Isaiah 27

Chin (Mara Bible RV (BSI))

← Chapter 26 Jump to: Chapter 28 →

1Cha noh liata, Abeipa ta a zaozi laipa, tiahpa nata thatlôpa hmâpa ta, Leviathâ parihpi a chakhao ngâpa cha a hrie aw. Leviathâ parihpi a pakipa cha hrie aw ta, tilaipi liata parihpi a ypa cha a thie aw.

2Cha noh liata, Abeipa ta hetana heta a tah: “Kre sadô khochhihpa cha hla phi u la, Kresawhti saihpa cha hla phi teh u!

3Kei, Abeipa he, kre sadô vaituhpa cha châ na ta, Buakha hâh lei ta ti bao na ta, Ahy hmahta ama parao lei nawpa ta, Chhô nah zâ ta ei vaih tyh.

4Ei hiehâh khao vei. Ahloh nata diahsai zy a hrâh hra ei sala, Âmo cha siehnao aw ei na ta, Mei ta ei tô khai aw ei.

5Cha ta a châ vei khiahta cha, Ei thokhy liata a vaw chhai ei sala, Nâ vaw dyh mawh ei sy, Nâ vaw dyh mawh ei sy.”

6Noh a vaw tlô awpazy liata, Zakaw cha thari thla aw ta, Izarei cha a chhyh thaopa ta a paw pawh aw ta, Khizaw zydua he a thei ta a pabie aw.

7Izarei a tutuhpazy a tupa hawhna khata, Izarei cha a tu hra ma? Izarei a thietuhpazy a thiepa hawhna khata, Izarei cha a thie hra ma?

8Izarei cha a dyuh chi ta, A râh tawhta papuapa ta, Na papaipatla haw. Nochhi thlih hrâhpa pathli no hawhta, Abeipa hu thatlôpa ta Izarei cha phaoh ta, A pasie haw.

9Chavâta he hmo he hmâpa ta, Zakaw thaileichâna cha chatlaipa châ aw ta, He he a moleina pasiena thei cha a châ aw: Chinaih lôzy pakeichheihpa hawhta, Nothlahpa khazoh maisâhzy liata alô zydua cha, Izarei ta a pakeichheih khai tita, Aseri tôhzy a duah khao leipa aw ta, Ropahâhpa maisâhzy a duah khao aw vei.

10Thokhy khihpi cha roryhrapa ta y ta, Khih hnypa nata puasaipa châ ha ta, Râhchawhpa a lyu bâ. Cha liata viahchaotaw a lao bâ ta, Cha liata a byupa ta, A thochiah hnazy a pahrie tyh.

11A chiahzy cha ama uah tita tlie ei ta, Chanôzy a vy ei ta tho châta ama pakhy tyh. Pahnona a hnei leipa phopi châ ei ta, Chavâta âmo a taotuhpa ta zawh a ngiah leipa aw ei ta, Âmo a paduatuhpa ta khohkhei aw veih ei.

12Cha noh liata, Ufrâti Chavah tawhta Izi Chavah taihta, Abeipa ta sâh chakhyh aw ta, Hy Izarei sawzy saih u, pakha pakha ta pakhypa nama châ aw.

13Cha noh liata, chiahmie lai ngaitapa tôpa châ aw ta, Asuria râh liata a leipazy nata Izi râh lâta papuapazy a vy aw ei ta, Zerusale liata tlâh pathaihpa liata Abeipa amâ chhy aw.

← Chapter 26 Jump to: Chapter 28 →