, Chavâta chhorupa ta y leipa na ta, Hnôh a sy hra va na.

6Ei ky he nâ tutuhpazy châta dao na ta, Ei baih he ei baihhmi nâ phiatuhpazy châta ei dao tyh. Ei hmia he nohzaona tawhta nyu leipa na ta, Pachih pachhaona tawhta nyu hra va na.

7Châhrasala Abeipa Zehôvâh ta na bao ta, Chavâta nohzaopa ta y va na. Chavâta pachielô hawhta ei hmia pachâ na ta, Maophyuh aw va na tahpa ei pahno.

8Thai nâ pachâtuhpa cha a hniata ta, Ahy ma nâ dyuh ngâh aw? A duah khoh tua ei si. Nâ khakhaipa cha ahy maw? Nâ vaw hnia mawh sy.

9Moh teh u, Abeipa Zehôvâh ta na bao aw ta, Ahy thailei nâ pachâsa thei aw tly? Ama zydua ta chysia hawhta paroh aw ei ta, Chhoma-u ta a nie khai aw ei.

10Nama hry liata ahy ei Abeipa cha chi ta, A chakaotuhpa bie a zyh tly? Zohna liata chareipa ta Khaihna rai a hnei leipa chyhsa chata, Abeipa moh cha ngâ sala, A Khazohpa cha a ngâchhâ mawh sy.

11Nâmo, mei patih ei chi ta, Meirei iapa ta â chadôsapazy saih u, Nama mei khaihna liata charei u la, Meirei nama chhipa khaihna liata charei muh vy! He he ei ku tawhta nama hmô awpa cha a châ: Riethei pasataopa ta namâ zia aw.

← Chapter 49 Jump to: Chapter 51 →