Isaiah 6

Chin (Mara Bible RV (BSI))

← Chapter 5 Jump to: Chapter 7 →

1Bei Uzia a thi kô ta, Abeipa cha beidyuchhai a sâhpa nata a chaluahpa liata â tyu thlâh hapa hmô na ta. A poh rônahpa ta Achhyna o pabie khai ha ta.

2Beidyuchhai chô lâta serâfizy a duah ei ta. Mathlaw miacharu chyu hnei ei ta. Mathlaw miano ta a hmia khu ta, miano ta a pheizy khu ta, miano ta a zaw ta.

3Chatawhcha serâfi pakha ta serâfi hropa hnohta, “Pheisaihzy Abeipa cha, A pathaih na, a pathaih na, a pathaih na; Leilô zydua a rônahna ta a bie,” tahpa ta a awsao raihrie ei ta.

4Awtuhpa awna ao ta ochhi tôhzy chalyusa ta, o cha meikhuh ta bie ha ta.

5Chatawhcha kei ta, “Ei hu a po kaw dia! Ei leidia haw. Hmao pathaih leipa chyhsa châ na ta, hmao pathaih leipa phopi hry liata ei pahrâ. Ei mo ta Abeipa, Pheisaihzy Abeipa a hmô ha khaw!” tah na ta.

6Chatawhcha serâfizy hry liata pakha cha chaikie ta maisâh tawhta a lapa meihei iapa chabapa ta kei lâ a vaw zaw ta.

7Ei pakah na vaw hria ta, ei hnohta, “Moh teh, he heta na hmaozy hria ha ta, na thaileichâna siekheipa châ ta, na moleina a ngiahthaipa a châ haw,” tah ta.

8Chatawhcha ei Abeipa ao thei na ta, “Ahy tuah aw na ta, ahy ma eima châta a sie aw?” tah ta. Kei ta, “He liata ei y! Na tuah mah y!” tah na ta.

9Ano ta ei hnohta, “Sie la, cha phopi hnohna chata, “‘Thei cha thei aw ei chi ta, Châhrasala nama novâh aw vei; Hmô cha hmô aw ei chi ta, Châhrasala pahno thai aw veih ei chi.

10Cha phopi palôh cha a kuhchha ha ta, Ama nah ta bie thei thai khao leipa ta, Ama mo ama paso haw. Chata châ vei sala cha, Ama mo ta hmôpa ta, Ama nah ta thei aw ei ta, Ama palôh ta pahnopa ta, Kei lâ a vaw heih aw ei ta, Ei patlâh ha awpa ei tlai,’ Kei tah mah y,” tah ta.

11Chatawhcha kei ta, “Hy ei Zibeipa, khati taih ma a châ aw?” tah na ta. Abeipa ta hetana heta einâ chhy: “Khihpizy rao khaipa ta, Khihsawzy y khao leipa ta a y hlâlei; Ozy rua khaipa ta, Râh roryhrapa ta a y hlâlei;

12Abeipa ta chyhsazy lâhlapi lâ pasiepa ta, Râh chhôh liata su siesaipa hluhpi a y hlâlei cha, Cha hawhta a châ aw.

13Râh liata chyhsa su hrawh su kha a ngua hra ei sala, Roryhrapa ta paysapa a châ heih aw. Châhrasala terebi nata ôkâ thozy thlu nota, Ama chuahmizy pahlôhpa a châpa hawhta, Chipathla pathaihpa cha Izarei thaby châta pahlôhpa a châ aw.”

← Chapter 5 Jump to: Chapter 7 →