Isaiah 54

Chin (Mara Bible RV (BSI))

← Chapter 53 Jump to: Chapter 55 →

1“Hy chanô chohpa, Nâ, saw a sa beih leipa y, Hla sa la; Nâ, nawh a zeih beih lei nô y, Hla sapa ta awh teh! Vahpa chhaopa chanô sawzy hlâta, Chanô kypa sawzy ama hluh via bâ aw,” Abeipa ta a tah.

2Na poh o su pakawh la, Na pahrâna poh ozy pakawh teh. A mochhih leipa la, Na chaorizy paseih la, Na poh o tôhzy pa-i mah y.

3Chachâh lâ nata chavei lâta hiepatlapa ta y aw chi ta, Na chipathlazy ta râhzy la aw ei ta ama hnei aw; Roryhrapa ta a y hapa khihpizy liata, Chyhsa ama pahrâsa heih aw.

4“Chi khah y, Maophyuh khao aw va chi; Na no za khah sy, Hmiachhiepa ta y khao aw va chi. Na thyutlia nota na maophyuhna kha my aw chi ta, Na nôhmeina moh chhiena a thei khao aw va chi.

5Châ Taotuhpa cha na vahpa châ ta, A moh Pheisaihzy Abeipa a châ; Châ Chatlaituhpa chhao Izarei Mo Pathaihpa châ ta, ‘Khizaw zydua Khazohpa,’ Tahpa ta awpa a châ.

6Lapinô mapa palôh pasa ngaitapa aw pakhuapa hawhta, Abeipa ta cha aw pakhua ta; Thyutlia daihti lapinô mapa aw pakhuapa hawhta, Abeipa ta a cha aw pakhua, Na Khazohpa ta a tah.

7Buakhata cha siesai na ta, Châhrasala ngiachhiena rônahpa ta ei châ chhi heih aw.

8Bohpi leipa hiehâhna chyhta vâta, Ei hmia cha vaw nyu sai ha na ta, Châhrasala chhâzaw nôphana ta Ei cha ngiachhie heih aw,” Abeipa, châ Chatlaituhpa ta a tah.

9“Cha hmo cha, Ei châta Nôah hro no hawhna khata châ ta; ‘Nôah tizy ta alei vao khao aw vei,’ Tahpa ta bie ei vaw taih hapa hawhna khata, Na chô liata chhao, Hiehâh khao lei awpa ta bie a taih na ta, Cha ra khao lei awpa ta bie ei taih haw.

10Tlâhpizy ta ama yna su puasaipa ta, Tlâhthlôhzy pasiepa ta ama y thei; Ei ngâchhihna deikua cha, Cha puasai beih leipa aw ta; Ei thlalôhna biehrai chhao, Nâ tawhta pasiepa châ beih aw vei,” Abeipa, châ ngiachhietuhpa ta a tah.

11“Hy nâ, pasa pataosapa ta y chi ta, Thlihpawpa ta cha pathluah ta, Thlapalôh leipa ta a ypa khihpi y, Pachâ teh, lôsôhpazy ta cha paduapathi aw na ta, Saphai lôsôhpazy hmâpa ta, Nâ bôna lôzy ei bô aw.

12Rubi lôsôhpazy hmâpa ta, Na o sâhpazy padua aw na ta; Lôsôhpa pasohpazy hmâpa ta, Na thokhy chhikaozy ei tao aw; Lôsôhpa sôh ngaitapazy hmâpa ta, Na thokhyzy ei paduapathi aw.

13Abeipa ta na saw zydua pachu aw ta, Na sawzy cha ama thlah a lôh ngaita aw.

14Siana ta paduapa châ aw chi ta, Tlybaina tawhta lâhlapi ta na y bâ awpa vâta, Chi khao aw va chi; Chichhihpa tawhta lâhlapi ta y aw chi ta, Châ hnia khao aw vei.

15Châ siehnaopa ama y khiahta cha, Kei ta ei tuapa châ veih ei; Châ siehnaopazy cha, Nâma vâta ama pao aw.

16Moh teh, syudaihpa paysa na ta, Ano ta syu zie ta; Hmâ nawpazie lymâ hawhta Chaihraizy a tao tyh. Keima lilaw ta paraona rai hria awpa ta, Paraotuhpa ei tao hra.

17Nâma a dyuh nawpa ta taopa chaihraizy cha, Kheihawhpa ta hmah cha tiah aw vei; Pachiana liata châ thyuhnaopa palei to chhao, Thailei na pachâsa aw ei. Cha cha Abeipa chakaotuhpazy ryuto châ ta, Kei tawhta ama thaichâna a châ,” Abeipa ta a tah.

← Chapter 53 Jump to: Chapter 55 →