Isaiah 31

Chin (Mara Bible RV (BSI))

← Chapter 30 Jump to: Chapter 32 →

1Baona hia awpa ta Izi râh lâ zu ta, Arâzy liata a pahniehpazy cha, Ama hu a po na! Izarei Mo Pathaihpa lâ moh leipa ei ta, Abeipa a saohiah hra veih ei; Talailih hluhpi hneina liata ama ngâna tlao pahnieh ei ta, Arâ pheisaih thatlôpazy liata tlao amâ pahnieh.

2Châhrasala Khazohpa cha asopa châ ta, Chhiena patlôsa ta, A biezy a pathleih leipa a châ. Moleina hmo a taotuhpazy cha, Ama pathlazy taihta thyuhnao aw ta; Hmoparaotuhpazy a baotuhpazy chhao, A thyuhnao aw ei.

3Izi mo cha Khazohpa châ veih ei, Chyhsapa dei ama châ; Ama arâzy chhao thlahpa châ veih ei, Sapa dei ama châ. Abeipa ta a ku a pazawh tita la, Baotuhpa a chapia aw ta, A baopa chhao pao aw ta, Ama zydua ta hmaohkha ta ama leidia aw.

4Abeipa ta hetana heta eina tah: “Chakeibarôhneipa nata chakeibarôhneipa lochopa zy ta, Sa ama taipazy chô liata a rôh ei ta; Mietaku vaituhpa sahlaozy ta amâ râhnaopa chhao ta, Ama awhsâhpa ta pachisa leipa ei ta, Ama pyu ta ama thlah a pazo leipa hawhta; Pheisaihzy Abeipa cha za chô aw ta, Zaio Tlâh liata zâ dyuh aw ta, A tlâh byuhpa liata a zâ dyuh aw.

5Pavawzy ta ama tawzy chô liata ama heihpa hawhta, Pheisaihzy Abeipa ta Zerusale cha a pabohsa aw. Zerusale cha pabohsapa ta pachha aw ta, Pahlôh aw ta a pachha aw.”

6Hy Izarei sawzy saih u, thata nama chakhia hapa lâ kua heih teh u.

7Cha noh liata, chyhsa to ta ama tâkâ khazoh nothlahpazy nata ama ngôh khazoh nothlahpazy, moleina châta nâmo ku ta namâ tao chhyhpazy cha, ama thy ha aw.

8“Asuria cha a pao aw, Chyhsapa zaozi ta deikua châ leipa aw ta, Chyhsapa zaozi a châ leipa zaozi ta a palâ aw. Zaozi tawhta a râ aw ta, A satliazy cha raihriatuhpazy ta taopa ama châ aw.

9Asuria lôpanô cha chichhihna vâta zao aw ta, A beimachâzy chhao chipa ta ama pao aw,” Abeipa, Zaio liata mei patih ta, Zerusale liata patina meihô a patihpa ta a tah.

← Chapter 30 Jump to: Chapter 32 →